Efɛɛzɩ 1
1
Sɛtʋ
1Ma Pɔɔlɩ weyi pɩkɛdɩnɩ Ɛsɔ nɛ eyele se mɛnkɛ Krɩstʋ Yesu tiyiyu yɔ, mamaɣnɩ takayaɣ kanɛ. Ɛsɔ ñɩma mbá mɩ ɩwɛ Efɛɛzɩ nɛ ɩtɩŋɩɣ Krɩstʋ Yesu nʋmɔʋ yɔ mamaɣ-kɛ. 2Mɛnsɛ-mɩ: ɖa-Caa Ɛsɔ nɛ Kɩpaɣlʋ Yesu Krɩstʋ palabɩ-mɩ lootiye nɛ pɛhɛzɩ mɩ-laŋa.
Ɛsɔ tɩŋɩɣnɩ Krɩstʋ yɔɔ nɛ ɛyakɩ ɛyáa ñʋŋ ɛzɩ ɛɛɖʋʋ yɔ
3Đɩsa Ɛsɔ! Ɛnʋ lɛ ɖa-Kɩpaɣlʋ Yesu Krɩstʋ Caa. Ɛtɩŋnɩ e-Fezuu Kiɖeɖeu yɔɔ nɛ ɛwazɩ ɖɔ-yɔɔ ɖa nɛ Krɩstʋ ɖɛ-kpɛndʋʋ taa. Wazʋʋ ḿbʋ́, pʋ-yɔɔ ɛtɩŋnaa nɛ ɛha-ɖʋ mbʋ́ pɩtɩŋa payɩ pʋwɛ Fezuu Kiɖeɖeu taa nɛ pɩlɩɩnɩ ɛsɔdaa yɔ. 4Kpɛndʋʋ ḿbʋ́, pɩ-taa Ɛsɔ lɩzɩ-ɖʋ se ɖɩkɛ ɛ-ñɩma nɛ pataana kɩwɛɛkɩm nabʋyʋ ɖɔ-yɔɔ. Ɛɛlɩzɩ-ɖʋ nɛ pʋcɔ ɛla kedeŋa. Ɛsɔɔlɩ-ɖʋ yɔɔ 5ɛɖʋ ɖooo lɔŋ se ɛtɩŋɩɣnɩ Yesu Krɩstʋ yɔɔ nɛ eyele ɖɩkɛ e-piya. Ḿbʋ́ e-liu wɛɛ, pɩkɛdɩnɩ-ɩ. 6Ɛlabɩ ḿbʋ́ se ɖɩsam-ɩ lootiye koboyaɣ ñɩnɖɛ nɖɩ́ ɛtɩŋnɩ ɛ-Pɩyalʋ kʋsɔɔlʋ yɔɔ nɛ ɛlabɩ-ɖʋ yɔ ɖɩ-yɔɔ. 7Đa nɛ ɩ ɖɛ-kpɛndʋʋ taa Ɛsɔ tɩŋnɩ ɛ-calɩm yɔɔ nɛ eholi-ɖʋ kɩdɛkɛdɩm nesi taa nɛ ekpeɣ-ɖʋ ɖa-kɩwɛɛkɩm. Ḿbʋ́ wɩlɩɣna se e-lootiye fɛyɩ ɖaɣʋ. 8Ɛtɩŋnɩ ɛ-lɔŋsɩnɖɛ nɛ ɛ-lɛɣtʋ pɔ-yɔɔ nɛ ɛlabɩ-ɖʋ-ɖɩ pɩtɩɩfɛyɩ. 9Pɩkɛdɩnɩ-ɩ nɛ eyele nɛ ɖɩtɩlɩ mbʋ́ ɛɛɖʋwa se ɛlakɩ nɛ pʋwɛɛ mɛsaɣ tɛɛ yɔ. Ɛ nɛ Krɩstʋ pɛ-kpɛndʋʋ taa ɛɛɖʋwa se ɛlakɩ-pʋ. 10Alɩwaatʋ talɩɣ lɛ, ɛlabɩ-pʋ: ekpeɣliɣ mbʋ́ pɩtɩŋa payɩ pʋwɛ ɛsɔdaa nɛ tataa yɔ wiyaʋ kʋɖʋm koŋ tɛɛ. Ɛnʋ lɛ Krɩstʋ.
11Đa nɛ ɩ ɖɛ-kpɛndʋʋ taa Ɛsɔ ha-ɖʋ pɩtɩŋa payɩ. Pʋ-yɔɔ ɛɛlɩzɩ-ɖʋ ɖooo lɔŋ. Ɛlakɩ pɩtɩŋa payɩ ɛzɩ pɩkɛdɩnaʋ ɛ-maɣmaɣ nɛ ɛɖʋ yɔ 12se ɖɩsa e-koboyaɣ. Mbʋ́ pʋyɔɔ yɔ, ɖa lɛ mbá pata Krɩstʋ liu nɛ pʋcɔ ɛkɔɔ yɔ.
13Mɩ nɛ ɩ mɩ-kpɛndʋʋ taa ɖɔɖɔ ɩnɩ toovenim tɔm. Ńdʋ́ lɛ Laŋhɛzɩyɛ Tɔm ndʋ́ tɩyakɩ mɩ-ñʋʋ yɔ. Pɩ-taa ɖɔɖɔ Ɛsɔ ha-mɩ e-Fezuu Kiɖeɖeu alɩwaatʋ ndʋ́ ɩwɛnɩ lidaʋ ɛ-yɔɔ yɔ. Ŋ́gʋ́ ɛɖʋwa se ɛhaɣ ɛ-ñɩma. Ŋ́gʋ́ lɛ mayaɣ ŋgá ɛñɩɣ mɩ-yɔɔ yɔ. 14Ŋ́gʋ́ wɩlɩɣnɩ ɖɔɖɔ se ɛhaɣ-ɖʋ ñɩm mbʋ́ ɛɛñɔɔzaa se ɛcɛlɩɣ-ɖʋ puwiye nɖɩ́ eholuu mbá ehiɣa se pasa e-koboyaɣ yɔ.
Pɔɔlɩ tendiɣ Ɛsɔ Krɩstʋ ñɩma yɔɔ
15Ḿbʋ́ yebina nɛ kpaɣ kɩyakʋ ŋgʋ́ manɩ lidaʋ ŋgʋ́ ɩwɛnɩ Kɩpaɣlʋ Yesu yɔɔ yɔ nɛ sɔɔlɩm mbʋ́ ɩsɔɔlɩ Ɛsɔ ñɩma tɩŋa yɔ pɔ-tɔm lɛ, 16ma ɖɔɖɔ mɛwɛɛ mansaŋ Ɛsɔ mɩ-yɔɔ alɩwaatʋ ndʋ́ mentendiɣ-i mɩ-yɔɔ yɔ. 17Malakɩ ḿbʋ́ se ɖa-Kɩpaɣlʋ Yesu Krɩstʋ Ɛsɔ, Caa koboyaɣ tʋ ɛha-mɩ lɔŋsɩnɖɛ Fezuu nɛ kɩwɩlɩ-mɩ pɩtɩŋa nɛ ɩtɩlɩ-ɩ. 18Mentendiɣ-i ɖɔɖɔ se ekuli mɩ-lɩmaɣza yɔɔ nɛ ɩtɩlɩ mbʋ́ ɛya-mɩ se ɩɖaŋ kpam yɔ nɛ ɛzɩma mbʋ́ ɛ-ñɩm koboyaɣ ɖewa pɩtɩɩfɛyɩ yɔ. Ḿbʋ́ ɛsɩ ɛ-ñɩma. 19Mentendiɣ-i ɖɔɖɔ se eyele nɛ ɩtɩlɩ ɛzɩma mbʋ́ e-ɖoŋ sɔsɔŋ weyi ɛfɛyɩ tɩnaɣ yɔ, ɛlakɩ mbá ɖa ɖɩwɛnɩ lidaʋ ɛ-yɔɔ yɔ tʋmɩyɛ yɔ. 20Ɛnʋ ɛlabɩnɩ tʋmɩyɛ Krɩstʋ taa nɛ efezini-i sɩɖaa taa nɛ ɛcaɣzɩ-ɩ ɛ-cɔlɔ lone kɩbanɖɛ taa ɛsɔdaa. 21Ḿbʋ́ yebina nɛ ɛkɛ ɛsɔdaa ɖoŋ tɩŋa nɛ kewiyisi tɩŋa nɛ mbʋ́ pɩtɩŋa payɩ pɩpaɣlaa nɛ pɩ-hɩɖɛ sɛɛ kedeŋa yɔɔ cɩnɛ yɔ pʋ-ñʋʋdʋ. Pɩtɛkɛ mbʋ́ pʋwɛ alɩwaatʋ tʋnɛ tɩ-taa yɔ pi-ɖeke pʋ-ñʋʋdʋ ɛkɛnaa, ɛlɛ́, pɩkpɛndɩnɩ mbʋ́ pʋkɔŋ wɛʋ cee wayɩ yɔ. 22Ɛsɔ luzi pɩtɩŋa payɩ ɛ-tɛɛ nɛ eyele nɛ ɛkɛ ɛ-ŋgbɛyɛ taa ñɩma tɩŋa payɩ ñʋʋdʋ pɩtɩŋa pɩ-taa. 23Ńɖɩ́ lɛ e-tomnaɣ. Đɩ-taa Krɩstʋ ɛnʋ ɛwɛɛ pilim: ɛlakɩ ɖɩ-taa ñɩma tɩŋa pɩtɩŋa payɩ. Ɛwɛ kedeŋa kpeekpe yɔɔ nɛ pɩtɩŋa payɩ pʋwɛɛ e-nesi taa.
Currently Selected:
Efɛɛzɩ 1: KABI
Highlight
Share
Copy
Want to have your highlights saved across all your devices? Sign up or sign in