YouVersion Logo
Search Icon

Jelemiya2 1

1
Nkalata yakwe Jelemiya
1Jelemiya wakatumisha nkalata kubantu abo bakalinga pafwaafwi kutoolwa busha amwaami wakuBabiloni. Munkalata iyi mwakalinga makani ayo Lesa ngakapingwita Jelemiya ayi alwiite bantu. Iyi nkalata yakalinga bobulya,
2“Mwebo mwakabishisha Lesa. Paceebo ceeco Nebukadinesa, mwaami wakuBabiloni, ulipafwaafwi kumutola busha kuyaanu kuBabiloni. Lyalo namukashiike kuBabiloni uko, mulakukala uko kweenka myaaka iinji kushikila mukabe amashalane osanwe aobilo. Lyalo pesule ndakumuboosha muluumuno kumishanu. 3Lyalo kuBabiloni mulaakubona tulesa twakapangwa asilifa, golodi a shisamu. Tulesa uto balatunyamuna pashifushi, alimwi tulaloondesha batashomi. 4Aboobo mukacenjele. Mutakaloondi batashomi abo, mutakaloondi tulesa twabo uto, 5mwakubona bantu abo kabalambila mumakoto makoto. Sombi mumyooyo yanu mukanokwaamba ayi, ‘Omwaami Lesa, ndiwe weenka ngotweelete kulambila.’ 6Mukwiinga anjelo wakwe Lesa uli amwebo, alimwi ulaakunoomulama.”
Tulesa tatucite ncito
7Tulesa uto twakapangwa a mubeseshi wakatunanika silifa a golodi. Sombi ntubeshi alimwi tatwaambi. 8Bantu balabwesa golodi akupanga mushini uyo ngobafwalika pamitwi ya tulesa uto, bweenka mbobacita pakupangila mwanakashi usuni shamushobo uyu. 9Cimwi ciindi nabi bapailishi abo balaya mukubwesa mubushishi golodi asilifa kuswa patulesa twabo kuya mukuula shebasuni. 10Paciindi cimwi golodi asilifa iyo balaabilako banakashi bafuule bakuŋanda ya tulesa twabo. Tulesa tweenka utu tulapangwa a golodi, silifa nabi cisamu, akutufwalika anga mbantu, alimwi tatukoonshi kukasha ndalabwa amuswa kutulya. 11Na batufwalika minganjo ifubelafubela, balapukuta ciwa cantuto lusuko luunji ulo lwakatuwita. 12Tulesa tulaba ankoli mumaansa antuto anga mbaleli bacishi, sombi taikoshi kucaya muntu utootunyashilisha. 13Tumwi tulaba a mupeeni nabi keembe mulyaansa lya lulyo, sombi tatukoonshi kulifuna kuswa kubalwani nabi kubeepi. 14Shenkeeshi shilabonesha ayi tulesa utu teeshi twancinencine. Aboobo mutanotuloonda.
15Bweenka mbuli mbale nayapwaika, tecite ncito, mboobulya mbutubete tulesa twabo, nabatwikalika muŋanda shantuto. 16Mumeenso antuto mulesulabo lusuko ulo ndobatupampa abo benjilaamo. 17Palya balamucalila shisasa muntu wanyansha mwaami, lyalo ulyeelete kucaikwa. Bapailishi balacita ubo, balacinjilisha ŋanda shatulesa ashisasa shiyumu, maloko ashipingisho, kuloondesha beepi. 18Balanyasha nyale shiinji kwiinda shili mumaandaabo, sombi tulesa uto tatubooniwo nyale nabi yomwi. 19Tulekala anga ndinciko lya ŋanda ilyo bantu ndyebaamba ayi njamuyayaya. Muswa ulaswa mubulongo kuya mukutulya pantu pomwi a shakufwala shantuto shoonse, cakutanyufwaako. 20Kumeenso kulashiya mbii muceebo cabwiishi bwa ŋanda shantuto. 21Tumpafwa, tumimbya alimwi atuyuni tumwi tulakunoosokobola pamibili, cimwi ciindi pamitwi yabo. Bamwanamanga kabakalaawo. 22Ici ncecitondesho cakwaamba ayi tulesa teeshi Lesa wancinencine, nkokwaamba ayi mutanotuloondi.
23Golodi iyo njebatufwalika kwaamba ayi tunooboneka kabotu, muntu nawabula kutupampa lusuko tulesa uto inga katutaboneki kumwekamweka. Nabi ndibakalinga kutubumba tetwakalinga kunyumfwiteeko. 24Ee! Tulesa uto twakoolwa amutengo wapeculu sombi muli ntuto tamu buumi. 25Paceebo cakwaamba ayi tatucikoonshi kweenda, balatunyamunabo pashifushi, citondesho cakwaamba ayi taaku mbotubete. Nabi bantu batulambila tulabalensha nsoni, pakwiinga natwawa paanshi bantu balesa mukutwiimika. 26Naabatwiimika tatweendi tweenka na umwi watukonkomeka tatukoonshi kulyoolola. Ncakwiila kutupa shipo cilyeeleneebo akupa muntu mufu. 27Shipo sheebapa tulesa utu bapailishi balaya mukuulisha, maali babwesa kuya mukuula shakulya shabo. Cimwi ciindi bamakaabo bapailishi abo balabwesa shipo shamwiinyo, kutapawo bantu bapengete abatacite. 28Abalo banakashi bali kuciindi cabo, abatumbu, balabasuminisha kucata milambu. Ishi shoonse shilatondesha ayi teeshi tulesa, ono mutanootulambila.
29Ino balaatwiitilanshi ayi tulesa, nabanakashi kabakonsha kupa milambu kutuntu twakapangwa agolodi asilifa ashisamu. 30Muŋanda yatulesa uto bapailishi balekala paanshi aminganjo ikwamukite kabacesete misusu alimwi andesu, kumutwi kabatafweteewo cintu. 31Baloolobesha akulila pameenso atulesa twabo bweenka mbuli mbobacita pashililo. 32Bapailishi balabwesa shakufwala shatulesa uto ayi bafwalike bamakaabo abanababo. 33Nabi batucitila shibiibi nabi shibotu tatuboosheshi shebatucitila. Tatucite nkusu shakubika nabi shakukushaawo mwaami. 34Comwicomwi tatukoonshi kucana buboni nabi kupa maali. Na umwi washomesha kucita cimwi cintu, wabula kucicita tulesa uto taatukoonshi kumukakatisha. 35Tatukoonshi kubushamuntu kulufu, nabi kufuna bantu batacite nkusu kubantu bacite nkusu. 36Tatukoonshi kubonesha muntu moofu nabi kucafwa muntu upengete. 37Tatunyumfwili nkumbu kubamukalubinje nabi kucitila shibotu mwanawanshiwa. 38Utu tuntu twakapangwa ashisamu, twakapentwa agolodi asilifa tuli anga ngamabwe akutulundu, alimwi abo batulambila balaakuba ansoni. 39Ino muntu inga watuyeeyela buyani nabi kutwaamba ayi tulesa?
Kupaila tulesa mbuluya
40Nabi bantu bene Kalideya tabatulemeki tulesa twabo uto. Na bacana muntu utaambi, balayaakwe kukalesa keetwa ayi Beli, alimwi balakasenga ayi kabaambishe anga kalo kalanyumfwa. 41Sombi balo tabakoonshi kwishiba nabi comwi cintu alimwi tabasuni kutushiya tulesa twabo uto, pakwiinga tabacite maano. 42Palya banakashi balaanga myaando mushibuno shabo, akwikala mushi a nshila, batenta tununkila kabotu uto twiitwa ayi Lubani. 43Na umwi watolwa a musankwa utookwiinda, akoona akwe, uloobya mubye ayi teeshi mubotu mbuli nguwe. 44Shoonse isho bantu abo sheebacitila tulesa shabubeshi. Ino umwi inga wasumina buyani ayi utu ntulesa?
45Tulesa uto twakapangwa ababeseshi bashisamu abeshi kufula golodi, ono tatukoonshi kuba mumwi sombi bweenka mbubakatupanga abo beshikupanga. 46Sombi cakutatosha abo bantu bakatupanga teeshi bakekaale inshiku shiinji pacishi capaanshi, ono tuntu ntobapanga inga twaba buyani tulesa? 47Balashiilabo babyaabo tuntu twabubeshi tulensha nsoni. 48Na yabuka nkondo nabi shiyoosha shimwi, bapailishi balalwiitana kwakuya mukuyuba atulesa uto, pakucana kwaamba ayi tatukoonshi kulifuna paciindi ca nkondo a camapesho amwi? 49Ono cilabaalila buyani kwishiba ayi teeshi tulesa uto, pakucana kwaamba ayi tatukoonshi kulifuna paciindi ca nkondo a camapesho amwi. 50Tulesa tweenka uto, twakabeswa ashisamu, akunanikwa silifa agolodi, tulakushibikwa kabotu ayi twakubeca. Bantu bamishobo yoonse abamaami balakwishiba ayi teshi tulesa, sombi twakapangwa a bantu aboobo tatucite nkusu. 51Sankwacili womwi utakwe kwishiba ayi tatushi tulesa uto? 52Tulesa uto tweenka tatukoonshi kubika muntu pabwaami, alimwi tatukoonshi kuloshesha bantu mfula. 53Tatukoonshi kucita milawo yantuto nabakupulusha mumapesho, ceebo tatucite nkusu. Tuli anga mbacikwaangala batokuuluka mwiculu. 54Mulilo na wanyaka muŋanda ya ntuto, bapailishi balacica, akutupulusha, lyalo tulesa twashisamu uto, twakapentwa silifa agolodi, tulapya anga ngamasondo. 55Tatukoonshi kulwana kubamaami nabi balwani bamwi. 56Ino inga twasumina buyani nabi kuyeeya ayi utu tulesa?
57Tulesa tweenka uto tatukoonshi kulifuna kubeepi abeshikusaala. 58Tulesa twakubesa, twakananikwa golodi a silifa, bantu bacite nkusu balakutunyaya golodi asilifa, pantu pomwi ashakufwala shantuto akucicaasho, uto tulesa tatukoonshi kulifuna. 59Kuba mwaami, utaloondi, nabi kuba anga ninongo ya muŋanda isebenseshekwa milimo isuni mwiine ŋanda, ncibotu kwiinda kuba atulesa twakubeca. Nabi kuba anga cisasa cakufuna shintu sha muŋanda nabi lincinko lya ŋanda ya mwaami, ncibotu kwiinda kuba atulesa twakubeca.
60Lisuba, mweenshi anyenyeenshi isho shibala shilicite ncito yashisho alimwi shilanyumfwila Lesa. 61Bweenka ubo kubyata kwamfula kulabonesha koonse koonse, awalo muuwo ulapuupa pacishi coonse capaanshi. 62Lesa na wapingula ayi makumbi endeende pacishi coonse capaanshi, aleenda cancinencine. Mulilo uswa kwiculu akutenta tulundu amisansa, ulacita isho nshapingula. 63Sombi tulesa uto tatweelene ashintu sheenkaisho mboshiboneka nabi kuba ankusu. 64Sombi swebo tulayeeya akwaamba ayi ntulesa, muceebo tatukoonshi koombolosha milandu, alimwi inga tatukoonshi kucitila bantu shibotu. 65Nkokwaamba ayi, mweshiiba ayi tatushi tulesa, mutanotuloondi.
66Tatukoonshi kushingana bamaami nabi kubapa coolwe. 67Tatukoonshi kubonesha mishobo ya bantu shitondesho shakwiculu nabi kubala anga ndisuba alimwi inga tatumuniki anga ngumweenshi. 68Banyama balatwiindawo tulesa uto, mukwiinga balo banyama balalifuna akucica. 69Aboobo taku bukamboni bwinebwine bwakwaamba ayi ntulesa, nkokwaamba ayi mutanotuloondi.
70Tulesa uto twakubesa, twakunanika golodi asilifa tuli anga ncikoshanyo cakuloondesha tuyuni mumyuunda, taku ancetufuna. 71Tulesa tweenka utu tulakoshanya acisamu camyumfwa mumuunda uyo tuyuni motushikila, tulakoshanya alimwi amutunta wamuntu uyo ngobawaala mumunshinshe. 72Kubala kwashakufwala shankako shifubelafubela nshibotu shilabonesha ayi teshi kalesa. Pakumanisha uto tweenka tulaakufwekeleshekwa, alimwi cishi coonse ca paanshi cilaakuba ansoni. 73Paceebo ceeci muntu ululeme, uyo utacite tulesa twamushobo uyu uli kabotu abuumbi. Lakwe uyo bantu teshi bakamucitileewo nsoni.

Currently Selected:

Jelemiya2 1: BBBLI

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy