Sefaniya 1
1
1Mubwaami bwakwe Josiya mwaami wa cishi ca Juda, Josiya mwanaakwe Amoni, Mwaami Lesa wakatuma maswi aya kwiinda muli Sefaniya mwanaakwe Kushi, mwishikulu wakwe Gedaliya. Gedaliya ngowakashala Amaliya mwishikulu wakwe Esekiya.#2 Baami 22:1—23:30; 2 Maka 34:1—35:27
Bushiku bwakoombolosha kwa Mwaami Lesa
2Mwaami Lesa wakaamba ayi,
“Ndaakunyonyoola shintu shoonse sha pacishi ca panshi.
3Ndaakunyonyoola bantu abanyama boonse,
tuyuni twa mwiculu answi sha mulweenge.
Lyalo bamucita shibi balaakuba ntantaala
ndaakumana kulobya bantu pacishi ca panshi.
Nebo neMwaami Lesa ndaamba.”
4“Ndaakufungulula lyaansa lyangu mukupa mulandu bene Jelusalemu
ee, mukupa mulandu bene Juda boonse.
Ndaakunyonyoola boonse beshibakacaaleewo balambila Baali mumusena uyo.
Ncakwiila ndaakunyonyoola abapailishi bakwe Baali boonse
cakwaamba ayi kukabule ubeebaluka tubili.
5Ndaakunyonyoola baabo batanta pashiluli akulambila mimuni ya mwiculu.
Ndaakunyonyoola abaabo balambila akushomesha kunyumfwila ndime neMwaami Lesa,
sombi pesule balumbila muliina lyakwe Moleki lesa wakubeca.
6Ndaakunyonyoola baabo bacileka kukonkela ndime neMwaami Lesa
ee, bantu abo batanyandooli nabi kunjipusha ayi mbalwiite nshila iluleme.”
7Amuumune noonse kunembo lya Mwaami Lesa Shinkusu shoonse
ceebo bushiku bwa Mwaami Lesa buli pafwaafwi.
Mwaami Lesa wabamba bantu ayi babengwe anga ngumulambu,
ncakwiila watamba kale abalwani babo ayi bababeenge.
8Mwaami Lesa waamba ayi,
“Pabushiku bwakubenga mulambu wangu
Nebo neMwaami Lesa ndaakupa mulandu boonse bacinenenene, banaabaami
abaabo boonse bafwete shakufwala sha baswamashi.
9Pabushiku bweenka ubo ndaakunyonyoola boonse
abo balambila anga mbakunsengwe
ee, abo beepa akucaya
kwaamba ayi basushe shintu muŋanda ya mwaami wabo ngobalambila.”
10Mwaami Lesa waamba ayi,
“Pabushiku ubo mulaakunyumfwa kulila kuMwinjililo waNswi mundabala ya Jelusalemu.
Mulaakunyumfwa mibila kucipansha cipya ca ndabala inene iyo
alimwi amulukutu wakuwa kuswa kutulundu.
11Ono mwaakunyumfwabo boobo mwebo nomwikala kunkunamo ya ndabala
mukaliile ceebo beshimakwebo boonse balaakuloba.
12“Paciindi ico ndaakuyandoola muJelusalemu alilampi
akupa mulandu kubaabo balibona kubota
abo bali anga nguwaini wakalila panshi.
Balo balayeeya ayi, ‘Mwaami Lesa taaku nceenga wacita,
kucita cibotu nabi cibiibi.’
13Buboni bwabo bulaakumana kusaalwa.
Maandaabo alaakupwayoolwa.
Ncakwiila balaakuyaka maanda sombi teshi bakekaleemo.
Balaakulima minyansa, sombi teshi bakanweewo waini.”
14Bushiku bunene bwa Mwaami Lesa buli pafwaafwi,
ncakwiila bulaakwisa coonoono.
Kulila pabushiku bwa Mwaami Lesa kulaakubica.
Abalo bashilumamba bacibwene kulwana balaakoolobesha ceebo ca buumba.
15Bushiku ubo bulaakuba bushiku bwa bukali,
bushiku bwa mapensho amakatasho,
bushiku bwakupwayoolwa akunyonyoolwa,
bushiku bwa munshinshe akutabona,
bushiku bwa makumbi akushiya mbi,
16bushiku bwa mapeenga a nkondo akulila kwa bashilumamba
abo beshi bakalwane mandabala acite malinga alimwi amaanda alaamfu.
17Mwaami Lesa waamba ayi,
“Ndaakuleta mapensho kubantu
balaakweenda anga mboofu
mukwiinga bakabisha kuli ndime neMwaami Lesa.
Bulowa bwabo bulaakutilwa anga ngamaanshi
alimwi mituntu yabo ilaakubola mubulongo.”
18Silifa nabi golodi wabo
teshi shikabafuneewo
pabushiku ubo Mwaami Lesa ndyeshi akatondeshe bukali bwakwe.
Mubukali bwakwe butenta anga ngumulilo
cishi ca panshi cilaakunyonyoolwa coonse.
Ulaakucinyonyoola cakufwambaana abantu boonse bekalaamo.
Currently Selected:
Sefaniya 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.