2 Pɩyɛ 1
1
Sɛtʋ
1Ma Siimɔɔ Pɩyɛ weyi ɛkɛ Yesu Krɩstʋ tʋmlaɖʋ nɛ e-tiyiyu yɔ, mamaɣnɩ takayaɣ kanɛ. Mamaɣ-kɛ mbá mɩ ɩwɛnɩ lidaʋ ɛ-yɔɔ ɖɔɖɔ ɛzɩ ɖa yɔ. Yesu Krɩstʋ weyi ɛkɛ ɖa-ñʋʋ yaɖʋ nɛ ɖɛ-Ɛsɔ yɔ, ɛtʋʋzaa yɔɔ eyebi se ɩwɛnɩ-kʋ. Lidaʋ ŋ́gʋ́, kɩkɛnɩ ɖatɩŋa payɩ pʋyʋ sɔsɔ.
2Mɛnsɛ-mɩ: Ɛsɔ ɛtɩŋnɩ ɛzɩma mbʋ́ ɩsɩm ɛ nɛ ɖa-Kɩpaɣlʋ Yesu yɔ pʋ-yɔɔ nɛ ɛlabɩ-mɩ lootiye kpem nɛ ɛhɛzɩ mɩ-laŋa siŋŋ.
Krɩstʋ ñɩma ɖɔnɛ tɔm
3Yesu Krɩstʋ wɛnɩ Ɛsɔ ɖoŋ nɛ ɛha-ɖʋ pɩtɩŋa payɩ se ɖɩwɛɛ wezuu nɛ ɖɩla mbʋ́ Ɛsɔ liu wɛɛ yɔ. E-koboyaɣ nɛ ɛzɩma mbʋ́ ɛkɩlɩ pɩtɩŋa yɔ, pɔ-yɔɔ eyebi se ɖɩtɩlɩ Ɛsɔ weyi ɛya-ɖʋ se ɖɩkɛ ɛ-ñɩma yɔ. 4Ḿbʋ́ yebina nɛ ɛlabɩ-ɖʋ kʋjɔŋ sɔsɔŋ weyi ɛɖʋwa se ɛlakɩ-ɖʋ yɔ. Kʋjɔŋ ɩnʋ ɩwɛ ɖeu pɩtɩɩfɛyɩ. Ɛlakɩ-ɖʋ-ɩ se pɩtɩŋnɩ ɩ-yɔɔ nɛ ɩlɩɩ mbʋ́ kedeŋa ñɩma sɔɔlɩ labʋ nɛ pɩwɛɛkɩɣ-wɛ yɔ pi-nesi taa nɛ ɩwɛnɩ wɛtʋ ndʋ́ Ɛsɔ wɛna yɔ. 5Pɩ-maɣmaɣ pʋ-yɔɔ lɛ, ɩñaɣ pana pɩŋŋ nɛ ɩwɛnɩ lidaʋ nɛ ɩwɛɛ siɣsiɣ ɖɔɖɔ mi-wezuu caɣʋ taa. Ɩwɛɛ siɣsiɣ mi-wezuu caɣʋ taa nɛ ɩkpɛlɩkɩ ɖɔɖɔ mbʋ Ɛsɔ liu wɛɛ yɔ. 6Ɩñaɣ pana ɖɔɖɔ nɛ ɩsɔzɩ lɛɣtʋ ńdʋ́ tɩ-yɔɔ tɩ ɖɔkʋʋ, nɛ tɩ ɖɔkʋʋ yɔɔ ɛsɩyɛ sɛʋ nɛ ɛsɩyɛ sɛʋ yɔɔ Ɛsɔ ñam. 7Ɩsɔzɩ Ɛsɔ ñam yɔɔ Krɩstʋ ñɩma sɔɔlʋʋ nɛ Krɩstʋ ñɩma sɔɔlʋʋ yɔɔ ɛyáa kpeekpe sɔɔlʋʋ. 8Toovenim lɛ, wɛtʋ ńdʋ́ʋ́ pʋwɛɛ se ɩwɛna nɛ iyele tɩɖɛɛnɩ ɛsɩndaa. Peeɖe mɩ-tʋmɩyɛ labʋ tɛzɩɣ ɖɛʋ nɛ ɛsɩndaa nɛ ɩtɛzɩ tɩlʋʋ ɖa-Kɩpaɣlʋ Yesu Krɩstʋ camɩyɛ. 9Ɛlɛ́, weyi ɛfɛyɩnɩ-tʋ yɔ, ɛɛnaɣ poliŋ, ɛwɛ ɛzɩ yʋlʋm yɔ. Ɛsɔwa se pañalɩ ɛ-kɩwɛɛkɩm mbʋ́ ɛɛlaba yɔ.
10Taabalaa, pʋ-yɔɔ lɛ, mɩ-tʋmɩyɛ labʋ taa lɛ, mɩ-pana ñaɣʋ ɛwɩlɩ-mɩ se Ɛsɔ ya-mɩ. Mbʋ́ pʋyɔɔ yɔ, yee ɩlakɩ ḿbʋ́ yɔ, ɩɩtɔlʋʋ Ɛsɔ nʋmɔʋ taa kaʋ. 11Pʋ-yɔɔ Ɛsɔ kɔŋ-mɩ haʋ waɖɛ se ɩsʋʋ e-Kewiyaɣ ŋgá kaatɛŋ yɔ ka-taa yem hɛɛɛ. Ŋ́gá lɛ ɖa-Kɩpaɣlʋ Yesu Krɩstʋ weyi ɛkɛ ɖa-ñʋʋ yaɖʋ yɔ ɛ-ñɩŋga.
Ɩɖɔ tɔm ndʋ́ pawɩlɩ-mɩ yɔ tɩ-yɔɔ
12Pʋ-yɔɔ lɛ, paa ɩtɛm sɩm toovenim tɔm nɛ ɩkpa ɖoŋ tɩ-taa yɔ, mɛwɛɣ mɔntɔzʋʋ-mɩ-tʋ ḿbʋ́. 13Manawa se pʋmʋnaa se mɛwɛɛ mɔntɔzʋʋ-mɩ tɔm ńdʋ́ alɩwaatʋ ndʋ́ mɛwɛnɩ mɛ-ɛsɛ yɔ. Malakɩ ḿbʋ́ se ɩtaaɖoo tɩ-yɔɔ. 14Mbʋ́ pʋyɔɔ yɔ, manawa se pɩkazɩ pazɩ yem mankʋyʋʋ kedeŋa yɔɔ cɩnɛ ɛzɩ ɖa-Kɩpaɣlʋ Yesu Krɩstʋ heyuu-m yɔ. 15Pʋ-yɔɔ mañakɩ pana se mawɩlɩ-mɩ mbʋ́ ɩɩla nɛ ɩtɔzʋʋ tɔm ńdʋ́ tɩ-yɔɔ tam ma-wayɩ yɔ.
16Toovenim lɛ, pɩtɛkɛ mʋya wena ɛyáa maɣzɩɣ nɛ pamʋyʋʋ yɔ a-yɔɔ ɖɩtɩŋnaa nɛ ɖɩkɛdɩ-mɩ ɛzɩma mbʋ́ ɖa-Kɩpaɣlʋ Yesu Krɩstʋ kɔŋnɩ ɖoŋ yɔ. Mbʋ́ pʋyɔɔ yɔ, ɖa-maɣmaɣ ɖɩna e-koboyaɣ nɛ ɖɛ-ɛsɛ. 17Đɩɩwɛ alɩwaatʋ ndʋ́ Caa Ɛsɔ ɖʋ-ɩ hɩɖɛ nɛ ɛsam-ɩ yɔ. Ɛsɔ weyi e-koboyaɣ kɩlɩ pɩtɩŋa yɔ, ɛyɔɔdɩ alɩwaatʋ ńdʋ́ se: «Ɛnɛ lɛ man-Pɩyalʋ kʋsɔɔlʋ, maahʋʋ ɛ-yɔɔ kaʋ.» 18Đa-maɣmaɣ ɖɩnɩ nɔɔ ŋ́gá nɛ ɛsɔdaa ḿbʋ́. Mbʋ́ pʋyɔɔ yɔ, ɖa nɛ ɩ ɖɩɩwɛna pʋʋ ŋgʋ́ kʋ-yɔɔ Ɛsɔ yɔɔdɩnɩ-ɩ ḿbʋ́ yɔ.
19Đɔɖɔ lɛ, tɔm ndʋ́ mbá posusuu tɔm ndʋ́ tɩlɩnɩ Ɛsɔ cɔlɔ yɔ pɔyɔɔdaa nɛ tɩkɛ toovenim siŋŋ yɔ, tɩwɛ ɖɔ-cɔlɔ. Pʋwɛ ɖeu se ɩmaɣzɩ tɩ-yɔɔ. Mbʋ́ pʋyɔɔ yɔ, tɩwɛ ɛzɩ kanɖʋ ŋgʋ́ kɩnaɣ cɩkpɛndʋʋ taa nɛ pʋkɔɔ pɩñandɩ yɔ. Alɩwaatʋ ńdʋ́ʋ́ Krɩstʋ weyi ɛwɛ ɛzɩ tɩmbalʋʋ yɔ, ɛñalɩɣ mɩ-laŋa taa. 20Pʋwɛɛ se ɩtɩlɩ camɩyɛ se: nɔɔyʋ fɛyɩ se ɛɖɛzɩɣ tɔm ndʋ́ tɩlɩnɩ Ɛsɔ cɔlɔ nɛ pama-tʋ Ɛsɔtɔm Takayaɣ taa yɔ nɛ ɛ-maɣmaɣ ɛ-lɔŋsɩnɖɛ. 21Mbʋ́ pʋyɔɔ yɔ, pɩtɛkɛ mbá posusuu-tʋ yɔ pamaɣzɩna yem nɛ pɔyɔɔdɩ-tʋ. Ɛlɛ́, Fezuu Kiɖeɖeu sazɩnɩ-wɛ nɛ pɔyɔɔdɩ-tʋ.
Currently Selected:
2 Pɩyɛ 1: KABI
Highlight
Share
Copy
Want to have your highlights saved across all your devices? Sign up or sign in