Levítico 11
11
Mikunapaq hinaspa mana mikunapaq animalkunamanta
(Dt 14.23-21)
1-2Israelpa mirayninkunaman ninanpaqmi Moisestawan Aaronta Tayta Dios kaynata nirqa:
Kay pachapi llapallan animalkunamantam 3atakanpi pallqa situyuq chaynataq kutipaq animalkunata mikunkichik. 4Ichaqa kutipaq kaptinpas camellotaqa amam mikunkichikchu, camelloqa kutipaq kaspapas manam pallqa situyuqchu. Chay animalqa mana mikunaykichikpaq hinam. 5Conejotaqa amam mikunkichikchu, conejoqa kutipaq kaspapas manam situyuqchu. Chay animaltaqa millakuypaq animalpaqmi hapinkichik.
6Vizcachataqa amam mikunkichikchu, vizcachaqa kutipaq kaspapas manam situyuqchu. Chay animaltaqa millakuypaqtam hapinkichik.
7Kuchitaqa amam mikunkichikchu, kuchiqa pallqa situyuq kaspapas mana kutipaqmi. Chay animaltaqa millakuypaq animalpaqmi hapinkichik.
8Chay animalkunapa aychantaqa amam mikunkichikchu, wañuruptinpas amam llapchayllapas-llapchaykunkichikchu. Chay animalkunataqa millakuypaqtam hapinkichik.
9-10Yakupi kawsaq animalkunamantaqa, lamar qochapi kaqta otaq mayupi kaqtapas, haykam raprayuq hinaspa escamayuq challwakunallatam mikunkichik; mana escaman kaptinqa amam mikunkichikchu, hatun kaptin otaq taksa kaptinpas. 11Chayna animalkunapa aychantaqa amam mikunkichikchu, wañuruptinpas aswanraqmi millakunkichik. 12Yakupi kawsaq llapallan animalkunamanta mana raprayuq hinaspa mana escamayuq kaptinqa millakunkichikmi.
13-19Alton pawaq animalkunamantaqa millakuypaq kasqankuraykum kaykunata ama mikunkichikchu: Ankakunata, aqchikunata, wamankunata, cuervokunata, avestruzkunata, chuseqkunata, qewllakunata, tukukunata, cormorankunata, ibiskunata, cisnekunata, pelicanokunata, ullachkukunata, cigüeñakunata, garzakunata, leqleskunata, condorkunata, abubillakunata hinaspa masukunatapas.
20Pawaspa pampanta tawa chakinwan puriq urukunataqa amam mikunkichikchu. 21Pawaspa pampan puriq urukunamantaqa pawatyaq urukunallatam mikuwaqchik. Chay urukunapaqa piernanmi chakinwan iskayman patarasqa kanan, chaynapi pawaspan chakinwan takyananpaq. 22Chay urukunamantam mikunkichik tukuy rikchaq aqaruwaykunata, tukuy rikchaq pinki-pinkikunata, chillikukunata hinaspa pinki-pikikunata. 23Pawaspa pampanta tawa chakinwan puriq llapallan urukunaqa millakuypaqmi kanqa.
24Chayna urukuna wañuruptin llapchaq runaqa tutaykunankamam millakuypaq kanqa.
25Pipas chay urukuna wañuruptin hoqariqqa pachantam taqsakunqa, hinaspam tutaykunankama millakuypaq kanqa.
26Tawa atakayuq animalkunamanta mana pallqa situyuq kaptinqa hinaspa mana kutipaq kaptinqa amam mikunkichikchu. Pipas llapchaqqa millakuypaqmi kanqa.
27Tawa chakiyuq animalkunamanta, chaki pampanwan sarupakuqtaqa amam mikunkichikchu. Chay animalkuna wañuruptin llapchaqqa tutaykunankamam millakuypaq kanqa. 28Chay animalkuna wañuruptin hoqariqqa pachantam taqsakunqa, hinaspam tutaykunankama millakuypaq kanqa, chay animalkunataqa millakuypaqmi hapinkichik.
29Pampan puriq animalkunamantapas kaykunatam ama mikunkichikchu: Unchuchukukunata, ukuchakunata, tukuy rikchaq lagartijakunata, 30sukullukuykunata, cocodrilokunata, lagartokunata hinaspa camaleonkunata.
31Chaynaqa, chay pampan puriq animalkunamantam chaykunata millakuypaq hapinkichik. Chay animalkuna wañuruptin llapcharuqqa tutaykunankamam millakuypaq kanqa.
32Chayna animalkuna wañuruspa imapas kullumanta ruwasqaman, pachaman, qaraman, costalman, otaq ima herramientamanpas wichiykuptinqa yakumanmi hinankichik, chaynapim tutaykunankama ama pipas hapinqachu, chaymantañam huktawan servikunqa.
33Chay animalkunamanta wañuruspa allpa mankaman wichiykuptinqa, chay allpa mankapas hinaspa ukunpi tukuy ima kaqpas millakuypaqmi kanqa, chay mankapas pakipasqam kanqa. 34Ima mikuymanpas chay mankapi yaku tallikuykuptinqa, chay mikuymi millakuypaqña kanqa, chay mankapi ima upyana kaqpas millakuypaqñam kanqa. 35Chayna animalkuna wañuruspan imamanpas wichiykuptinqa mana servikuqñam kanqa, horno kaptinpas otaq tullpa kaptinpas pakipankichikmi. Chaykunataqa millakuypaq kasqanraykum millakuypaqña hapinkichik.
36Yaku tomananku pukyuman otaq pozoman wichiykuptinmi ichaqa, chay yakuqa hinalla tomanapaq kanqa; chay animalkuna wañuptin llapchaqmi ichaqa tutaykunankama millakuypaq kanqa.
37Sichum chayna animalkuna wañuruspan tarpuna muhupa hawanman wichiykuptinqa amam wischunkichikchu aswanqa servikunqam; 38nuyusqa muhupa hawanman wichiykuptinmi ichaqa, chay muhuqa mana servikuqña kanqa.
39Mikunapaq animalnikichikmanta mayqanninpas wañuruptinqa, chay wañusqata tupaykuqmi tutaykunankama millakuypaq kanqa. 40Chay wañusqa animalpa aychanta mikuqqa pachanta taqsakuspanmi tutaykunankama ama asuykamuwanqachu, chay wañuruq animalta hoqariqpas pachantam taqsakunqa hinaspam tutaykunankama millakuypaq kanqa.
41Qasqonpa pampan puriq llapallan animalkunataqa amam mikunkichikchu. Chay animalkunataqa millakuypaqmi hapinkichik.
42Qasqonpa pampan puriq llapallan animalkunamantaqa amam mikunkichikchu tawa chakiyuqña otaq achka chakiyuqña kaptinpas. Chay animalkunataqa millakuypaqmi hapinkichik. 43Amayá chay animalkunata mikuspa otaq wañuruptin llapchaspa kikillaykichikqa millakuypaqta ruwakuychikchu. 44#Lv 19.2; 1 Pe 1.16.Ñoqa Tayta Diosmi Diosnikichik kani. Ñoqa chuya kasqayraykuyá qamkunapas sapaqchakuspa chuyanchakuychik. Amayá pampan puriq animalkunata llapchaspaqa millakuypaqta ruwakuychikchu. 45Diosnikichik kanaypaqmi Egipto nacionmanta ñoqa Tayta Dios hurqomurqaykichik. Chaynaqa, chuya kasqayraykuyá qamkunapas chuya kaychik, nispa.
46Kaykunam lliw animalkunamanta, raprayuq animalkunamanta, yakupi kawsaq animalkunamanta hinaspa pampan puriq animalkunamanta yachachikuyniykuna. 47Chaynaqa, amam pantarunkichikchu mayqanmi allin animal kasqantapas otaq mayqanmi millakuypaq animal kasqantapas. Mayqanmi mikuna animal kasqantapas otaq mayqanmi mana mikuna animal kasqantapas.
Currently Selected:
Levítico 11: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
