Jobo 1
1
Satana mbwaakasunka Jobo
1Mucishi ca Usi mwakalinga muntu wakalinga kwiitwa ayi Jobo. Musankwa uyu taakalinga kucitewo kampenda nabi komwi alimwi wakalinga kululeme. Wakalinga kulemeka Lesa alimwi wakalinga kushomeka kuli nguwe. 2Wakalinga kucite baana basankwa bosanwe abobilo abaana banakashi botatwe. 3Jobo wakalinga kufubite mbelele shili 7,000, ngamela shili 3,000, shipani sha ŋombe shili 500, mbongolo shili 500 alimwi abasebenshi baanji. Wakalinga mubile abuumbi pabantu bamwi boonse ba kwicwe.
4Bana bakwe Jobo basankwa bakalinga kubalana kubamba kusekelela mumaandaabo. Bakalinga kwiita abanankashi babo botatwe kwaamba ayi balye akunwaabo. 5Ono kwakalinga nkwishibila kwakwe Jobo kwaamba ayi na kusekelela kwamana, lakwe macuunsacuunsa wakalinga kubengela mwanaakwe womwi awomwi mulambu wakutenta mukumusalasha. Wakalinga kucita boobo mukwiinga wakalinga kuyeeya ayi, “Cimwi ciindi bana bangu bakabisha akushingana Lesa cakuteshiba.”
6Bumwi bushiku baanjelo ndibakesa mukulitondesha pameenso a Mwaami Lesa, alakwe Satana wakesaabo.#Mata 6:2 7Mpeeke Mwaami Lesa wakeepusha Satana ayi, “Ino waswita kuli?” Satana wakakumbula ayi, “Ndalinga kuya ceendeenda mucishi ca panshi coonse.”
8Mpomunyaawo Mwaami Lesa wakeepusha Satana ayi, “Sa wabonaawo musebenshi wangu Jobo? Ngumuntu utacite kampenda, ululeme, undemeka alimwi ushomeka kuli ndime.” 9Lyalo Satana wakakumbula Mwaami Lesa ayi, “Sa Jobo ulamulemekabo kwakubula mpindu? 10Sa te nceebo cakwaamba ayi mulamutabilila pantu pomwi abamuŋanda yakwe alimwi ashintu shakwe shoonse? Shoonse shintu lakwe nshaacita shilaswitilila alimwi matanga a shifubwa shakwe alibo luundu loonse. 11Amweeleshe kumunyaya nshaacite mulinyumfwile mbweshi amushingane.”#Ciyu 12:10
12Mpeeke Mwaami Lesa wakaambila Satana ayi, “Ncibotu, buboni bwakwe boonse ndabubika mumaansaako, sombi lakwe mwiine kuteelesha kumukumya.” Mpomunyaawo Satana wakaswaawo pameenso a Mwaami Lesa.
Bana bakwe Jobo mbobakanyonyoolwa pantu pomwi abuboni bwakwe
13Bumwi bushiku bana bakwe Jobo ndibakalinga kusekelela kuŋanda ya munenebantu, 14kwakesa shinkombe kuli Jobo akwaamba ayi, “Twalinga kushaba mumuunda abasune, mbongolo kashilya pafwaafwi. 15Mpeeke bene Sabeya besa mukushiipa shoonse. Bacaya basebenshi banu boonse akushiyoobo ndime. Ndime ndacicabo akwisa mukumulwiita shacitika.”
16Shinkombe uyo kaacaamba aJobo, aumwi wakapola akwaamba ayi, “Kalumba kakwe Lesa katenta mbelele shoonse abeembeshi banu. Ndime ndacicabo akwisa mukumulwiita shacitika.”
17Kacaamba uyo, aumwi wakapola akwaamba ayi, “Makoto otatwe a bene Kaludeya esa mukutulwana akubwesa ngamela shanu. Bacaya abasebenshi banu boonse. Ndime ndacicabo akwisa mukumulwiita shacitika.” 18Kacaamba uyo, aumwi wakapola akwaamba ayi, “Bana banu balinga kusekelela kuŋanda ya munenebantu. 19Mpeeke kwesa cipuupu kuswa kuluyanga. Cawisha ŋanda akubacaya boonse. Ndime ndacicabo akwisa mukumulwiita shacitika.”
20Mpomunyaawo Jobo wakanyamuka akukwamoona shakufwala shakwe ceebo ca buumba. Mpeeke wakalikulula misusu, waliwaala panshi mukulambila akupaila ayi,
21“Ndakaswa maansabo kuswa mumala muli bama
alimwi ndaakuya maansabo ndaakufwa.
Mwaami Lesa ngowakampa shoonse
ono bulya wanyaya shoonse.
Liina lya Mwaami Lesa alilumbaishikwe!”
22Mumapensho aya oonse, Jobo taakwe kubishaawo kwiinda mukucobola Lesa.
Currently Selected:
Jobo 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.