Yuudi 1
1
Sɛtʋ
1Ma lɛ Yuudi weyi ɛkɛ Yesu Krɩstʋ tʋmlaɖʋ nɛ Yakubu neu yɔ. Mamaɣnɩ takayaɣ kanɛ mbá mɩ Caa Ɛsɔ ya-mɩ yɔ. Mɩ ɛsɔɔlaa nɛ ɛsɩɩ-mɩ nɛ hɔɔlʋʋ se ɩkɛ Yesu Krɩstʋ ñɩma.
2Mɛnsɛ-mɩ: Ɛsɔ ɛna mɩ-pʋtɔdɩyɛ siŋŋ nɛ ɛhɛzɩ mɩ-laŋa niɣ niɣ nɛ ɛsɔɔlɩ-mɩ siŋŋ.
Pɔkɔŋ mbá pawɩlɩɣ cɛtɩm tɔm yɔ pa-nɩŋgbaaŋ hɔm
3Mɛ-ɛgbaɣdɩnaa! Me-liu kɛwɛɛ kpem se mama-mɩ takayaɣ ɛzɩma mbʋ́ Ɛsɔ yabɩ ɖatɩŋa payɩ ɖa-ñʋʋ yɔ pʋ-tɔm taa. Peeɖe manawa se pɩkɛnɩ-m kɩcɛyʋʋ se mama-mɩ kanɛ nɛ pɩlabɩ-mɩ hʋnʋm nɛ ɩlʋ lidaʋ yɔɔ. Lidaʋ ŋ́gʋ́, kʋ-tɔm pɛkɛdɩ Ɛsɔ ñɩma mɩ kpaagbaa kɛdʋʋ. 4Mɔyɔɔdʋʋ ḿbʋ́, mbʋ́ pʋyɔɔ yɔ, mbá paañaŋ Ɛsɔ yɔ pa-taa nabɛyɛ sʋ mɩ-hɛkʋ taa mɛsaɣ tɛɛ. Papɩsɩɣ ɖɛ-Ɛsɔ lootiye tɔm kiŋgila nɛ yaayala se peɖezini pa-acɛyɛ lakasɩ pe-wezuu caɣʋ taa. Pɔlɔʋ Yesu Krɩstʋ weyi e-ɖeke koŋ ɛkɛ ɖa-Wɩlɩyʋ nɛ ɖa-Kɩpaɣlʋ nɛ ɛcɔŋnɩ pɩtɩŋa pʋ-yɔɔ yɔ. Đooo lɔŋ pama ɛzɩma mbʋ́ pakʋʋ pɔ-tɔm yɔ.
5Paa ɩtɛm sɩm tɔm ndʋ́ meheyiɣ-mɩ yɔ camɩyɛ yɔ, me-liu wɛɛ se mɔntɔzɩ-mɩ-tʋ. Ńdʋ́ lɛ se ɖooo lɔŋ Kɩpaɣlʋ yabɩ Izrɛɛlɩ ñɩma ñʋʋ Ejiptɩ ɛjaɖɛ taa. Ɛlɛ́, pʋwayɩ ɛkʋ pa-taa mbá pɛfɛyɩnɩ lidaʋ ɛ-yɔɔ yɔ. 6Ɩtɔzɩ ɖɔɖɔ se Ɛsɔ tiyiyaa mbá pa-taa fɛyɩ leleŋ nɛ lone nɖɩ́ ɖɩ-taa Ɛsɔ sɩ-wɛ yɔ, pɛlɛɣzɩ ɖɩjaɣyɛ pa-maɣmaɣ nɛ ɛkpa-wɛ ɛhɔkɩ-wɛ yoŋgbasɩ nɛ ɛɖʋ-wɛ ɖooo cɩkpɛndʋʋ taa. Ɛɖʋ-wɛ se pɛwɛɛ sɩ-taa peeɖe ḿbʋ́ nɛ pʋkɔɔ pɩsɩɩnɩ kɩyakʋ sɔsɔʋ ŋgʋ́ ɛkɔŋ ɛhʋʋnɩ-wɛ yɔ. 7Ɩtɔzɩ ɖɔɖɔ se Sodom tɛtʋ nɛ Gomɔɔrɩ ñɩndʋ nɛ ndʋ́ ndʋ́ tɩñɔtɩnɩ-tʋ yɔ, tɩ-taa ñɩma kalaba ɖɔɖɔ ɛzɩ Ɛsɔ tiyiyaa ḿbá yɔ. Palakaɣ acɛyɛ, halɩ pañɩnɩɣ se pala mbʋ́ pɩfɛyɩ ɛyáa ñɩndʋ taa kpem yɔ. Pʋ-yɔɔ Ɛsɔ hɔm pa-nɩŋgbaaŋ nɛ ɛɖʋ-wɛ miŋ weyi eeɖeŋ kaʋ yɔ ɛ-taa. Ɛlabɩ ḿbʋ́ se ɛyáa tɩŋa ɛna nɛ pakpa pa-tɩ.
8Ɛyáa mbá pɛwɛ mɩ-hɛkʋ taa yɔ, ḿbʋ́ ɖɔɖɔ palakɩ. Poɖozuu ɖozee wena ayeki se pala acɛyɛ nɛ apisiɣ-wɛ yɔ. Patakpaɣ Ɛsɔ ɖoŋ payaa pʋyʋ. Patʋʋ ɖoŋ ndɩ ndɩ weyi ɩwɛ ɛsɔdaa yɔ. 9Ŋgʋ́, Ɛsɔ tiyiyu sɔsɔ Miicɛɛlɩ maɣmaɣ taatʋʋ Satanɩ alɩwaatʋ ndʋ́ Mooyiizi sɩba nɛ ɛ nɛ ɩ poyou yɔ. Pɔhɔŋaɣnɩ ɖama tɔm se pana weyi ɛkpakɩɣ-ɩ yɔ. Pɩtatɩɩlabɩ-ɩ se ɛhʋʋnɩ-ɩ nɛ ɛtʋʋ-ɩ. Ɛlɛ́, eheyi-i yem se: «Kɩpaɣlʋ ɛɖʋ-ŋ kʋñɔŋ!» 10Ɛlɛ́, ɛyáa ḿbá, mbʋ́ paasɩŋ yɔ, ḿbʋ́ patʋʋ. Mbʋ́ tɛtɛ kpɩna sɩma yɔ, pi-ɖeke pasɩma. Ḿbʋ́ yekina se pala asɛyʋʋ. 11Pɩya-wɛ! Mbʋ́ pʋyɔɔ yɔ, patɩŋ nʋmɔʋ ŋgʋ́ Kayɛnɩ tɩŋaa yɔ. Liidiye yɔɔ lɛ, pakpaɣ pa-tɩ pasʋzɩ nʋmɔʋ kilebuu taa ɛzɩ Balaam yɔ. Pɛtɛŋɛlaa kpem, mbʋ́ pʋyɔɔ yɔ, pakʋyɩ Ɛsɔ yɔɔ ɛzɩ Kooree kalabʋ yɔ. 12Ɛyáa ḿbá, alɩwaatʋ ndʋ́ ikpeɣliɣ ɖama nɛ ɩkpɛndɩɣ ɩtɔkɩ tɔɔnaɣ se pɩwɩlɩ se ɩsɔɔlɩ ɖama yɔ, pa-lakasɩ kpaɣ-mɩ fɛyɛ. Mbʋ́ pʋyɔɔ yɔ, pɛɖɛlɛsɩɣ niye alɩwaatʋ ndʋ́ pɔtɔkɩ kazandʋ yɔ, fɛyɛ ɛɛkpaɣ-wɛ. Pamaɣzɩɣ pa-maɣmaɣ pa-tɩ yɔɔ ɖeke. Pɛwɛ ɛzɩ mɩndʋ ndʋ́ heɣlim kpakɩɣ nɛ tiiyeki se tɛʋ ɛnɩɩ yɔ. Pɛwɛ ɖɔɖɔ ɛzɩ tɩŋ weyi ɩɩlʋlʋʋ pee nɛ halɩ pɩkpɛndɩnɩ ɩ-lʋlʋʋ alɩwaatʋ yɔ. Pɛwɛ ɛzɩ tɩŋ weyi ɩwɩlaa nɛ pɛkpɛzɩ-ɩ yɔ. 13Panɩɣzɩnɩ teŋgu lɩm hola wena awɛ ɖoŋ yɔ nɛ pa-lakasɩ nzɩ́ sɩkpaɣ ɛyáa fɛyɛ yɔ sɩsɩ ñanɩɣzɩnɩ azuluma wena hola ana akɔŋna yɔ. Pɛwɛ ɛzɩ tɩɩnzɩ nzɩ́ sɩɩcakɩ lone kʋɖʋmɖɩyɛ taa yɔ. Pʋ-yɔɔ Ɛsɔ ñɔɔzɩ-wɛ ɖɩjaɣyɛ cɩkpɛndʋʋ sɔsɔʋ taa se pacaɣ peeɖe tam.
14Enɔɔkɩ weyi ɛkɛ lʋbɛ ñɩnʋ Aɖam liɖe taa yɔ, Ɛsɔ keheyi-i nɛ esusi pɔ-tɔm ɖooo lɔŋ se: «Iwelesi nɛ ɩnɩɩ, Kɩpaɣlʋ nɛ ɛ-ñɩma kutokiŋ ɛgbaŋ ɛgbaŋ pɔkɔŋ 15se pahʋʋnɩ ɛyáa tɩŋa payɩ nɛ pakʋ mbá paañaŋ Ɛsɔ yɔ patɩŋa payɩ pɔ-tɔm. Pakʋʋ-tʋ ɛzaɣ́tʋ ndʋ́ tɩtɩŋa payɩ palabɩ Ɛsɔ yɔ tɩ-yɔɔ. Pakʋʋ ɖɔɖɔ kɩwɛɛkɩm laɖaa ḿbá tɔm ɛzaɣ́tʋ ndʋ́ tɩtɩŋa payɩ pɔyɔɔdɩ-ɩ yɔ tɩ-yɔɔ.» 16Ɛyáa ḿbá, pɔ-nɔsɩ taa ɛɛnɩɣ nɛ pɛwɛɛ patɩmɩɣ. Palakɩ kɩdɛkɛdɩm mbʋ́ pa-maɣmaɣ pe-liu wɛɛ yɔ. Pɔyɔɔdʋʋ tɔm camɩyɛ nɛ pepeɣziɣ ɛyáa nɛ pɔ-nɔɔ leleŋ se pehiɣ kɛzɛɣa.
Lɛɣtʋ ndʋ́ mantasɩɣ Krɩstʋ ñɩma yɔ
17-18Mɛ-ɛgbaɣdɩnaa! Mɩ lɛ, ɩtɔzɩ tɔm ndʋ́ ɖa-Kɩpaɣlʋ Yesu Krɩstʋ tiyiyaa keheyi-mɩ se tɩkɔŋ labʋ yɔ tɩ-yɔɔ. Paaheyi-mɩ se: «Kɛtɛzaɣ alɩwaatʋ taa lɛ, nabɛyɛ wɛɣ nɛ powoŋuu-mɩ. Ḿbá ɛɛñaŋnɩ Ɛsɔ, palakɩ kɩdɛkɛdɩm mbʋ́ pa-maɣmaɣ pe-liu wɛɛ yɔ.» 19Ḿbá ɖɔɖɔ yekina nɛ ɛyáa tayɩɣ ɖama. Mbʋ́ pʋwɛ pa-maɣmaɣ pa-taa yɔ, pi-ɖeke palakɩ. Fezuu Kiɖeɖeu fɛyɩ pɔ-cɔlɔ. 20Mɛ-ɛgbaɣdɩnaa! Mɩ lɛ, ɩñaɣ pana nɛ ɩtɛzɩ pɩʋ lidaʋ kɩbaŋgʋ ŋgʋ́ Ɛsɔ yeba se ɩwɛnɩ ɛ-yɔɔ yɔ kɩ-taa. Ɩsɛɛ Ɛsɔ nɛ e-Fezuu Kiɖeɖeu ɖoŋ. 21Mɩ-ɛsɛ ɛsɛɛnɩ Ɛsɔ sɔɔlʋʋ nɛ ɩwɛɛ ɖaŋʋʋ yɔɔ se ɖa-Kɩpaɣlʋ Yesu Krɩstʋ naɣ mɩ-pʋtɔdɩyɛ nɛ ɛha-mɩ wezuu maatɛŋ.
22Ɩna mbá papʋtʋʋ pa-taa yɔ pa-pʋtɔdɩyɛ: 23ɩya pa-ñʋʋ nɛ ɩlɩzɩ-wɛ miŋ taa. Ɩna ɖɔɖɔ lɛlaa mbá pa-kɩwɛɛkɩm pisi-wɛ yɔ pa-pʋtɔdɩyɛ. Ɛlɛ́, ɩɖɔkɩ mɩ-tɩ nɛ wɛ. Ɩtaatukuni mbʋ́ pɛwɛna yɔ, halɩ pɩkpɛndɩnɩ po-tokonaa maɣmaɣ.
Pasa Ɛsɔ
24-25Pasa weyi ɛpɩzɩɣ ehuuzi mɩ-yɔɔ se ɩtaatɔlɩ kaʋ yɔ. Ɛnʋ yekina se ɩwɛɛ cɩɖɩcɩɖɩ nɛ iwolo ɛ-cɔlɔ e-koboyaɣ taa nɛ mɩ-laŋa hʋlʋmɩ poyi poyi. Ɛnʋ lɛ Ɛsɔ kʋɖʋm koŋ weyi ɛwɛɛ yɔ. Ɛnʋ tɩŋnɩnɩ ɖa-Kɩpaɣlʋ Yesu Krɩstʋ yɔɔ nɛ ɛya ɖa-ñʋʋ. Pasam-ɩ nɛ paɖʋ-ɩ hɩɖɛ. Ɛwɛnɩ ɖoŋ tɩŋa nɛ ɛcɔŋnɩ pɩtɩŋa pʋ-yɔɔ. Ḿbʋ́ pɩɩwɛ ɖooo kiɖe tɛɛ. Pʋwɛɛ ḿbʋ́ lɛɛlɛɛyɔ, pʋwɛɛ ɖɔɖɔ ḿbʋ́ tam! Pɩla ḿbʋ́!
Currently Selected:
Yuudi 1: KABI
Highlight
Share
Copy
Want to have your highlights saved across all your devices? Sign up or sign in