Éxodo 13

1Moisestam Tayta Dios nirqa:

2 # Lc 2.23. Llapallan piwikunata qoway, Israelpa mirayninkunamanta punta nacemuqkunaqa ñoqapam, runakuna kaspa otaq animalkuna kaspapas, nispa.

3Chaymi runakunata Moisés nirqa:

Amam kay punchawtaqa qonqankichikchu, kay punchawpim Egipto nacionpi esclavo kasqaykichikmanta lloqsirqankichik. Tayta Diosmi hatun atiyninwan kaymanta hurqosurqankichik. Chaynaqa, amam levadurayuq tantataqa mikunkichikchu. 4Kunanmi qamkuna kay Abib killapi lloqsichkankichik. 5Tayta Diosmi cananeokunapa, heteokunapa, hititakunapa hinaspa jebuseokunapa allpanman pusasunkichik. Ñawpaq taytaykichikmanmi jurarqa tukuy imakunapa kanan chaynataq tukuy kawsaypa qespinan allpata qosunaykichikpaq. Chay allpaman yaykuspaykichikmi kay fiestata Abib killapi ruwankichik. 6Qanchis punchawmi mana levadurayuq tantata mikunkichik, qanchis kaq punchawpim Tayta Diosta yupaychana fiesta kanqa. 7Qanchisnintin punchawmi mana levadurayuq tantata mikunkichik. Chay qanchisnintin punchawpiqa manam maymi kasqaykichikpiqa imapas levadurawan poqosqaqa kanqachu, nitaqmi levadurapas kanqachu. 8Chay punchawpim churikichikkunaman willankichik: “Kaytaqa ruwachkanchik Egipto nacionmanta Tayta Dios hurqomuwasqanchikmantam”, nispaykichik. 9Kayqa kanqa ama qonqanaykichikpaqmi, makikichikpi hinaspa urkuykichikpi marca hinam kanqa, Tayta Diospa yachachikuynin simillaykichikpi kananpaq. Tayta Diosqa hatun atiyninwanmi Egipto nacionmanta hurqomusurqankichik. 10Chaynaqa, imam punchawpim watan-watan kay fiestata Abib killapipuni ruwankichik.

11Qamkunamanpas, ñawpaq taytaykikunamanpas jurasqanman hina cananeokunapa allpanta Tayta Dios qoykusuptikichikmi, 12#Lc 2.23.piwi qari churikichikta Tayta Diosman qonkichik, qonkichiktaqmi punta naceq orqo animaltapas; chaykunaqa Tayta Diospam. 13Asnopa punta wawantam ichaqa huk carnerowan cambianki, mana cambiaspaqa kunkantam qewirunki. Piwi qari churikitapas cambiankitaqmi. 14Churiki qepa punchawta tapususpayki: “¿Imataq kayqa?” nisuptikiqa kaynatam ninki: “Tayta Diosmi esclavo kasqaykumanta hatun atiyninwan Egipto nacionmanta hurqomuwarqaku. 15Sonqonta rumiyarachispa Faraón mana kachariwaptinkum runapa piwi churinmanta qallarispa animalpa piwinkama llapa piwikunata Egipto nacionpi Tayta Dios wañurachirqa. Chayraykum Tayta Diospaq wañuchiniku llapallan punta nacemuq animalkunata, hinaspam piwi qari churiykutapas cambianiku. 16Chaynaqa, qampaqmi kanqa makikipiwan urkuykipi marca hina, Egipto nacionmanta hatun atiyninwan Tayta Dios hurqomuwasqankuta ama qonqanaykipaq”, nispa.

Tayta Dios paykunawan risqanmanta

17Israel runakunata Faraón kachaykuptinqa, hichpalla kachkaptinpas Tayta Diosqa manam filisteokunapa ñannintachu pusarqa. Paymi nirqa:

Kay runakunaqa guerrawan mancharikuspam Egipto nacionman kutikunmanku, nispa.

18Chayraykum Diosqa Puka lamar qocha lawman chunniq ñanninta muyuchirqa. Israelpa mirayninkunaqa tropa-tropam Egipto nacionmanta lloqsirqaku. 19#Gn 50.25; Jos 24.32.Moisesqa Joseypa tullunkunatapas aparqam. Joseymi kawsachkaspallaraq Israelpa mirayninkunata jurachispan nirqa:

Diosmi cheqaptapuni watukamusunkichik, hinaptinmi tulluykunata kaymanta apankichik, nispa.

20Israelpa mirayninkunam Sucotmanta lloqsispanku Etam lawpi carpankuta sayachispa chunniqpa qallariyninpi samarurqaku. 21Punchawmi Tayta Dios paykunapa ñawpaqninta sayanpa puyupi rirqa, tutañataqmi achkinanpaq sayanpa ninapi rirqa, chaynapi tutapas punchawpas rinankupaq. 22Paykunapa ñawpaqninmantaqa manam punchawpi sayanpa puyupas nitaq tutapi sayanpa ninapas karunchakurqachu.

Currently Selected:

Éxodo 13: RCHQ2

Highlight

Copy