YouVersion Logo
Search Icon

Génesis 34

34
Dina abusasqa kasqanmanta
1Huk punchawmi Jacobpa churin otaq Leapa wawan Dina chay llaqtapi sipaskunaman watukuq rirqa. 2Hamorpa churin Siquemmi Dinata rikururqa, hinaspam mana munakuchkaqta hapiruspan abusarurqa. Hamorqa chaylawpi kamachikuq Hev casta runam karqa. 3Ichaqa Siquemmi Jacobpa churin Dinata llumpayta kuyaruspan kuyakuyllawanña rimapayarqa. 4Chaymi taytan Hamorta Siquem nirqa:
Kay sipasman yaykupakapuway paywan casarakunaypaq, nispan.
5Jacobmi yacharurqa churin Dinata Siquem abusarusqanta. Ichaqa qari churinkuna hatuspi animalkunawan kasqanraykum, paykuna kutimunankama upallalla karqa. 6Chaymi Siquempa taytan Hamor yaykupakuwan Jacobman rirqa.
7Jacobpa qari churinkunam hatusmanta chayaramuspanku yacharurqaku imam pasakurusqanta, hinaspam llakikuruspanku anchata piñakururqaku, Israelpiqa chayqa mana haykapipas ruwana kasqanrayku. 8Chaymi paykunawan rimaspan Hamor nirqa:
Churiy Siquemmi panikichikta llumpayta kuyarun, ama hina kaspayá ama harkakuychikchu churiywan casarakunanta. 9Ñoqaykuwan aylluta ruwaspa warmi churikichiktapas ñoqaykumanta kaqkunawan casarachiychik, qamkunapas warmi churiykuwan casarakuychik. 10Ñoqaykuwanña yachakuychik, allpaqa kanqam chaypi yachanaykichikpaq chaynataq negocio ruwanaykichikpaqpas. Kay allpatayá hapikuychik qamkunapaqña kananpaq, nispa.
11Dinapa taytanta hinaspa turinkunata Siquem nirqa:
Ama hina kaspa casararachiwaychik, hinaptinqa imapas mañawasqaykichiktam qosqaykichik. 12Ima regalokunataña mañakuptikichikpas qosqaykichikmi. Panikichikwan casararachiwaychik, nispa.
13Hinaptinmi Jacobpa churinkuna paninku Dina penqayman churasqa kasqanrayku, Siquemta chaynallataq taytan Hamortapas sakrillawan 14nirqaku:
Manam kaytaqa ruwaymankuchu, paniykutaqa manam qoymankuchu qari kaynin mana señalasqa runakunamanqa, chayqa ñoqayku ukupiqa huk hatun penqaymi. 15Sichum qamkunapas ñoqayku hina, llapan qarikuna qari-kaynikichikpi señalachikuptikichikmi ichaqa arí nisqaykiku. 16Chaynapim warmi churiykuwan casarakunkichik, chaynallataqmi ñoqaykupas warmi churikichikwan casarakusaqku, chaynapi huk castallaña kananchikpaq. 17Mana señalachikuyta munaptikichikmi ichaqa paniykuta pusarikuspa ripukusaqku, nispa.
18Chay nisqankum Hamorpaqwan churin Siquempaq allinpaq rikchakarapurqa. 19Hinaptinmi utqayman Siquem qari kayninpi señalarachikurqa, Jacobpa churin Dinata kuyasqanrayku. Siquemqa ayllunkunapa ancha respetasqanmi karqa. 20Chaymantam Hamorqa churin Siquempiwan llaqtankupa punkunpi huñunakuyman rirqaku, hinaspam chaypi runakunata kaynata nirqaku:
21Kay runakunaqa amistadninchikmi, chaynaqa kay allpanchikpi yachaspayá negociota ruwakuchunku. Allpanchikqa hatunmi, paykunapaqpas haypanqam. Warmi churinkunatam casarasun, paykunapas warmi churinchikkunatam casaranqaku.
22Ichaqa paykunawan huk llaqtallaña kananchikpaqmi, ñoqanchik qarikuna paykuna hina llapallanchik qari kayninchikpa qarachanta señalachikunanchik. 23Chaynapim llapa kapuqninkupas chaynataq animalninkupas ñoqanchikpaqña kanqa. Ichaqa paykunawanyá allinta tanteanakusun ñoqanchikwan yachanankupaq, nispanku.
24Hamorpa chaynataq churin Siquempa nisqanta kasuspam llaqtapi llapallan qarikuna, qari kayninkupa qarachanta kuchuchikuspa señalarachikurqaku. 25Hinaptinmi kimsa punchawña hatun nanaypi kachkaptinku, Jacobpa iskay churinkuna otaq Dinapa turinkuna Simeonwan Leví, sapakama espadankuta hapispa llaqtaman yaykururqaku, hinaspam llapallan runakunata mana defiendekuy atichkaqta wañurachirqaku. 26Hamortapas churin Siquemtawan kuskatam espadawan wañurachirqaku, hinaspam Siquempa wasinmanta Dinata hurqoruspanku ripukurqaku. 27Jacobpa wakin churinkunañataqmi llaqtaman rispanku wañuchisqanku runakunapa tukuy imankuta apakurqaku, paninku penqayman churasqa kasqanrayku. 28Hinaspam ovejakunata, vacakunata, asnokunata, llaqtapi llapa ima kaqkunata chaynataq campopi kaqkunatapas apakurqaku. 29Wasikunaman yaykuspam tukuy imankutapas apakurqaku, chaynallataqmi wawakunatapas, warminkutapas presota aparqaku. 30Jacobñataqmi Leviytawan Simeonta nirqa:
Cananeokunawan hinaspa ferezeokunawanmi cheqninarachiwankichik, hinaspam penqayman churaruwankichik; chaynaqa huñunakuruspankuchá atacaramuwanqaku, asllataq runaykunapas kachkan, hinaspachá wañurachiwanqaku, aylluykunatapas wañurachinqakuchá, nispa.
31Chaymi paykunañataq nirqaku:
¿Chuchumikata hinachu paniykuta ruwanman karqa? nispanku.

Currently Selected:

Génesis 34: RCHQ2

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy