Mateo 23
23
Fariseokunata Jesús qaqchasqanmanta
(Mr 12.38-40; Lc 11.37-54; 20.45-47)
1Chaykunapa qepantam, runakunatawan discipulonkunata Jesús nirqa:
2Diospa leynin yachachiqkunawan fariseokunaqa Moisespa kamachikuyninkunatam allinta reqsinku. 3Chaynaqa, kasukuspayá paykunapa imam nisusqaykichikta ruwaychik. Ichaqa amayá paykunapa imam ruwasqantaqa qatipakuychikchu, paykunaqa manam yachachisqankuman hinachu kawsanku. 4Paykunaqa sasa kaqkunatam llasaq qepita qepichichkaq hina runakunaman kamachinku, ichaqa manam chulla dedollankuwanpas kuyuchiyta munankuchu. 5#Mt 6.1.#Dt 6.8.#Nm 15.38.Imatapas ruwanku runakuna qawanallanpaqmi. Qellqapi kaqkunatam as-asta qellqaruspa cajachakunaman churaruspa urkunkuman hinaspa makinkuman watakuyta gustanku, pachankupa patankunapipas hatun pomponkunataraqmi warkurunku. 6Convidokunapipas hinaspa sinagogakunapipas puntallapi tiyaytaraqmi munanku. 7Plazakunapipas hatun respetowan rimaykuspa “yachachikuq” ninankutaraqmi munanku.
8Qamkunaqa amayá “yachachikuq” nispaqa sutichachikuychikchu. Qamkunaqa wawqentin hinallam kankichik, hukllataqmi Yachachiqnikichikpas. 9Kay pachapiqa amataqyá pitapas “taytay” nispaqa sutichaychikchu, Taytaykichikqa chullallam, payqa hanaq pachapim kachkan. 10Amataqyá “pusakuq” nispapas sutichachikuychikchu, pusasuqnikichikqa chullallam, payqa Cristom. 11#Mt 20.26-27; Mr 9.35; 10.43-44; Lc 22.26.Qamkuna ukupi allin reqsisqa kaqqa serviqnikichikmi kanan. 12#Lc 14.11; 18.14.Pipas hatunchakuqqa uchuychasqam kanqa, pipas uchuychakuqñataqmi hatunchasqa kanqa.
13¡Iskay uya fariseokuna hinaspa Diospa leynin yachachiqkuna, imaynaraq kankichik! Qamkunaqa Diospa munaychakuyninman yaykuqkunatam harkaypaq-harkachkankichik. Manam qamkunapas yaykuyta munankichikchu nitaqmi yaykuy munaqkunatapas yaykunankuta munankichikchu.
14 # 23.14 Kay textoqa ñawpaq manuscritokunapiqa manam kanchu. [¡Iskay uya fariseokuna hinaspa Diospa leynin yachachiqkuna, imaynaraq kankichik! Qamkunaqa viudakunapa llapa imankuta qechuspam allin runa tukuspa una-unaytaraq Diostapas mañakunkichik. Chayraykum llumpay castigasqa kankichik].
15¡Iskay uya fariseokuna hinaspa Diospa leynin yachachiqkuna, imaynaraq kankichik! Qamkunam qatiqnikichikta maskaspa tukuy hinastinpi purimunkichik, tariruspañataqmi qamkunamantapas iskay kuti mastaraq infiernopi castigasqa kananpaq ruwarunkichik.
16¡Runakunata pusaq ñawsakuna, imaynaraq kankichik! Qamkunam ninkichik: “Sichum pipas templorayku juraptinqa manam imananchu. Templopi qorirayku juraspam ichaqa cumplinanpuni”, nispaykichik. 17¡Mana yachayniyuq ñawsakuna! ¿Mayqantaq aswan allinqa: Qorichu icha Diospaq qorita sapaqchaq templochu? 18Qamkunaqa ninkichiktaqmi: “Altarpa sutinpi jurayqa manam imananchu, altarpa hawanpi ofrendarayku juraspam ichaqa cumplinanpuni”, nispaykichik. 19¡Mana yachayniyuq ñawsakuna! ¿Mayqantaq aswan allinqa: Ofrendachu icha Diospaq ofrenda sapaqchaq altarchu? 20Pipas altarpa sutinpi juraqqa manam altarpa sutillanpichu jurachkan, aswanqa altarpa hawanpi kaqkunamantawanmi. 21Pipas templorayku juraqqa, manam temploraykullachu jurachkan, aswanqa chaypi yachaq Diosmantawanmi. 22#Is 66.1; Mt 5.34.Hanaq pacharayku juraqpas, Diospa trononrayku chaynataq chaypi tiyaq Diosraykum jurachkan.
23 #
Lv 27.30. ¡Iskay uya fariseokuna hinaspa Diospa leynin yachachiqkuna, imaynaraq kankichik! Qamkunam yerba buenamanta, anismanta hinaspa cominomanta diezmoykichikta qonkichik; allin ruwayta, kuyapayakuyta hinaspa iñiyniyuq kaytam ichaqa qonqarunkichik. Kay hatun kamachikuykunatam kasukunaykichik, diezmo qoytapas ama qonqaspa. 24¡Runakunata pusaq ñawsakuna! ¡Qamkunaqa tomanaykichikmantam chuspichata suysunkichik, camellotam ichaqa enterollata millpurunkichik!
25¡Iskay uya fariseokuna hinaspa Diospa leynin yachachiqkuna, imaynaraq kankichik! Qamkunaqa vasotawan platotapas hawallantam mayllankichik, ukuykichikmi ichaqa suwakuywan hinaspa mana allinkuna munaywan huntasqa kachkan. 26¡Ñawsa fariseo! Puntataqa vasopa hinaspa platopa ukuntaraqyá mayllay, chaynapim hawanpas mayllasqa kanqa.
27 #
Hch 23.3. ¡Iskay uya fariseokuna hinaspa Diospa leynin yachachiqkuna, imaynaraq kankichik! Hawaykichikqa yuraq-yuraq sepultura hina suma-sumaq allichasqam kachkan, ukuykichikmi ichaqa wañusqakunapa tullunwan hinaspa millakuypaq kaqkunawan huntasqa asnarichkan. 28Qamkunaqa hawallaykichikpim allin ruwaqman rikchakunkichik, sonqoykichikpim ichaqa iskay uya mana allin ruwaqkuna kachkankichik.
29¡Iskay uya fariseokuna hinaspa Diospa leynin yachachiqkuna, imaynaraq kankichik! Qamkunaqa profetakunapaqmi hatun sepulturakunata ruwapunkichik, allin ruwaq runakunapa sepulturankunatam adornankichik, 30hinaspam ninkichik: “Sichum ñawpaq taytanchikkunapa tiemponpi kawsaspaqa, manachá llapa profetakunata wañuchiqmasinchu kachwan karqa”, nispaykichik. 31Chaynata nispaykichikmi profetakunata wañuchiq runakunapa miraynin kasqaykichikta reqsikunkichik. 32Chaynaqa, ¡Ñawpaq taytaykichikkunapa qallarisqantayá qamkunaña tukupaychik!
33 #
Mt 3.7; 12.34; Lc 3.7. ¡Maqta urukuna! ¡Maqta urupa mirayninkuna! ¿Imaynatataq infiernopi castigasqa kanaykichikmanta lluptinkichik? 34Chayraykum profetakunata, yachayniyuqkunata hinaspa yachachikuqkunata kachamusqaykichik; wakintam wañuchinkichik, wakintam chakatankichik, wakintañataqmi sinagogakunapi azotenkichik hinaspam llaqtan-llaqtan qatikachankichik. 35#Gn 4.8.#2 Cr 24.20-21.Chaynapim qamkunaman chayasunkichik llapallan allin ruwaq runakunapa yawarnin, allin ruwaq Abelpa yawarninmanta qallaykuspa Berequiaspa churin Zacariaspa yawarninkama. Paytam templomanta altarman rinapi wañurachirqankichik. 36Cheqaptapunim nikichik, chay llapallan castigoqa kunan tiempopi kawsaq miraykunamanmi chayamusunkichik.
Jerusalenpi yachaqkunamanta Jesuspa waqasqanmanta
(Lc 13.34-35)
37¡Jerusalén, Jerusalén! ¡Profetakunata wañuchispam qanman kachamusqakunata rumiwan chamqapanki! ¡Hayka kutitataq wawaykikunata huñuykuyta munarqani! imaynam chiwchinkunata wallpa rapran ukupi oqllaykuq hina, ichaqa manam munarqankichu 38Chayraykum wasikichikpas chunninqa. 39#Sal 118.26.Kunanmantaqa manañam rikuwankichikñachu: “Señorpa sutinpi hamuqyá hatunchasqa kachun”, ninaykichikkama.
Currently Selected:
Mateo 23: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012