Susana 1
1
Boomboloshi bobilo bakaswa myooyo akubota kwakwe Susana
1Ku Babiloni kwakalinga muntu umwi liina lyakwe nguJowakimu. 2Wakeeba mwanakashi mubotu abuumbi alimwi ulemeka Lesa, liina lyakwe nguSusana, mwanaakwe Ilikiya. 3Bashali bakwe Susana bakalinga baJuda balemeka Lesa, alakwe mwanaabo bakamulela mukukonkela milawo yakwe Mose. 4Jowakimu wakalinga mubile abuumbi, wakalinga kucite muunda wa shisamu palubansa lwakwe. BaJuda bakalinga kukumanina paŋanda yakwe lyoonse, pakwiinga lakwe wakalinga kupukite kwiinda bamwi boonse.
5Mucaaka ceenka ico bacinenenene bobilo bakasalwa ayi babe boomboloshi. Pakwaamba shabaabo bantu Mwaami Lesa wakaamba ayi, “Shibiibi shakaswita kuBabiloni kubacinenenene boomboloshi abo bakalinga kweelete kululamika kabotu bantu bangu.” 6Bacinenenene bobilo abo bakalinga kwikala kuŋanda yakwe Jowakimu lyoonsebo, lyalo muntu uli woonse wakalinga kucite mulandu wakalinga kwisa kuli mbabo.
7Bantu boonse na baya mukulya cakulya camalumwi, Susana lakwe wakalinga kuya kumuunda waibaye. 8Ciindi coonse bacinenenene abo bobilo bakalinga kumubona kaya ceenda mumuunda, lyalo bakaba alukuumbwa. 9Miyeeyo yabo yakalubaana cakwaamba ayi bakacileka kupaila kuli Lesa, tebakalinga kuyeeyawo shakoombolosha shiluleme. 10Boonse bobilo bakalinga kumukumbwa abuumbi mwanakashi uyo, sombi tebakalinga kulwiitana shamiyeeyo yabo. 11Shakacitika bobulya ceebo bakalinga kunyumfwa nsoni kwaamba ayi baambe ayi bakalinga kusuni kucita bulaale anguwe. 12Ciindi cili coonse bakalinga kuyandoola musena wakumucaninaawo.
13Bumwi bushiku bakalwiitana ayi, “Katiya kuŋanda cashika ciindi cakulya shilyo shamalumwi.” 14Ncakwiila bakapasaana, bakacita anga uli woonse utooya kumishaabo. Sombi cakutacelwa umwi aumwi wakaboolela kwisa mukuyandoola Susana, lyalo nkukuma bakumana. Pakwipushana kabotu, womwi womwi wakaamba cakutashisa ayi walinga kuyandoola Susana. Lyalo bakanyumfwana ayi bacane ciindi nceeshi bakamucane kaali eenka.
15Lyalo abo ndibakalinga kulindila ciindi cibotu, Susana wakaya bumwi bushiku kumuunda abanakashi basebenshi bakwe bobilo, mbuli mbubakalinga kucita nshiku shoonse. Nakwapya, bakalinga kusuni kuya mukusamba kweenka uko. 16Temwakalingaawo muntu nabi womwi mumuunda, kukushakobo bacinenenene bobilo balya, bakalinga kuyubite kabasondela Susana. 17Lakwe wakatuma basebenshi bakwe bobilo banakashi balya ayi, “Kamuya mukandetele mafuta atununkila kabotu, mucaale shisasa shamumuunda muno, ayi sambe.” 18Basebenshi, abo bakacita bweenka mbwaakabalwiita. Bakacala shisasa kuswa pasengwe akwiinda kumulyango umwi kuya mukuleta shintu nshaakabatuma. Tabakwe kubabona bacinenenene balya, ceebo bakayuba.
19Banakashi balya ndibakaswobo, bacinenenene balya bakanyamuka, bacicila Susana. 20Bamulwiita ayi, “Mwebo ma, amubone shisasa shamumuunda muno shili calitwe, taaku weenga watubona. Amutucatile, swebo tuli musuni, amutusuminebo camana. 21Mweeleshe kukaka, swebo tutoomupa mulandu wakwaamba ayi mwakalinga a musankwa, nciceeco ncimwabatandila basebenshi banu.” 22Susana wakakalika moyo, akwaamba ayi, “Ino nebo ncite buyani? Na nsumine makani aya, nebo nkucaikwabo. Na nkaake teshi mpuluke mumansaanu. 23Sombi nebo ndakaaka. Ncibotu kuncaya, kwiinda kubishisha Mwaami Lesa.”
24Mpomunyaawo Susana wakoolobesha abuumbi, abalo bacinenenene balya bakatalika koolobesha. 25Womwi pali mbabo wakacalula cisasa camumuunda.
26Basebenshi bakuŋanda ndibakanyumfwa koolobesha kumuunda bakacicila kumulyango umwi, ayi babone cacitika kuli Susana. 27Bacinenenene balya bakasandulula makani abo ayo, basebenshi balya bakaba ansoni, ceebo tabana kumunyumfwilawo kale shamushobo uyu Susana.
Bacinenenene mbobakabekesha Susana
28Macuunsa ayo, ciindi bantu ndibakabungana kuŋanda yakwe Jowakimu ibaye, bacinenenene bobilo balya bakashika, kabapingite akushinisha ayi Susana afwe. 29Pameenso abantu boonse bacinenenene balya bakaamba ayi, “Kamuya mumwiite Susana mwanaakwe Ilikiya, muka Jowakimu.” 30Bakaya mukumwiita, lakwe wakesa abashali bakwe, banabakwe ababye boonse.
31Susana wakalinga kucite ciwa cibotu ceebelwa. 32Ndyakashika pasengwe, wakali fweka cisani kumeenso. Lyalo bantu balya babiibi bakapingula ayi bakushe cisani kumeenso akwe kwaamba ayi bamubone bubotu bwakwe. 33Beshi kamukowa wakwe pantu pomwi abantu boonse ndyebakamubona bakatalika kulila.
34Bacinenenene balya bakeemikana pameenso abantu palya, bakabika maansa pamutwi wakwe Susana. 35Lakwe wakalanga kwiculu akutalika kulila, pakwiinga wakalinga kushoma Lesa. 36Bacinenenene balya bakaamba ayi, “Swebo twakalinga kuya bwendeendabo sweenka mumuunda. Twakabonabo mwanakashi uyu washika abasebenshi bakwe banakashi bobilo, wakacala shisasa shamumuunda, basebenshi balya wababoosha kuŋanda. 37Lyalo musankwa umwi wakalinga kuyubite wakaya kulinguwe, akucita bulaale. 38Swebo katuli kweela muunda uyo pakubona shibiibi shakalinga kucitika twakacicilaako. 39Nabi twakabona ayi bakumbatana twakaalilwa kumucata musankwa uyo. Wakalinga wa nkusu abuumbi, lyalo wakacalula cisasa wacica. 40Twakacatabo mwanakashi uyu akumwiipusha musankwa uyo sombi wakakaka kutulwiita cili coonse. Tutoolumbila kwaamba ayi bukamboni bwesu mbwaancinencine.”
41Pakwiinga bacinenenene balya bakalinga bashikubona akoombolosha bantu, boonse abo bakalinga kubungene bakabashoma, basumina ayi Susana acaikwe.
Danyele mbwaakapulusha Susana
42Lyalo Susana wakaamba akoolobesha aliswi lyapeculu ayi, “Webo oLesa walyoonse, ulishi shabushishi shoonse, ulashibila limwi shintu shoonse kashitana kucitika. 43Ulishi kwaamba ayi bantu abo batoombekesha. Ono ntoofwa, sombi nebo nshinakucitaawo ishi shoonse shibatoombekesha.”
44Mwaami Lesa wakanyumfwa mupailo wakwe uyo. 45Bantu ndibakalinga kumutola mukumucaya Lesa wakabika maano mumusankwa umwi liina lyakwe nguDanyele. 46Lakwe Danyele wakaambilisha aliswi lyapeculu ayi, “Nebo mutambelengeliiko palufu lwa banyina wesu aba.”
47Bantu boonse bamulangilisha akumwiipusha ayi, “Webo, utokwaamba ayi nshi?”
48Alakwe Danyele wakeemikana akwaamba ayi, “Mwebo nobene Isilaeli, sa mutokwaamba ayi banyina wesu aba bene Isilaeli bacaikwe, kamutaana kwipusha calushinisho ico ncibakabisha? 49Amutalike mulandu uyu alimwi, bukamboni mbubapa bantu aba kwaamba paali banyina wesu mbwakubeca.” 50Lyalo bantu bakaboolela kunamilandu, ono bacinenenene bamwi bakaambila Danyele ayi, “Atukale soonse, utulwiite isho shili kumoyo wako, mukwiinga Lesa wakupa maano anga ngumunene. 51Lakwe Danyele wakabalwiita ayi, “Amubapansaanye bantu aba beshikoombolosha, bekale kulaale, nebo ndyeshi mbepushe kabotu.”
52Lyalo bakapansaana, Danyele wakeeta womwi wambabo. Wakamulwiita ayi, “Mwebo nobeene mwakalumbilabo cakubeca, shamuboolela shibiibi shanu shakalekale. 53Mwakalinga koombolosha milandu kwakubula kululika, kubapa mulandu batacite, kwangulula bacite mulandu. Shoonse ishi Mwaami Lesa wakaamba ayi, ‘Utacayi utacite mulandu autaakwe kubisha.’ 54Ono na mwakababona cancinencine aba banyina wesu kabacita cibiibi amusankwa uyo, ino mwakababona kabali mucimfule cacisamunshi?” Lakwe musankwa uyo wakakumbula ayi, “Mucisamu camukuyu.” 55Danyele wakaamba ayi, “Ncakwiila bubeshi bwako bwakuboolela. Munjelo wakwe Lesa wapingula kale ayi bakucaye, batookutimbula pakati.”
56Ndyaakamana kwaamba bakamwaambila ayi aye emikane palubasu, akwaambila bantu ayi balete uyo umwi. Lyalo Danyele wakamwaambila ayi, “Banene mwebo, mutooboneka anga muli bene Kenani anga tamushi baJuda! Kubota kwabanakashi kwamumana maano alimwi bufuule bwamulenga buluya. 57Ndishi ubo mbomwekala mulapeshabo banakashi bene Isilaeli, balo balasuminabo ceebo caboowa. Sombi bama aba bene Juda bamwaalila kwaamba ayi mubishe ambabo. 58Kamwaamba ono, pacimfule cacisamunshi cemwakabacana kabali bobilo?” Lakwe wakakumbula ayi, “Mucisamu camubula.”
59Danyele wakaamba ayi, “Ncakwiila bubeshi bwanu bwamuboolela. Munjelo wakwe Lesa utoomulindilila amupeeni kwaamba ayi amutimbule pakati akunyonyoola mwebo nobilo.”
60Mpomunyaawo bantu boonse bakoolobesha abuumbi, balumba Lesa, Mupulushi wabantu bashoma muli nguwe. 61Lyalo bakasandukila beshikoombolosha balya bobilo, abo Danyele mbakapikisha ceebo cakupa bukamboni bwakubeca. 62Bakabapensha pakukonkela milawo yakwe Mose, alimwi bakabacaya bweenka mbuli kubica kwa myooyo yabo, mbuli mbubakalinga kusuni kucaya mukwababo. Aboobo muntu utakwe kubisha wakapuluka pabushiku bweenka ubo.
63Lyalo Ilikiya abamaandaakwe bakalumbaisha Lesa, alakwe Jowakimu ibaye Susana pantu pomwi ababye boonse bakacita comwi comwi. Pakubona kwaamba ayi Susana wakacanwa taakwe kubisha. 64Ncakwiila kuswa bushiku bweenka ubo kuya kunembo, Danyele wakalinga kulemekwa abuumbi kubantu boonse.
Currently Selected:
Susana 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.