Osiya 1
1
1Aya ngamaswi Lesa ngaakayubulula kuli ndime neOsiya mwanaakwe Biili, mubwaami bwakwe Usiya, Jotamu, Aasi, Esekiya bamaami ba bene Juda alimwi amubwakwe Jeloboamu mwanaakwe Jeoyashi mwaami wa bene Isilaeli.#2 Baami 15:1-7; 2 Maka 26:1-23; 2 Baami 15:32-38; 2 Maka 27:1-8; 2 Baami 16:1-20; 2 Maka 28:1-27; 2 Baami 18:1—20:21; 2 Maka 29:1—32:33; 2 Baami 14:23-29
Muka siya abana bakwe
2Mwaami Lesa ndyaakatalika kwaambila bene Isilaeli kwiinda muli ndime neOsiya, wakaŋambila ayi, “Osiya, koya ukeebe. Mukaako teshi akanooshomeka abalo bana bako balaakukoshabo nyinawabo. Mbweeke ubo bantu bangu mbobakanshiya akucileka kushomeka kuli ndime neMwaami Lesa.”
3Aboobo ndakeeba mwanakashi wakalinga kwiitwa ayi Goma mwanaakwe Dibulaimu. Mwanakashi uyo wakamita akushala mwaana musankwa. 4Lyalo Mwaami Lesa wakaŋambila ayi, “Mwaana uyo mutumbe ayi Jesiliilu mukwiinga coonoonobo ndaakupa mulandu bamulunyungu lwakwe Jeyu. Ndaakucita boobo ceebo bantu baanji mbwaakacaya kuJesiliilu. Munshila iyo ndaakumanisha bulelo bwa Isilaeli.#2 Baami 10:11 5Mucinyika ca Jesiliilu ndaakunyonyoola nkusu shakulwana sha bene Isilaeli.”
6Goma wakamita alimwi akushala mwaana mwanakashi. Lyalo Mwaami Lesa wakaŋambila ayi, “Mwaana uyo mutumbe ayi Lo Luyama mukwiinga teshi nkatondeshewo bene Isilaeli tubili lusuno nabi kulekelela shibiibi shabo. 7Nakubi boobo kubene Juda ndaakubatondesha lusuno. Nebo neMwaami Lesa, Lesa wabo ndaakubapulusha munkusu shangu, kuteshi kwiinda mumipeeni, mata, mifwi, maaki nabi kwiinda mubeshikulwanina pamaaki.”
8Goma ndyaakalesha Lo Luyama, wakamita akuba amwaana musankwa umwi. 9Lyalo Mwaami Lesa wakaŋambila ayi, “Mwaana uyo mutumbe ayi Lo Ami mukwiinga bene Isilaeli tabacibete bantu bangu alimwi nebo nshicibete Lesa wabo.
Bene Isilaeli mbweshi bakaswitilile alimwi
10“Nakubi boobo bene Isilaeli balaakufulabo anga ngumuseese wa kuloombe lwa lweenga, ee, utakoonshi kupimwa nabi kubelengwa. Bulya ntokwaamba ayi, ‘Tamubete bantu bangu,’ sombi bushiku bulaakushika ndyeshi nkaambe ayi, ‘Mwebo muli bantu bangu nebo neLesa muumi.’#Loma 9:26 11Bene Juda abene Isilaeli balaakucatanishikwa pantu pomwi alimwi. Balaakulisalila mutanjilili womwi, lyalo balaakubwesa cishi cabo alimwi akutalika kuswitilila. Ncakwiila bushiku bwa Jesiliilu bulaakuba bunene abuumbi.
Currently Selected:
Osiya 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.