Juan 9
9
Ñawsa runata Jesús sanoyachisqanmanta
1Jesusmi richkaspan rikururqa nacekusqanmantapuni ñawsa runata. 2Hinaptinmi discipulonkuna tapurqaku:
Yachachikuq ¿imanasqataq wak runaqa ñawsa nacerurqa? ¿Tayta-mamanpa huchanmantachu, icha kikinpa huchanmantachu? nispanku.
3Jesusñataqmi nirqa:
Manam kikinpa huchanmantachu nitaqmi tayta-mamanpa huchanmantachu, aswanqa Diospa ruwasqankuna paypi qawachikunanpaqmi. 4Punchawraq kachkaptinqa kachamuwaqniypa ruwayninkunapim llamkanay, tutayaramuptinmi ichaqa manaña pipas llamkayta atinmanñachu. 5#Mt 5.14; Jn 8.12.Kay pachapiraq kanaykamaqa runakuna achkiqmi kasaq, nispa.
6Chaynata nispanmi allpaman toqaykuspan mituta ruwarurqa, hinaspam ñawsapa ñawinta llusiykuspan 7nirqa:
Siloé estanqueman rispayki mayllakaramuy, nispa.
(Siloeqa “kachasqa” ninanmi).
Rispanmi mayllakaramurqa, hinaspam qawakustinña kutiramurqa. 8Vecinonkunawan hinaspa limosna mañakuq kasqanta rikuqkunañataqmi nirqaku:
¿Kayqa tiyaykuspa limosna mañakuqchús? nispanku.
9Chaymi wakiqñataq nirqaku:
Arí, paypunim, nispanku.
Wakiqninñataqmi nirqaku:
Manam paychu, paymanmi rikchakun, nispanku.
Hinaptinmi kikinñataq nirqa:
Arí, ñoqam kani, nispa.
10Chaymi tapurqaku:
¿Imaynatataq ñawikiqa qawarikururqa? nispanku.
11Payñataqmi willakurqa:
Jesús sutiyuq runam mituta ruwaykuspan ñawiyman llusiykuwarqa hinaspam niwarqa: “Siloé estanqueman rispayki mayllakaramuy” nispan. Chaymi rispay mayllakamurqani, hinaspam qawarikururqani, nispa.
12Paykunañataqmi nirqaku:
¿Maypitaq kachkan chay runaqa? nispanku.
Hinaptinmi ñawsamanta sanoyaruqñataq nirqa:
Manam yachanichu, nispan.
Qawarikuruq runata tapupayasqankumanta
13Chay qawarikuruq runatam fariseokunaman pusarqaku. 14Chay ñawsa runata mituta ruwaykuspan Jesús sanoyarachisqan punchawqa, samana punchawmi karqa. 15Chaymi fariseokuna chay runata huktawan tapurqaku imaynam qawarikurusqanmanta. Payñataqmi willakurqa:
Mituta ruwaykuspam ñawiyta llusiykuwarqa, hinaptinmi mayllakuruspay qawarikururqani, nispa.
16Chaymi wakiqnin fariseokuna nirqaku:
Chay sanoyachisuqniki runaqa manam Diosmanta hamuqchu, payqa samana punchawtapas manam respetanchu, nispanku.
Wakinñataqmi nirqaku:
¿Imaynataq huchasapa runaqa kayna milagrokunataqa ruwanman? nispanku.
Chaynapim kikinkupura atipanakuspanku mana acuerdochu karqaku. 17Chayraykum chay sanoyaruq ñawsata musoqmanta tapurqaku:
¿Qamqa imaninkitaq ñawiki qawarichisuqniki runamantaqa? nispanku.
Hinaptinmi payñataq nirqa:
Payqa profetam, nispa.
18Judiokunañataqmi mana creerqakuchu, ñawsa kachkaspa kunanñataq qawarikurusqantaqa hinaspam tayta-mamanta qayachimuspa kaynata 19tapurqaku:
¿Kay runapa tayta-mamanchum kankichik, paychum “nacesqanmantapuni ñawsam” nisqaykichik? ¿Imaynataq kunanqa qawakuchkanña? nispanku.
20Paykunañataqmi nirqaku:
Arí, ñoqaykum tayta-maman kaniku, yachanikum ñawsa nacesqantaqa. 21Ichaqa manam yachanikuchu imaynam qawarikusqantapas chaynataq pim qawarirachisqantapas, chaynaqa kikintayá tapuychik, yuyayniyuqñam, kikinmi willasunkichik, nispanku.
22Tayta-mamanqa chaynata nirqaku judiokunata manchakuspankum. Llapa judiokunam tanteanakururqaku, sichum pipas “Jesusqa Cristom” niqtaqa sinagogamanta wischurunankupaq. 23Chayraykum taytanwan mamanñataq nirqaku: “Kikintayá tapuychik, payqa yuyayniyuqñam”, nispanku.
24Judiokunam musoqmanta qayachimurqaku ñawsamanta sanoyaruq runata, hinaspam nirqaku:
Diostayá yupaychay, ñoqaykuqa yachanikum chay runaqa huchasapa kasqanta, nispanku.
25Payñataqmi nirqa:
Huchasapa kasqantaqa manam yachanichu, ichaqa kaytam yachakuni: Ñawpaqtaqa ñawsam karqani, kunanmi ichaqa qawakuchkaniña, nispa.
26Chaymi musoqmanta tapurqaku:
¿Imanaykusurqankitaq? ¿Imaynatataq ñawikita kichaykurqa? nispanku.
27Hinaptinmi payñataq nirqa:
Ñam nikichikña, ichaqa manam uyariwankichikchu, ¿imapaqtaq huktawan ninayta munankichik? ¿Icha qamkunapas discipulon kaytachu munankichik? nispa.
28Chaynata niptinmi insultaspanku nirqaku:
Qanmi discipulonqa kanki, ñoqaykuqa Moisespa discipulonkunam kaniku. 29Ñoqaykuqa yachanikum Moisesta Dios rimapayasqanta. Kay runamantam ichaqa maymantam lloqsimusqantapas mana yachanikuchu, nispanku.
30Chay runañataqmi nirqa:
¡Admirakuypaqmi kayqa! Maymantam lloqsimusqanta mana yachachkaptikichikpas ñoqatam ichaqa ñawiyta kichaykuwan. 31Yachasqanchikman hinapas Diosqa manam huchasapakunataqa uyarinchu, aswanqa kasukuspa munasqanta ruwaqkunallatam uyarin. 32Kunankamaqa manam uyarikurqachu nacesqanmantapuni ñawsata pipas qawarirachisqantaqa. 33Sichum kay runa, Diosmanta mana hamuspanqa manachá kaykunataqa ruwanmanchu, nispa.
34Chaymi judiokunañataq nirqaku:
Qamqa huchapa huntasqan nacechkaspachu, ¿ñoqaykutaraq yachachiwaykuta munachkanki? nispanku.
Chaynata niruspankum sinagogamanta qarqorurqaku.
Qawakuq ñawsakunamanta
35Jesusmi yacharurqa chay runata sinagogamanta qarqorusqankuta, chaymi paywan tuparuspan tapurqa:
¿Creenkichu Diospa churinpi? nispa.
36Hinaptinmi chay runa nirqa:
Señor ¿pitaq payqa, payman iñinaypaqqa? nispa.
37Chaymi Jesusñataq nirqa:
Ñam rikuykunkiña, ñoqam kani, paywanmi rimachkanki, nispa.
38Hinaptinmi chay runa nirqa:
Iñinim Señor, nispa.
Chaynata niykuspanmi qonqorakuykuspa yupaycharqa.
39Jesusñataqmi nirqa:
Ñoqam kay pachaman juzganaypaq hamurqani, chaynapi ñawsakuna qawakunankupaq, qawakuqkunañataq ñawsayanankupaq, nispa.
40Chaymi paywan kaq fariseokunañataq chay nisqanta uyariruspanku nirqaku:
¿Chaynaqa, ñoqaykupas ñawsachu kaniku? nispanku.
41Hinaptinmi Jesusñataq nirqa:
Ñawsa kaspaykichikqa mana huchayuqchá kawaqchik, ichaqa “qawakunikum” ninkichikmi, chayraykum huchayuqa kankichik, nispa.
Currently Selected:
Juan 9: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012