1 Timootee 1
1
Sɛtʋ
1Ma Pɔɔlɩ, ɖa-ñʋʋ yaɖʋ Ɛsɔ nɛ Krɩstʋ Yesu weyi ɖɩtaɣ liu yɔ pahanɩ-m nɔɔ se mɛnkɛ Krɩstʋ Yesu tiyiyu. 2Timootee, ña mamaɣ takayaɣ kanɛ. Ña lɛ man-pɩɣa siŋŋ, mbʋ́ pʋyɔɔ yɔ, ña ɖɔɖɔ ŋwɛnɩ lidaʋ ɛ-yɔɔ. Mɛnsɛ-ŋ: Caa Ɛsɔ nɛ ɖa-Kɩpaɣlʋ Krɩstʋ Yesu palabɩ-ŋ lootiye nɛ pana ña-pʋtɔdɩyɛ nɛ pɛhɛzɩ ña-laŋɩyɛ.
Ɩkpa mɩ-tɩ nɛ mbá posusuu cɛtɩm tɔm yɔ
3Ɛzɩ maaheyuu-ŋ alɩwaatʋ ndʋ́ mɛnɖɛɣaɣ Masedonii se ŋcaɣ Efɛɛzɩ yɔ, caɣ ḿbʋ́. Peeɖe ŋheyiɣ ɛyáa mbá pɛwɛ peeɖe nɛ pawɩlɩɣ tɔm ndʋ́ tɩwɛ ndɩ nɛ ɖa-ñɩndʋ yɔ se pasɩɩ tɩnaɣ. 4Heyi-wɛ ɖɔɖɔ se pataanɩɩnɩ mʋya nɛ pɔ-cɔzɔnaa hɩla wena afɛyɩ kalʋʋ yɔ pɔ-tɔm. Ḿbʋ́ lɩzɩɣnɩ puuyaɣ. Pɩɩsɩŋnɩ mbʋ́ Ɛsɔ ɖʋwa se ɛlakɩ yɔ se puwobini ɛsɩndaa. Ɛlɛ́, lidaʋ yɔɔ pɩtɩŋɩɣna nɛ puwobini ɛsɩndaa. 5Ŋheyiɣ-wɛ ḿbʋ́ se pɛwɛnɩ sɔɔlɩm mbʋ́ pɩlɩnɩ hɔyɛ kɩbanɖɛ nɛ lɩmaɣza kɩbana nɛ lidaʋ siŋŋ pa-taa yɔ. 6Nabɛyɛ kizi sɔɔlɩm tɔm ńdʋ́ nɛ pɛ-ɛsɛ sɛɛnɩ tɔm ndʋ́ tɩɩwazɩɣ pʋyʋ kpem yɔ tɩ-yɔɔdʋʋ. 7Pacaɣ se pɛkɛ Mooyiizi paɣtʋ wɩlɩyaa sɔsaa. Ɛlɛ́, paanɩɣ tɔm ndʋ́ pa-maɣmaɣ pɔyɔɔdʋʋ yɔ yaa ndʋ́ tɩ-yɔɔ pɛwɛ ɖoŋ yɔ tɩ-tɔbʋʋ.
8Đɩtɛm naʋ se Mooyiizi paɣtʋ wɛ ɖeu. Ɛlɛ́, pʋwɛɛ se palabɩnɩ-tʋ tʋmɩyɛ ɛzɩ pʋpɔzʋʋ yɔ. 9Pʋwɛɛ se ɖɩtɩlɩ se: pɩtɛkɛ mbá palakɩ mbʋ́ pʋtʋʋzaa yɔ paɖʋ paɣtʋ. Ɛlɛ́, mbá paaɖɔŋ tɩ-yɔɔ yɔ nɛ kaañamtʋ tɩnaa nɛ mbá pɛpɛŋɩɣ Ɛsɔ tɛtɛ yɔ nɛ kɩwɛɛkɩm laɖaa nɛ mbá paalakɩ mbʋ́ Ɛsɔ liu wɛɛ yɔ yaa paañaŋ ɛ-ñɩm yɔ nɛ mbá pakʋʋ pa-caanaa yaa po-ɖoonaa yɔ nɛ ɛyáa kʋyaa paɖʋ-tʋ. 10Paɖʋ-tʋ ɖɔɖɔ acɛyɛ laɖaa nɛ abalaa yaa halaa mbá pacaɣ ɖama yɔ nɛ yomaa pɛdɩyaa nɛ cɛtɩyaa nɛ mbá paalakɩ mbʋ́ poɖuwaa se palakɩ yɔ nɛ lakasɩ lɛɛsɩ nzɩ́ sɩtɩŋa payɩ sɩwɛɛkɩɣ tɔm kɩbandʋ ndʋ́ pawɩlɩɣ-ɖʋ yɔ sɩ-laɖaa. 11Tɔm kɩbandʋ ńdʋ́, tɩwɛ Laŋhɛzɩyɛ Tɔm ndʋ́ tɩkɛ koboyaɣ yɔ tɩ-taa. Ɛsɔ weyi ɛwɛ laŋhɛzɩyɛ taa yɔ, ɛɖʋzɩnɩ Laŋhɛzɩyɛ Tɔm ńdʋ́ me-nesi taa.
Pɔɔlɩ saŋ Krɩstʋ
12Mansaŋ ɖa-Kɩpaɣlʋ Krɩstʋ Yesu weyi ɛha-m ɖoŋ se malabɩnɩ ɛ-tʋmɩyɛ yɔ. Mansaŋ-ɩ ɛzɩma mbʋ́ ɛnawa se malakɩ mbʋ́ pʋpɔzʋʋ yɔ nɛ ɛlɩzɩ-m se mɛnkɛ ɛ-tʋmlaɖʋ yɔ pʋ-yɔɔ. 13Ŋgʋ́, maawɛɛkɩ ɛ-hɩɖɛ nɛ mɛwɛɛ ɛ-wayɩ kaŋ kaŋ nɛ mantʋʋ-ɩ ɖɔɖɔ. Ɛlɛ́, ɛna man-pʋtɔdɩyɛ, mbʋ́ pʋyɔɔ yɔ, mantaatɩlɩ mbʋ́ malakaɣ yɔ. Mbʋ́ pʋyɔɔ yɔ, mantaawɛnɩ lidaʋ ɛ-yɔɔ. 14Peeɖe ɖa-Kɩpaɣlʋ Krɩstʋ Yesu ɛnʋ ɛlabɩ-m lootiye siŋŋ nɛ eyele mɛwɛnɩ lidaʋ nɛ sɔɔlɩm mbá palɩnɩ ɛ-cɔlɔ yɔ. 15Tɔm ndʋ́ meheyiɣ-mɩ yɔ, tɩkɛ toovenim. Tɩmʋnaa se ɛyáa tɩŋa payɩ etisi-tʋ nɛ pa-laŋa tɩŋa. Ńdʋ́ lɛ se Krɩstʋ Yesu kɔm kedeŋa yɔɔ se ɛya kɩwɛɛkɩm laɖaa ñʋʋ. Pa-taa lɛ, ma-maɣmaɣ pɩwabɩnaa. 16Pʋ-yɔɔ ɛna man-pʋtɔdɩyɛ se ɛwɩlɩ-mɩ ɛzɩma mbʋ́ ɛɖɔkʋʋ ɛ-hɔyɛ kpem yɔ. Ɛlabɩ ḿbʋ́ se mbá patɩŋa payɩ pɔkɔŋ wɛnaʋ lidaʋ ɛ-yɔɔ nɛ pehiɣ wezuu maatɛŋ yɔ pana. 17Ɛyáa tɩŋa payɩ ɛsam-ɩ nɛ paɖʋ-ɩ hɩɖɛ tam. Mbʋ́ pʋyɔɔ yɔ, ɛnʋ lɛ Wiyaʋ sɔsɔ weyi e-kewiyaɣ tɔɔʋ fɛyɩ tɩnaɣ yɔ, ɛɛsɩkɩ, nɔɔyʋ ɛɛnaɣ-ɩ, e-ɖeke koŋ lɛ Ɛsɔ tam! Pɩla ḿbʋ́!
18Man-pɩɣa Timootee, manɖʋzʋʋ tɔm ndʋ́ mamaɣ takayaɣ kanɛ ka-taa yɔ ñe-nesi taa ɛzɩ paayɔɔdʋʋ tɔm ndʋ́ tɩlɩnɩ Ɛsɔ cɔlɔ yɔ ñɔ-yɔɔ yɔ. Pʋwɛɛ se ŋtɩŋnɩ tɩ-yɔɔ nɛ ŋlʋ lʋbɩyɛ nɖɩ́ ɖɩmʋnaa yɔ 19nɛ ŋwɛnɩ lidaʋ Ɛsɔ yɔɔ ḿbʋ́ nɛ ña-lɩmaɣza caɣ a-ɖeɖe. Nabɛyɛ lɩmaɣza taacaɣ a-ɖeɖe nɛ pa-laŋa wɛɛ kpɩzɩŋ nɛ lidaʋ ŋgʋ́ paawɛna yɔ kɩla asayʋʋ. 20Pa-taa lɛ Imenee nɛ Alɛksandrɩ mbá mankpaɣ manɖʋzɩ Satanɩ nesi taa yɔ. Peeɖe panaɣ se pɩtamʋnɩ se pɛwɛɛkɩ Ɛsɔ hɩɖɛ.
Currently Selected:
1 Timootee 1: KABI
Highlight
Share
Copy
Want to have your highlights saved across all your devices? Sign up or sign in