Mateo 2
2
Yachayniyuq runakuna Jesusman watukusqankumanta
1Judá nacionpi rey Herodes munaychakuchkaptinmi, Jesús nacerurqa Judea law Belén llaqtapi. Chay punchawkunapim yachayniyuq runakuna intipa qespimunan lawmanta Jerusalenman chayaramuspanku, 2kaynata tapukurqaku:
¿Maypitaq kachkan judiokunapa reynin nacemuq? Intipa qespimunan lawpim chaskanta rikumurqaniku, chaymi payta hatunchanaykupaq hamurqaniku, nispanku.
3Chayta yacharuspankum rey Herodeswan Jerusalenpi yachaqkuna llumpayta hukmanyarurqaku. 4Chaynapim rey Herodesqa sacerdotepa kamachiqninkunatawan Diospa leynin yachachiqkunata qayachispan maypim Cristo nacenanmanta tapurqa. 5Hinaptinmi paykuna nirqaku:
Judea law Belén llaqtapim, Diospa profetanmi kaynata qellqarqa:
6 #
Miq 5.2. “Judá lawpi Belén llaqta,
qamqa manam Judapi llaqtakunamanta taksallanchu kanki,
qanmantam huk kamachikuq hatarinqa,
paymi Israel llaqtayta michinqa”, nispanku.
7Chaymi Herodesqa, mana pipa yachasqallanta chay yachayniyuqkunata qayarachimurqa, hinaspam haykapim chay chaska rikurisqanmanta allinta tapurqa. 8Chaymantam Belenman rinankupaq kamachispan nirqa:
Rispaykichik chay wawamanta allinta yachaykamuychik, tariruspaykichikñataqmi willaykamuwankichik ñoqapas rispay hatunchamunaypaq, nispan.
9Paykunam reypa nisqanman hina pasarqaku. Rikumusqanku chaskañataqmi ñawpaqninkuta rispan wawapa maymi kasqanpi sayarurqa. 10Chaskata rikuruspankum chay yachayniyuqkuna llumpayta kusikurqaku. 11Chaymi wasiman yaykuykuspanku wawatawan maman Mariata tariykurqaku hinaspam qonqorakuykuspa wawata hatuncharqaku, chaymantam qepinkuta kichaspa apamusqanku qorita, inciensota hinaspa miski asnaq mirrata qorqaku. 12Ichaqa Diosmi paykunata mosqoyninkupi kamachirqa rey Herodesman amaña kutinankupaq, chaymi huklaw ñannintaña llaqtankuman kutikurqaku.
Egiptoman Jesusta ayqechisqankumanta
13Yachayniyuqkunapa ripukusqanku qepallantam, Diospa angelninñataq Joseyman mosqoyninpi rikuriykuspan nirqa:
Hatarispayki wawatawan mamanta Egiptoman ayqechiy hinaspa ñoqa ninaykama chaypi yachamuy. Herodesmi wañuchinanpaq wawata maskachkan, nispa.
14Chaymi puñusqanmanta hatariruspan wawatawan mamanta pusarikuspan chay tutalla Egipto nacionman pasakurqa. 15#Os 11.1.Chaypim yachamurqaku Herodes wañunankama. Kaykunam pasakurqa profetantakama Diospa kayna nisqan cumplikunanpaq. Paymi nirqa:
“Churiytam Egipto nacionpi kachkaptin qayamurqani”, nispa.
Qari wawakunata Herodes wañuchisqanmanta
16Herodesmi chay yachayniyuqkunapa engañarusqanwan llumpayta piñakururqa, hinaspam kamachikurqa Belén llaqtapi chaynataq muyuriqnin llaqtakunapi kaq qari wawakuna, iskay watayuqmanta urayman wañuchisqa kananpaq. Chaytaqa ruwarqa yachayniyuqkunapa willakusqan tiempopa nisqanman hinam. 17Chaynapim profeta Jeremiaspa qellqasqan cumplikurqa. Paymi kaynata nirqa:
18 #
Jer 31.15. “Ramá llaqtapim qapariy uyarikun,
sinchi waqakuywan hatun llakikuymi uyarikun;
Raquelmi wawankunamanta waqakuchkan,
wawankuna wañurusqanraykum
consuelasqa kaytapas manaña munanchu”, nispa.
19Herodes wañuruptinmi Egipto nacionpi José kachkaptin mosqoyninpi Diospa angelnin rikuriykuspan nirqa:
20Hatariy hinaspa wawatawan mamanta pusarikuspa Israel allpaman kutiy, wawa wañuchiy munaqkunaqa wañurunkuñam, nispan.
21Chaymi Joseyqa hatarispan wawatawan mamanta pusarikuspan Israel nacionman kutirqa. 22Ichaqa Herodespa rantinpi churin Arquelaoña Judea nacionpi munaychakusqanta yacharuspanmi, chayman riyta manchakurqa. Hinaspam mosqoyninpi Dios kamachiptin Galilea lawmanña pasakurqa. 23#Lc 2.39.#Is 11.1.Chayman chayaruspanmi Nazaret llaqtapi yacharqa. Chaynapi profetakunapa “Nazaret llaqtayuqwanmi sutichanqaku” nisqanku cumplikunanpaq.
Currently Selected:
Mateo 2: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012