Bene Galatiya 1
1
1Ndime Paulo mutumwi. Teshi muntu wakantuma sombi Jesu Klistu alimwi aLesa Ishiwesu uyo wakamubusha kuswa kubafu. 2Nebo abeensuma boonse mboondyaabo kuno twamwaansha noshoonde sha kuGalatiya.
3Luse aluumuno shibe amwebo kuswa kuli Lesa Ishiwesu aMwaami Jesu Klistu. 4Klistu wakalibenga ceebo ca shibiibi shesu ayi atufuune kububi bwa mucishi cino ca panshi, kweelana akuyanda kwakwe Lesa Ishiwesu. 5Kuli Lesa akube bulemu lyoonse alyoonse. Ameni.
Taaku aamwi Makani Abotu
6Ndakankamana abuumbi mukwiinga mwafwambaana kusuula Lesa, uyo wakamwiita kwiinda muluse lwakwe Klistu, akukonkela makani amwi. 7Teshi kwaamba ayi kuli makani abotu amwi, sombi kuli bantu bamwi batooyanda kumufulunganya kwiinda mukusendeka Makani Abotu aamba shapali Klistu. 8Muntu uli woonse, swebo nabi munjelo uswa kwiculu, na wamushimikila makani amwi apusene aMakani Abotu ayo ngotwakamushimikila, uyo Lesa amushingane muyayaya. 9Twamulwiitawo kale alimwi ntooboshaawo sunu, na kuli umwi utoomushimikila makani amwi apusene aMakani Abotu ngotwakamushimikila, uyo Lesa amushingane muyayaya. 10Sa mukwaamba boobo ntooyanda kulumbwa abantu? Napaceyi, sombibo Lesa eenka. Sa ndisuni kukondelesha bantu? Sobwe, nendalinga kucisuni kukondelesha bantu, naakwiinga nshibete musebenshi wakwe Klistu.
Paulo mbwaakaba mutumwi
11Nobamakwesu, ntomwishibisha kwaamba ayi Makani Abotu ayo ngoonshimikila, taakwe kuswa kubantu. 12Nshikwe kupekwa kumuntu nabi kwiishikwa kumuntu, sombi Jesu Klistu ngowakanjubulwita Makani Abotu ayo.
13Mwakanyumfwa kale mbuli buumi bwangu mbobwakalinga ndindakalinga kukonkela kwiisha kwa baJuda. Ndakalinga kupensha bumbi coonde cakwe Lesa akweelesha kwaamba ayi ncinyonyoole.#Mili 8:3; 22:4-5; 26:9-11 14Nebo ndakalinga kwiinda beensuma boonse mukukonkela kwiisha kwa baJuda. Ncakwiila ndakalinga muyumu abuumbi mukukonkela kwishibila kwa bakulukulu.#Mili 22:3
15Sombi Lesa muluse lwakwe, wakansalilabo limwi kaantana kushalwa ayi nkamusebensele. 16Cakamukonda kunjubulwita Mwanaakwe kwaamba ayi nkashimikile Makani Abotu aamba pali nguwe kubaswamashi bakunsengwe. Nshikwe kuya kumuntu mukwiipusha bwakucita,#Mili 9:3-6; 22:6-10; 26:13-18 17nabi kuya kuJelusalemu mukwiipusha baabo bakataanguna kuba batumwi. Sombi ndakaya kuAlebya, kuswa kooko ndakaboola kuDamasikasi. 18Ndipakeenda myaaka yotatwe, ndakaya kuJelusalemu mukufwakasha kuli Pita akwikalaakwe nshiku shili likumi ashosanwe.#Mili 9:26-30 19Taaku mutumwi aumwi ngondakabona, sombibo Jemusi eenka, mukwabo Mwaami wesu Jesu. 20Ntoomulwiita calushinisho pameenso akwe Lesa ayi makani ayo ngontoomulembela ngancinencine.
21Kuswawaawo, ndakaya mushishi sha Silya aSilisiya. 22Ciindi ico, bashomi ba mushoonde sha kuJudeya kabatenshiiwo. 23Bakalinga kunyumfwabo ayi, “Uyo muntu wakalinga kutupensha ono ulashimikila shalushomo lweenka ndwaakalinga kusuni kunyonyoola!” 24Mpomunyaawo bakalumbaisha Lesa ceebo ca ndime.
Currently Selected:
Bene Galatiya 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.