YouVersion Logo
Search Icon

Bene Loma 1

1
1Ndime Paulo musebenshi wakwe Jesu Klistu. Lesa wakansala akunjita kwaamba ayi mbe mutumwi wakushimikila Makani Abotu aswa kuli nguwe. 2Makani Abotu aya akaambilishikwa aLesa kale kale kwiinda mubalaluki bakwe bakulukulu, abo bakalemba Malembo akwe Asalalite. 3Makani Abotu aya alaamba shaMwanaakwe, Mwaami wesu Jesu Klistu, wakashalwa mulunyungu lwakwe Defedi mukushalwa kwabuntu. 4Sombi Mushimu Usalashi wakatondesha cankusu ayi ngoMwanaakwe Lesa kwiinda mukumubusha kuswa kubafu. Uyu nguMwaami wesu Jesu Klistu. 5Kwiinda muli nguwe, Lesa wakampa mulimo unene wa butumwi kwaamba ayi nsebensele Klistu mukulengesha bantu ba mishobo yoonse ayi bamushome akunoomunyumfwila. 6Mwebo nomuli muLoma, muli bamwi ba baabo Lesa mbwaakeeta kuba bakwe Jesu Klistu.
7Aboobo ntoolembela ndimwe noonse nomuli muLoma nomusunikwi aLesa alimwi nomwakeetwa kwaamba ayi mube bantu bakwe. Luse aluumuno shibe amwebo kuswa kuli Lesa Ishiwesu aMwaami Jesu Klistu.
Paulo mbwaakalumba Lesa
8Ntootaanguna kulumba Lesa kwiinda muli Jesu Klistu ceebo ca ndimwe noonse mukwiinga bantu mucishi coonse batoonyumfwa kwaamba ayi mulashoma muli Jesu Klistu. 9Lesa uyo ngoonsebensela amoyo woonse kwiinda mukushimikila Makani Abotu aamba shaMwanaakwe, ngukamboni wangu ayi ico ncentokwaamba ncalushinisho. Ulishi alimwi kwaamba ayi ndamuyeeya lyoonse 10ndimpaila kwaamba ayi na nkuyanda kwakwe Lesa, mpashi inga ndesa mukumufwakashisha. 11Ceebo ndisunishi ayi tukabonane kwaamba ayi nkabaanaanu bubotu ubo Lesa mbwaapa kwiinda muMushimu wakwe alimwi akumuyumyayumya. 12Cinene ncakwaamba ayi nebo amwebo tukayuminishanye mulushomo ndotucite. Nkokwaamba ayi mulaakuyuma kwiinda mulushomo lwangu anebo kwiinda mulushomo lwanu.
13Nobamakwesu, ndisuni kwaamba ayi mwishibe ayi aba mankanda aanji kaanjeya kwisa mukumubona, sombi cakaala. Ndisuni kwaamba ayi bantu bakashome muli Jesu mbuli mbondakacita pabaswamashi bakunsengwe bamwi.#Mili 19:21 14Ceebo ndicite mulimo wakushimikila Makani Abotu kubantu boonse, beeite nabi bateeite, bacite lushibo nabi batacite lushibo. 15Paceebo ceeci ndisuni abuumbi kwisa mukumushimikila Makani Abotu amwebo nomuli muLoma.
Nkusu sha Makani Abotu
16Ndashoma amoyo woonse muMakani Abotu ceebo nshenkusu shakwe Lesa shakupulusha bantu boonse bashoma, kutaanguna baJuda, pesule baswamashi bakunsengwe.#Maako 8:38 17Mukwiinga Makani Abotu aya alasansulula Lesa mbwaalulamika muntu pameenso akwe. Kululamikwa uko kulacitika kulilabo na muntu washoma kuswa kumatalikilo kushikila akumeelelesho. Kweelana abwaamba Malembo akwe Lesa ayi, “Uyo ululamikwa ceebo cakushoma, ulaakuba abuumi.”#Ebulu 2:4
Taaku ululeme pameenso akwe Lesa
18Lesa wayubulula bukali bwakwe kuswa kwiculu pashibiibi bantu nshebacita alimwi akutamulemeka. Bubi bwabo mbobwalengesha bantu bamwi kuteshiba lushinisho lwapali nguwe. 19Lesa ulabapa mulandu ceebo shoonse nshebakonsha kwishiba pali nguwe shilibwenekete patuba. Lesa mwiine ngowakabayubulwita. 20Kuswabo lyeelyo Lesa ndyaakalenga cishi, bantu balakonsha kwishiba cakutatonsha kwaamba ayi nkusu shakwe tasheeli alimwi ayi ndushinisho nguLesa. Bantu balakonsha kwishiba shintu ishi kwiinda musheesho nshaakalenga. Aboobo taaku mpweenga bayubila mulandu. 21Bakalinga kwishi Lesa, sombi tabakwe kumulemeka mbwaaelete nabibo kumulumbaisha ceebo bakalinga kuyeeyabo shitacite ncito alimwi mitwi yabo iliswitebo munshinshe.#Efe 4:17-18 22Balo bakalinga kwaamba ayi, “Tuli basongo,” anu mbaluyabo. 23Bakacileka kulambila Lesa utafwi, balalambila shibumbwabumbwa shiboneka anga mbantu bafwa nabi bayuni, banyama ba muluundu, ntaale ashintu shimwi sha mushobo uyo.#Duto 4:16-18
24Paceebo ceeci Lesa wakabaleka kwaamba ayi bacite shintu shibiibi isho shisuni myoyo yabo, aboobo balacita shintu shilensha nsoni beene abeene kumibili yabo. 25Balakaka kushoma shancinencine shapali Les, sombi balashoma shabubeshi. Balalambila akusebensela shintu Lesa nshaakalenga kwiinda kulemeka wooyo Mulengi ngotweelete kulumbaisha lyoonse. Ameni.
26Nceceeco Lesa ncaakabalekela kucita shintu shilensha nsoni shisuni myoyo yabo. Abalo banakashi bakashiya mulimo wa bwanakashi akukonkela mulimo ulensha nsoni. 27Mbweeke ubo abalo basankwa bakacileka kukumana abanakashi akutalika kukumana abasankwanyinaabo. Bakacitana shintu shilensha nsoni. Paceebo ceeco Lesa ulaakubapa mulandu pabubi bwabo.
28Ono ceebo bakakaka kunyumfwila Lesa, wakabalekabo amiyeeyo yabo ibiibi kwaamba ayi bacite shintu shilensha nsoni. 29Myoyo yabo iliswitebo shibiibi sha mishobo yoonse mbuli bubi, balisunibo shoonse kashili shinebo, balacitilana shintu shibiibi, munyono, bucayi, inkondo, bubeshi amiyeeyo ibiibi kubabyaabo alimwi mbafuishi. 30Mbampele, mbeshikusuula Lesa, mbeshimucobwe, mbeshikulisumpula akulinyumfwa. Lyoonse balayeeyabo nshila shimwi shakucitilamo shibiibi alimwi tabalemeki bashali babo. 31Mbantu bataliseendi, tabashomeki, tabacite nkumbu alimwi aluse. 32Balishi mulawo wakwe Lesa wakwaamba ayi bantu bacita shintu sha mushobo uyu balyeelete kufwa. Nakubi boobo tabacitibo shintu ishi, sombi balalumbaisha abaabo bashicita.

Currently Selected:

Bene Loma 1: BBBLI

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy