Maako 1
1
Kushimikila kwakwe Joni Mubombeki
(Mate 3:1-12; Luka 3:1-18; Joni 1:19-28)
1Aya ngomatalikilo a Makani Abotu aamba pali Jesu Klistu, Mwanaakwe Lesa. 2Cakatalika mbuli mbwaakalemba Isaya mulaluki mukulukulu ayi,
“Lesa wakaamba ayi, ‘Ndaakutuma muntu wangu kunembo lyako
eshi akakubambile nshila.’#Mala 3:1
3Muntu umwi utokoolobesha muluyanga ayi,
‘Amubambe nshila ya Mwaami.
Amumululikile nshila.’ ”#Isa 40:3
4Paceebo ceeco, Joni wakesa kulubasu lwa luyanga kaabombeka akushimikila ayi, “Amusanduke kuswa kushibiibi shanu, mubombekwe nkwaamba ayi Lesa amulekelele shibiibi shanu.” 5Bantu baanji ba mucishi ca Judeya amundabala inene ya Jelusalemu, bakaya kuli Joni mukunyumfwa. Ndibakamana kulyaambilila shibiibi shabo, wakababombeka muMulonga wa Joodani.
6Joni wakalinga kufwala shakufwala shakapangwa abooya bwa ngamela alimwi alaamba wacipaya mubukome. Wakalinga kulyabo nsoshi abuuci.#2 Baami 1:8 7Wakabaambila bantu ayi, “Uyo utoosa pesule lyangu uleendaawo nkusu pali ndime. Nsheeleteewo akukotama kwaangulula nsapato shakwe. 8Nebo ntoomubombeka amaanshi, sombi lakwe ulaakumubombeka aMushimu Usalashi.”
Kubombekwa akusunkwa kwakwe Jesu
(Mate 3:13—4:11; Luka 3:21-22; 4:1-13)
9Kakutana kwiinda aciindi cilaamfu, Jesu wakesa kuswa kuNasaleti mucishi ca Galili. Lyalo Joni wakamubombeka muMulonga wa Joodani. 10Ndyaakaswabo mumaanshi, wakabona kwiculu kwacaluka alimwi aMushimu Usalashi kauseluka pali nguwe anga nimpolobe. 11Mpomunyaawo liswi lyakanyumfwika kuswa kwiculu ayi, “Ndiwe Mwanaangu ngoonsuni abuumbi, pali ndiwe ndikondetwe abuumbi.”#Mata 22:2; Kulu 2:7; Isa 42:1; Mate 3:17; 12:18; Maako 9:7; Luka 3:22
12Paciindi ceenka ico, Mushimu Usalashi wakamutola muluyanga 13umo mwaakekala nshiku makumi one kaasunkwa aSatana. Wakekala muluyanga mwikala banyama, lyalo baanjelo bakamutabatila.
Jesu mbwaakeeta bashikwiiya bataanshi
(Mate 4:12-22; Luka 4:14-15; 5:1-11)
14Joni ndibakamubika muntolongo, Jesu wakaya kuGalili kaashimikila Makani Abotu akwe Lesa. 15Wakaamba ayi, “Ciindi ceelete cashikila. Bweene bwakwe Lesa buli pafwaafwi. Amusanduke kuswa kushibiibi shanu, mushome Makani Abotu!”#Mate 7:28-29
16Jesu ndyaakalinga kwiinda muloombe lwa Lweenge lwa Galili, wakabona Simoni alimwi aAndulu mwanike wakwe kabawaala koombe mumaanshi ceebo bakalinga beshikucaya nswi. 17Jesu wakabaambila ayi, “Amunkonkele, ndaakumupa nkusu shakuleta bantu kuli ndime bweenka mbomwalinga kucata nswi.” 18Amanebo kwaamba boobo, bakashiya toombe twabo akumukonkela.
19Ndyaakeendakobo paniini, wakabona Jemusi aJoni mwanike wakwe, bana bakwe Sebedi, kabali mubwaato kababamba toombe twabo. 20Jesu ndyaakababonabo, wakabeeta. Mukufwambaana abalo bakashiya ishiwabo Sebedi abasebenshi mubwaato akumukonkela.
Jesu mbwaakakusha shikaswa mumusankwa wa kuKapenaumu
(Luka 4:31-37)
21Jesu abashikwiiya bakwe bakashika mundabala ya Kapenaumu. Ndibwakashika bushiku bwakookesha bwa Cibelu, Jesu wakaya mucoonde ca baJuda akutalika kwiisha. 22Boonse bakakankamana abuumbi ndibakanyumfwa kwiisha kwakwe, mukwiinga wakeeisha ankusu, kuteelana abafundishi ba Milawo.
23Kaaciisha mucoonde kwakaboneka muntu wakalinga kucite shikaswa wakatama ayi, 24“Anu twamucitanshi mwebo nobaJesu ba kuNasaleti? Sa mwesa mukutunyonyoola? Ndimwishi, ndimwe wooyo Usalalite uswa kuli Lesa!”
25Lyalo Jesu wakakalalila shikaswa ayi, “Umuna, swa muli nguwe!”
26Shikaswa wakamunyukumuna abuumbi, wakatama cankusu akuswaamo. 27Bantu boonse bakakankamana akutalika kuliipusha ayi, “Anu nciinshi ici? Anu nkwiisha kupya kuli buyani uku? Uyu muntu ulicite nkusu shakwaambilabo liswi bashikaswa abalo bamunyumfwila!”
28Mpomunyaawo impuwo yakwiisha kwakwe yakanyumfwika mucishi coonse ca Galili.
Jesu mbwaakashilika bantu baanji
(Mate 8:14-17; Luka 4:38-41)
29Ndibakaswabo mucoonde ca baJuda, Jesu pantu pomwi aJemusi aJoni, bakalulamabo kumishaabo Simoni aAndulu. 30Bapongoshi bakwe Simoni banakashi bakalinga balwashi cimpwita, kabaletebo mubulo. Ndyaakashikabo Jesu, bakalingaawo bakamulwiita kuciswa kwa bapongoshi bakwe Simoni. 31Mpomunyaawo wakaya muŋanda mwakalinga balwashi, wabacata palyaansa akubabusha. Lyalo cimpwita cakamana, bakatalika kutabataba akubapa shakulya.
32Ciindi camuntungulya, bantu bakaleta balwashi baanji abaabo bakalinga kucite bashikaswa kuli Jesu. 33Bantu baanji ba mundabala mulya bakesa mukubungana paŋanda. 34Jesu wakashilika bantu baanji bakalinga kuciswa malwashi apusenepusene alimwi akukusha bashikaswa baanji. Wakakasha bashikaswa abo kwaamba mukwiinga balo bakalinga kumwiishi ayi nguMwanaakwe Lesa.
Jesu mbwaakashimikila muGalili
(Luka 4:42-44)
35Bushiku bwakaboolaawo kumuyamaca, Jesu wakabuka akuswa muŋanda. Lyalo wakaswa mundabala akuya kumusena kwatakalinga kwikala bantu uko nkwaakaya mukupailila. 36Simoni abaabo babye mbwaakalingaabo bakaya cilangoola Jesu. 37Ndibakamucana, bakaamba ayi, “Bantu boonse batoomuyandoola.”
38Jesu wakakumbula ayi, “Tulyeelete kuya kumishi imwi akwalo nje nkashimikile mukwiinga ncendakeshita.”
39Aboobo wakeenda mucishi coonse ca Galili, kaaya cishimikila mushoonde sha baJuda akukusha bashikaswa.#Mate 4:23; 9:35
Jesu mbwaakashilika musankwa wakalinga kuciswa manata
(Mate 8:1-4; Luka 5:12-16)
40Umwi musankwa mulwashi manata wakesa kuli Jesu, wafukama akusenga ayi, “Na kamusuni, inga mwanshilika.”
41Ndishakamucata nkumbu Jesu, wakafungulula lyaansa lyakwe akumucata kaamba ayi, “Ee ndisuni, ba kabotu!” 42Mpomunyaawo manata akamana, wakaba kabotu alimwi. 43Jesu wakamwaambila ayi anooya alimwi wakamukonkomesha ayi, 44“Nyumfwa, utalwiiti muntu nabi womwi pacikani ici. Sombi ululamebo kuya kumupailishi, ukalitondeshe kuli nguwe ayi waba kabotu. Koya upe cipo kweelana abwakaamba Mose kwaamba ayi bantu bashome ayi waba kabotu.”#Bene Lefi 14:1-32
45Ono lakwe uyo wakaba kabotu wakalingooyabo cishimika kubantu boonse. Ncakwiila kwaamba kwakwe kwakalenga ayi Jesu atalike kweenda cakuyubayuba mundabala alimwi wakalinga kwikala kulaale amishi. Nakubi boobo bantu bakalinga kuya kuli nguwe kuswa kumisena ipusenepusene.
Currently Selected:
Maako 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.