Maatiyee 4
4
Satanɩ takɩ Yesu lakʋ taa
(Mrk 1.9-11; Luk 3.21-22)
1Pʋwayɩ lɛ, Fezuu Kiɖeɖeu tolisi Yesu nɛ kiwoni-i lakʋ taa se Satanɩ ɛtakɩ-ɩ. 2Yesu kɔhɔkɩ nɔɔ kɩyakɩŋ nɩɩnaza. Pʋwayɩ lɛ, ñɔɔsɩ wɩ-ɩ. 3Peeɖe Satanɩ woba ɛ-cɔlɔ nɛ eheyi-i se: «Yee ŋnaɣ se ŋkɛ Ɛsɔ Pɩyalʋ yɔ, heyi pɛɛ anɛ se apɩsɩ tindine nɛ ŋtɔɔ.» 4Yesu cosi-i se: «Pama Ɛsɔtɔm Takayaɣ taa se:
‹Pɩtɛkɛ tɔɔnaɣ ɖeke ɛyʋ cakɩnɩ wezuu.
Ɛlɛ́, pʋwɛɛ se ɛcaɣ-kʋ ɖɔɖɔ nɛ tɔm ndʋ́ tɩtɩŋa payɩ tɩlɩɣnɩ Ɛsɔ nɔɔ taa yɔ.› »
5Yesu cosi-i ḿbʋ́ lɛ, Satanɩ ɛnʋ ɛkpaɣ-ɩ ewoni-i Ɛsɔ tɛtʋ#4.5 Ɛsɔ tɛtʋ: Yeruusalɛm payaɣ mbʋ. Nabɛyɛ yaɣ-tʋ se cɩɖɩcɩɖɩ tɛtʋ. taa nɛ ɛkpazɩ-ɩ ɖooo Ɛsɔ ɖɩɣa ñʋʋ taa 6nɛ eheyi-i se: «Yee ŋkɛ Ɛsɔ Pɩyalʋ yɔ, kʋyɩ ŋmaa tataa. Mbʋ́ pʋyɔɔ yɔ, pama Ɛsɔtɔm Takayaɣ taa se
‹Ɛsɔ heyiɣ e-tiyiyaa se petem-ŋ
pɔ́ɖɔ́kɩ-ŋ pe-nesi taa nɛ
ŋtaatɔlɩ pɩyɛ naɖɩyɛ yɔɔ nɛ pʋkʋ ña-naŋgbaŋaɣ.› »
7Peeɖe Yesu cosi-i se: «Pama ka-taa ɖɔɖɔ se:
‹Taatakɩ ña-Kɩpaɣlʋ Ɛsɔ se ŋna ɛ-wayɩ.› »
8Ecosi ḿbʋ́ lɛ, Satanɩ ɛnʋ ɛtasɩ-ɩ kpaɣʋ nɛ ewoni-i pʋʋ ŋgʋ́ kʋkʋyɩ siŋŋ yɔ kʋ-ñʋʋ taa nɛ ɛwɩlɩ-ɩ kedeŋa yɔɔ ajɛya kpeekpe nɛ a-koboyaɣ 9nɛ eheyi-i se: «Yee ŋluŋ mɛn-tɛɛ nɛ ŋɖʋ-m hɩɖɛ yɔ, mahaɣ-ŋ pɩtɩŋa payɩ.» 10Yesu heyi-i se: «Satanɩ ɖɛɛ mɔ-yɔɔ! Mbʋ́ pʋyɔɔ yɔ, pama Ɛsɔtɔm Takayaɣ taa se:
‹Ña-Kɩpaɣlʋ Ɛsɔ ɖeke koŋ tɛɛ
pʋwɛɛ se ŋluŋ nɛ ŋla ɛ-tʋmɩyɛ.› »
11Peeɖe Satanɩ yebi-i. Pʋwayɩ lɛ, Ɛsɔ tiyiyaa wolo Yesu cɔlɔ nɛ pasɩnɩ-ɩ.
Yesu pazɩ Ɛsɔtɔm susuu Galilee egeetiye taa
(Mrk 1.14-15; Luk 4.14-15)
12Pɩkɛdaa lɛ, Yesu nɩɩ se pakpa Yohanɛɛsɩ nɛ paɖʋ-ɩ salaka. Pʋ-yɔɔ ɛpɩsɩ Galilee egeetiye taa. 13Ɛtalaa lɛ, ɛtacaɣ Nazarɛɛtɩ. Ɛlɛ́, ɛɖɛɛ Kapɛrnayum. Tɛtʋ ńdʋ́, tɩwɛ Galilee teŋgu nɔɔ, Zabulɔɔ nɛ Nɛftalii pɔ-hɔɔlɩŋ taa.
14Pɩlabɩ ḿbʋ́ se pɩla ɛzɩ náyʋ Ezaayii yɔɔdʋʋ yɔ. Ɛyɔɔdaa se:
15«Ɩnaɣ, Zabulɔɔ nɛ Nɛftalii pɔ-hɔɔlɩŋ taa ñɩma mɩ nɛ
mbá mɩ mɩwɛ ɖɔɖɔ teŋgu habɩyɛ nɔɔ nɛ Yɔɔrdaŋ pɔɔ wayɩ yɔ!
Mbá mɩ ɩkɛ Galilee ñɩma nɛ
mbá pɛtɛkɛ Yuda ñɩma yɔ pɛwɛɛ mɩ-tɛ yɔ!
16Ɩnɩɩ camɩyɛ se:
ɩɩwɛ cɩkpɛndʋʋ taa nɛ ɩna ñalɩmɩyɛ sɔsɔɖɛ naɖɩyɛ!
Ɩɩwɛ sɩɖaa ɛjaɖɛ taa nɛ ñalɩmɩyɛ ñalɩ mɩ-yɔɔ.»
17Yesu talɩ Kapɛrnayum lɛ, ɛpazɩ Ɛsɔtɔm susuu nɛ eheyiɣ ɛyáa se: «Ɩlɛɣzɩ wɛtʋ, mbʋ́ pʋyɔɔ yɔ, Ɛsɔ Kewiyaɣ wɩzɩ talʋʋ!»
Yesu ya kajalaɣ tiyiyaa
(Mrk 1.16-20; Luk 5.1-11)
18Nakʋyʋ wiye Yesu ɖɔŋaɣ Galilee teŋgu nɔɔ. Pɩkɛdaa lɛ, ɛna kpakpasɩ kpayaa naalɛ nabɛyɛ, pɔlɔwaɣ piyiŋ. Ḿbá yɔ: Siimɔɔ weyi payaɣ ɖɔɖɔ se Pɩyɛ yɔ nɛ e-neu Andree. 19Ɛna-wɛ ḿbʋ́ lɛ, eheyi-wɛ se: «Ɩkɔɔ ɩtɩŋ-m nɛ manpɩsɩ-mɩ ɛyáa kpayaa ɛzɩ ɩkpaɣʋ kpakpasɩ yɔ.» 20Peeɖe patiyebi pe-piyiŋ nɛ patɩŋ-ɩ. 21Etuzi ɛ-tɩ ɛsɩndaa lɛ, ɛna Yakubu nɛ e-neu Yohanɛɛsɩ, pa nɛ pa-caa Zebedee pɛwɛ pa-kpɩyʋʋ taa nɛ pɔñɔɔzʋʋ pe-piyiŋ. Ɛlɛ́, ɛ́yáa-wɛ 22nɛ patɩyebu pa-caa nɛ kpɩyʋʋ nɛ patɩŋ ɛ-wayɩ.
Yesu wɩlɩɣ ɛyáa Ɛsɔtɔm nɛ ɛwazɩɣ-wɛ pa-kʋdɔmɩŋ
23Yesu cɔwaɣ Galilee egeetiye tɩŋa taa payɩ nɛ eheyiɣ ɛyáa Ɛsɔ Kewiyaɣ Laŋhɛzɩyɛ Tɔm Ɛsɔ ɖɩsɛyɛ ndɩ ndɩ taa nɛ ɛlakɩ nɛ ajamaa ndɩ ndɩ nɛ kʋdɔndɩnaa ndɩ ndɩ patɩŋa pɔ-yɔɔ cɛkɩ. 24Peeɖe ɛ-hɩɖɛ sɛ Siirii ɛjaɖɛ tɩŋa taa. Pʋ-yɔɔ pakpakaɣ mbá pɛwɛnɩ kʋdɔmɩŋ ndɩ ndɩ yɔ patɩŋa nɛ mbá pʋcɔzʋʋ-wɛ yɔ: eliikenaa nɛ abom tɔlɩyaa nɛ kalɩkalasɩ nɛ powokini ɛ-cɔlɔ nɛ ɛlakɩ nɛ pɔ-yɔɔ cɛkɩ. 25Alɩwaatʋ ńdʋ́ʋ́ ɛyáa samaɣ kpɛzɩnɩ hɔɔlɩŋ tɩŋa nɛ patɩŋɩɣ ɛ-wayɩ. Paalɩnɩ Galilee nɛ Tɛtʋ Hiu egeetiye taa nɛ Yeruusalɛm nɛ Yudee nɛ Yɔɔrdaŋ pɔɔ wayɩ.
Currently Selected:
Maatiyee 4: KABI
Highlight
Share
Copy
Want to have your highlights saved across all your devices? Sign up or sign in