Yakubu 1
1
Sɛtʋ
1Ma Yakubu weyi ɛkɛ Ɛsɔ nɛ Kɩpaɣlʋ Yesu Krɩstʋ pa-tʋmlaɖʋ yɔ, mamaɣnɩ takayaɣ kanɛ Ɛsɔ ñɩma#1.1 Ɛsɔ ñɩma: ye pɛɖɛzɩɣ-tʋ piye piye yɔ, pɛɖɛzɩɣ se: cejewee hiu nɛ naalɛ. mbá mɩ ɩmɩzɩnɩ kedeŋa kpeekpe yɔɔ yɔ. Ɩsɛɛ ɖeu!
Hɔyɛ ɖɔkʋʋ kaɖɛ alɩwaatʋ taa
2Man-taabalaa! Ɩkpaɣ mɩ-tɩ se ɩwɛ laŋhʋlʋmɩyɛ taa siŋŋ alɩwaatʋ ndʋ́ ɩsʋʋ takʋʋ ndɩ ndɩ taa yɔ. 3Mbʋ́ pʋyɔɔ yɔ, ɩtɛm naʋ se yee pɩtakɩɣ-mɩ se pana mi-lidaʋ tɩnaɣ nɛ ɩɖɔkɩ mɩ-tɩ yɔ, piyeki nɛ ɩɖɔkɩ mɩ-hɔ. 4Ɛlɛ́, pʋwɛɛ se mɩ-hɔ ɖɔkʋʋ ḿbʋ́, pɩtɛzɩ kpaʋ ɖoŋ mi-wezuu caɣʋ taa nɛ piyele ɩtɛzɩ wɛnaʋ wɛtʋ kɩbandʋ tɩŋa, nabʋyʋ ɛtaatɛɖɩ-mɩ.
5Yee mɩ-taa nɔɔyʋ ɛfɛyɩnɩ lɔŋ yɔ, ɛsʋlʋmɩ Ɛsɔ, ɛhaɣ-ɩ. Mbʋ́ pʋyɔɔ yɔ, ɛhaɣ paa weyi nɛ laŋɩyɛ kɩbanɖɛ, ɛɛkalɩɣ. 6Ɛlɛ́, pʋwɛɛ se ɛ-sʋlʋmʋʋ taa lɛ, ɛwɛnɩ lidaʋ se Ɛsɔ haɣ-ɩ, pʋtʋʋ ɛtaawɛɛ. Weyi ɛpʋtʋʋ yɔ, ɛwɛ ɛzɩ teŋgu taa lɩm mbʋ́ heɣlim kpakɩɣ nɛ pɩtaŋgatɩɣ-pʋ yɔ. 7Pɩfɛyɩ se ɛcazɩ maɣzʋʋ se Kɩpaɣlʋ haɣ-ɩ nabʋyʋ. 8Mbʋ́ pʋyɔɔ yɔ, ɛfɛyɩnɩ lɩmaɣzɩyɛ kʋɖʋmɖɩyɛ, ɛɖɔŋ taa nɛ wayɩ.
Kʋñɔndʋtʋ nɛ ñɩm pɔ-tɔm
9Krɩstʋ tʋ weyi ɛkɛ kʋñɔndʋ yɔ, ɛkʋndɩ se Ɛsɔ kpazɩ-ɩ. 10Krɩstʋ tʋ weyi ɛkɛ ñɩm tʋ yɔ, ɛ́lɛ́ ɛkʋndɩ ɖɔɖɔ se Ɛsɔ tisi-i. Toovenim lɛ, ɛkɔŋ ɖɛʋ kɛlɛʋ ɛzɩ tɛyɛ ñɩtʋ hɛtʋ yɔ. 11Wɩsɩ kpaɣ nɛ sɩñaɣ ñɩtʋ nɛ tiloo nɛ tɩ-hɛtʋ tɔ, tɩɩtasɩɣ wɛʋ ɖeu. Ḿbʋ́ ɖɔɖɔ pʋwɛnɩ ñɩm tʋ. Ɛ-ñɩm taa sɩm kɔŋ-ɩ tuduu.
Ɛsɔ eewokini nɔɔyʋ kɩwɛɛkɩm taa
12Weyi ɛɖɔkʋʋ ɛ-tɩ takʋʋ taa yɔ, ehiɣ ɛ-tɩ! Mbʋ́ pʋyɔɔ yɔ, ɛtɛŋ wɩlʋʋ ɛ-tɩ ɖɔkʋʋ lɛ, Ɛsɔ cɛlɩ-ɩ ɛ-kɩhɛyʋʋ: ŋ́gʋ́ lɛ wezuu maatɛŋ. Ŋ́gʋ́ ɛɖʋwa se ɛhɛyɩɣ mbá pɔsɔɔlɩ-ɩ yɔ. 13Yee pɩtakɩɣ nɔɔyʋ se pʋsʋzɩ-ɩ kɩwɛɛkɩm taa yɔ, pɩfɛyɩ se ɛtɔ se: «Ɛsɔ takɩɣnɩ-m.» Toovenim lɛ, nabʋyʋ ɛɛtɩɩpɩzɩɣ pɩtakɩ Ɛsɔ se pʋɖʋzɩ-ɩ kɩwɛɛkɩm taa, ɛ-maɣmaɣ ɛɛtakɩɣ nɔɔyʋ se ɛɖʋzɩ-ɩ kɩwɛɛkɩm taa. 14Ɛlɛ́, mbʋ́ ɛyʋ sɔɔlɩ ɛ-maɣmaɣ kpem nɛ pɩkɩlɩ yɔ, ḿbʋ́ hɔŋnɩ-ɩ nɛ puwokini-i takʋʋ taa. 15Ɛwɛɛ nɛ ɛtɛzɩɣ-pʋ sɔɔlʋʋ kpem nɛ pɩkɩlɩɣ yɔ, puwokini-i kɩwɛɛkɩm taa. Pʋbʋ ñɔkɔŋ pɩkɩlɩ-ɩ lɛ, puwoni-i sɩm taa.
16Man-taabalaa kʋsɔɔlaa! Ɩtaacɛtɩ mɩ-tɩ. 17Mbʋ́ pɩtɩŋa pahaɣ ɛyʋ nɛ pʋwɛ ɖeu pɩtɩɩfɛyɩ yɔ, Ɛsɔ weyi ɛwɛ ɛsɔdaa yɔ ɛ-cɔlɔ pɩlɩnaa. Ɛnʋ labɩnɩ wɩsɩ nɛ fenaɣ nɛ tɩɩnzɩ. Ɛɛlɛɣzɩɣ kaʋ: ɛfɛyɩ ɛzɩ kɩlɛmʋʋ yɔ. 18Ɛ-maɣmaɣ ɛsɔɔlɩna nɛ ɛtɩŋnɩ toovenim tɔm yɔɔ nɛ ɛha-ɖʋ wezuu se ɖɩkɛ kajalaɣ ñɩma, mbʋ́ mbʋ́ ɛlaba yɔ pɩ-taa.
Ɛsɔtɔm welesuu nɛ tɩ-yɔɔ ɖɔm tɔm
19Man-taabalaa kʋsɔɔlaa! Ɩtɩlɩ se: pʋwɛɛ se paa weyi ɛɖaŋ kpam nɛ ewelesini lɛlaa. Đɔɖɔ lɛ, ɛtaakpedesi se ɛyɔɔdʋʋ, ɛ-pana ɛtaakpa yem yem. 20Mbʋ́ pʋyɔɔ yɔ, yee ɛyʋ pana ɛkpawa yɔ, ɛɛpɩzɩɣ ɛla mbʋ́ pʋtʋʋzɩ Ɛsɔ ɛsɩndaa yɔ. 21Pʋ-yɔɔ lɛ, iyele mbʋ́ pɩtɩŋa payɩ pipisiɣ ɛyáa yɔ nɛ mbʋ́ pɩtɩŋa payɩ pɩfɛyɩ ɖeu yɔ. Itisi tɔm ndʋ́ Ɛsɔ ɖu mɩ-laŋa taa yɔ nɛ ñamtʋ, mbʋ́ pʋyɔɔ yɔ, tɩpɩzɩɣ tɩya mɩ-ñʋʋ.
22Ɩtaacɛtɩɣ mɩ-tɩ nɛ Ɛsɔtɔm welesuu yem. Ɛlɛ́, pʋwɛɛ se ɩɖɔ tɩ-yɔɔ camɩyɛ. 23Weyi ewelesiɣ-tʋ yem nɛ ɛɛɖɔŋ tɩ-yɔɔ yɔ, ɛwɛ ɛzɩ weyi ɛcɔŋnɩ ɛ-tɩ ñɩnʋʋ taa nɛ ɛnaɣ ɛzɩma mbʋ́ ɛwɛɛ yɔ. 24Ɛtɛm ɛ-tɩ cɔnaʋ nɛ ɛɖɛɛ lɛ, ɛsɔɔ ɛzɩma ɛwɛɛ yɔ kpaagbaa. 25Weyi ɛ́lɛ́ ñatazɩɣ paɣtʋ maɣmaɣ taa siŋŋ yɔ, ehikiɣ ɛ-tɩ mbʋ́ pɩtɩŋa payɩ ɛlakɩ yɔ pɩ-taa. Ńdʋ́ yekina nɛ ɛyʋ wɛɛ ɛ-tɩ yɔɔ. Eewelesiɣ-tʋ yem nɛ ɛsɔɔ-tʋ, ɛlɛ́, ɛɖɔŋ tɩ-yɔɔ siŋŋ.
26Yee nɔɔyʋ ɛmaɣzɩɣ se ɛkɛ Ɛsɔ wayɩ tɩŋɩyʋ nɛ ɛɛɖɔkʋʋ ɛ-tɩ ɛ-yɔɔdaɣ taa nɛ ɛcɛtɩɣ ɛ-tɩ kɩcɛtʋ yɔ, ɛ-Ɛsɔ wayɩ tɩŋʋʋ ɛɛwazɩɣ pʋyʋ. 27Weyi ɛɖɔkʋʋ suluwaa nɛ lelaa pa-kʋñɔmɩŋ taa nɛ ɛɖɔkʋʋ ɛ-tɩ se kedeŋa yɔɔ kɩdɛkɛdɩm ɛtaapisi-i yɔ, ɛnʋ tɩŋɩɣnɩ Caa Ɛsɔ wayɩ ɛzɩ pʋmʋnaʋ yɔ nɛ pɩkɛdɩɣnɩ ɛ́lɛ́.
Currently Selected:
Yakubu 1: KABI
Highlight
Share
Copy
Want to have your highlights saved across all your devices? Sign up or sign in