Naamu 1
1
1Aya ngamaswi akaswa kuMwaami Lesa kwaamba pandabala ya Ninife. Ili ndibuku lya cili anga nciloto cakabona Naamu mwine Ekiloshi.#Isa 10:5-34; 14:24-27; Sefa 2:13-15
Mwaami Lesa mbwaakakalalila bene Ninife
2Lesa ngushibusuba alimwi ngushikuboosha cishole.
Mwaami Lesa ulaboosha cishole alimwi ngumukali abuumbi.
Mwaami Lesa ulaboosha cishole kubaabo bamupatite
alimwi ulatolelela kukalala kubalwani bakwe.
3Mwaami Lesa taakalali bwaangu alimwi ngushinkusu shiinji.
Taalangibo muntu wabisha kutamupa mulandu.
Uleendela mukapupuulwa amucipuupu.
Makumbi alaba ndolusuko lwa myeendo yakwe.
4Ulakalalila lweenge alwalo lulayuma,
ee, ulalengesha milonga yoonse kuyuma.
Myuunda ya kuBashani aya kuKamelo ilayuma
aalo maluba a kuLebanoni alanyana.
5Tulundu tunene tulatenkaana kunembo lyakwe
atwalo tulundu tuniini tulasunguluka.
Cishi ca panshi cilatenkaana kunembo lyakwe,
ncakwiila cishi coonse cilatenkaana aboonse abo bekalaamo.
6Ngani weenga weemikana kubukali bwakwe?
Ngani ukonsha kwiimikana kubukali buyoosha?
Bukali bwakwe bulanyaka anga ngumulilo.
Mabwe oonse alapwayooka kunembo lyakwe.
7Mwaami Lesa ngumubotu.
Uli anga nciyubilo mushiindi sha mapensho.
Ulafuna baabo bacinkite manungo muli nguwe.
8Sombi ulaakunyonyoola balwani bakwe
anga ngamaanshi asefuka acite mukuuku unene.
Ulaakutandaanishila baabo bamupatite mumunshinshe.
9Shintu shoonse balwani abo nshebapinga kucita kuMwaami Lesa,
ulaakushilengesha kumaninina.
Ncakwiila Mwaami Lesa taabooshi cishole lyobilo.
10Balaakucatwa mumyuumfwa
akukolwa waini wabo.
Balaakutentwabo anga mbwiisu buyumu.
11Kuswa kuli ndiwe ondabala ya Ninife
mulaakuswa wooyo upinga kucita shibiibi kuMwaami Lesa
akupanda maano mukucita bubi.
12Mwaami Lesa waamba ayi,
“Nakubi kwaamba ayi bene Asilya balicite nkusu alimwi mbaanji,
balaakunyonyoolwa akumaninabo limwi.
Mwebo nobantu bangu bene Juda, nabi ndakamupensha
teshi nkamupensheewo tubili, sobwe.
13Ono bulya ntootyola lijoko lya bweendeleshi bwabo kuswa munshingo shanu
akusutoola ncetani shimwaangite shoonse.”
14Mwebo nobene Asilya,
Mwaami Lesa wapa mulasho pali ndimwe ayi,
“Teshi mukabeewo abamulunyungu
abo beshi bakanokwiitwa meena anu.
Ndaakunyonyoola shikoshanyo shakubesa ashibumbwabumbwa isho shili mumaanda akulambililaamo balesa banu.
Ndaakubamba cuumbwe canu
mukwiinga tamweelete kunoocili boomi.”
15Amubone, shinkombe utoosa kucilingana tulundu
ee, shinkombe utooleta makani abotu,
utokwaambilisha shaluumuno!
Mwebo nobene Juda kamuba anshiiku shanu shakusekelela
akucita kweelana ambomwakashomesha cakulumbila.
Bamucita shibi teshi bakamulwaneewo tubili
ceebo balaakunyonyoolwa cakumaninina.#Isa 52:7
Currently Selected:
Naamu 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.