Belo ansoka inene 1
1
Danyele abapailishi bakwe Belo
1Mwaami Asitayagesi ndyaakafwa, Kilusi wakuPesha ngowakaba mwaami. 2Danyele amwaami Kilusi bakalinga kunyumfwana. Nkokwaamba ayi mwaami wakalinga kumulemeka Danyele abuumbi kwiinda babye boonse. 3Bantu bakuBabiloni bakalinga kucite kalesa kamwi liina lyankako kanga Belo. Nshiku shoonse bantu bakalinga kupa ntumba likumi ashobilo shabusu bupelekete kabotu pantu pomwi ambelele shili makumi one anongo shawaini makumi osanwe. 4Mwaami uyo wakalinga kulemenesha Belo anga ngulesa wakwe, alimwi wakalinga kuya mukulambila bushiku abushiku. Sombi Danyele wakalinga kulambila Lesa wakwe wancinencine. 5Bumwi bushiku mwaami wakeepusha Danyele ayi, “Ino webo, ceebonshi ncotalambili abo Belo?” Lakwe wakakumbula ayi, “Mukwiinga ncakwaamba ayi shilambili tulesa twakapangwa abantu. Sombi ndalambila Lesa muumi, wakalenga liculu acishi capaanshi ulela bantu boonse.” 6Mwaami Kilusi wakeepusha ayi, “Sa webo toshomi ayi Belo ngulesa muumi? Toboni kwaamba ayi ulalya akunwa nshiku shoonse?” 7Danyele wakaseka akwaamba ayi, “Batanoomubeca nobaami, Belo wanu uyo mbulongobo alimwi peculu pakwe bakananikaawo bulonse. Mbomwakamubumbila taana kulyaawo nabi kunwa cili coonse.” 8Mpomunyaawo mwaami wakakalala, akwiita bapailishi bakwe Belo, wabaambila ayi, “Na mubule kundwiita muntu ulya shilyo shoonse isho, mwebo mwafwa. Sombi namundwiite ayi nguBelo ulya shilyo, lyalo nkokwaamba ayi Danyele utoofwa paceebo cakusebaanya Belo.” 9Lakwe Danyele wakakumbula mwaami ayi, “Ncibotu ashibe bweenka mbomwaamba.”
10Bakalingaawo bapailishi makumi osanwe abobilo bakwe Belo, kutabelengelaako bamakaabo abanababo. 11Mwaami wakaya wenjila muŋanda yakwe Belo pantu pomwi a Danyele. Bapailishi bakwe Belo bakalwiita mwaami ayi, “Ono tutooswa, tumushiye nobaami, kwaamba ayi mubike shilyo awaini nobeene. Pesule mucale cisasa akubikaawo cidindo canu. 12Ono bulya nobaami mukeese macuunsa, namukacane ayi Belo taakwe kulya shilyo isho, mukatucaye. Sombi namukacane ayi Belo washilya, nkokwaamba ayi Danyele ulakucaikwa. Ceebo cakutubekesha.” 13Mpomunyaawo bapailishi tabakwe kulibilikaawo mukwiinga kunshi kutebulu bakatulula bulyango mbobakalinga kwishi beenka, ubo bulyango mpobakalinga kwinjilila lyoonse, kuya mukulya shipo shoonse.
14Bapailishi balya bakaswa, mwaami wakatola shilyo kuli Belo. Lyalo Danyele wakaambila basankwa bakwe ayi babwese milota akwisanseela paanshi muŋanda yoonse umo mobapailila. Mwaami eenka ngowakabona, ciindi basankwa ndibakacita boobo. Ndibakamana, basankwa abo bakaswa muŋada yakupaililaamo, akucalaako. Bakadinda cidindo camwaami akuswaako. 15Pakati kamashiku, bapailishi balya, bamakaabo, abanababo boonse bakenjila muŋanda yakupaililaamo ilya, kuya mukulya akunwa shoonse bweenka mbobakalinga kucita lyoonse.
16Macuunsacuunsa, mwaami wakesa pantu pomwi aDanyele. 17Mwaami wakeepusha ayi, “Danyele, sa shindindo shilya shashimingana?” Lakwe Danyele wakakumbula ayi, “Tau, nobaami, tashinakushimingana.” 18Mwaami wakacalula cisasa, kubona kwaamba ayi patebulu palya taapu ciliiwo palatubabo. Mpomunyaawo mwaami wakoolobesha ayi, “Amulumbaishikwe, webo Belo notabeci!” 19Sombi Danyele wakasekabo wakakasha mwaami kutenjila, wakaamba ayi, “Nobaami amulange paanshi apa, ino myeendo iyi njabaani?” 20Mwaami wakakumbula ayi, “Ntobona myeendo yabasankwa, banakashi abaana.”
21Mpomunyaawo mwaami wakakalala abuumbi akucata bapailishi boonse balya, bamakaabo abanababo boonse. Alimwi bapailishi abo bakabonesha kumwaami shabulyango wabushishi apo mpobakalinga kwinjilila kuya mukulya shoonse shapatebulu. 22Pesule mwaami wakabacaya boonse abo, watola Belo kuli Danyele, alakwe Danyele wakamupwayoola Belo uyo pantu pomwi aŋanda yakwe.
Danyele mbwaakacaya nsoka inene
23Kwakalinga cisoka cinene ico bantu bakuBabiloni ncebakalinga kulambila. 24Bushiku bumwi mwaami wakalwiita Danyele ayi, “Tookonshi kwaamba lesa uyu teshi muumi, lambila ono.” 25Danyele wakakumbula ayi, “Ntoolambila Mwaami Lesa, Lesa wangu ceebo lakwe nguLesa muumi. 26Sombi namwansuminisha nobaami, cisoka ici inga ndacicaya, kutaaku mupeeni nabi nkoli.” Alakwe mwaami wakaamba ayi, “Ncibotu, ndakusuminisha.”
27Lyalo Danyele wakabwesa bukato, mafuta amisusu shoonse washiteleka. Wakapanga makeke akuya mukulisha cinsoka cilya. Cinsoka ico ndicakalya, cakatauluka. Ono Danyele wakaamba ayi, “Amubone cintu cilya ncemwakalinga kulambila!”
28Bantu bene Babiloni ndibakanyumfwa makani aya, bakakalala abuumbi, kabasuni kucaya mwaami. Bakatalika koolobesha ayi, “Mwaami wasanduka muJuda wanyonyoona Belo, wacaya cinsoka cilya kucaya abapailishi boonse amupeeni.” 29Lyalo bakaya kumwaami baya bamwaambila ayi, “Nobaami amutupe Danyele uyo. Na mukake, nkokwaamba ayi swebo tutoomucaya pantu pomwi abamakwabanu.” 30Mwaami ndyaakabona ayi bamushaankanya wabapa Danyele.
31Bantu abo bakawaala Danyele mucilindi cankalamu. Wakekala nshiku shosanwe abushiku bomwi. 32Mucilindi ico mwakalinga nkalamu shosanwe ashobilo. Pabushiku bomwi bakalinga kushipa bantu bobilo ambelele shobilo kwaamba ayi shilye. Sombi paciindi ici bakashooneka nsala, kwaamba ayi Danyele alikwe.
Danyele mbwaakaswa mucilindi cankalamu
33Paciindi ceenka ico kwakalinga mulaluki Abakuku uyo wakalinga kwikala kuJuda. Bushiku bumwi wakateleka nyama, akutimbweetamo shinkwa. Wakanyamuka akuya kumuunda acakulya ico, kuya mukupa beshikutebula. 34Sombi munjelo wamwaami Lesa wakalwiita Abakuku ayi, “Cakulya ico uyaaco ku Babiloni, ukape Danyele, uyo uli mucilindi cankalamu.” 35Abakuku wakakumbula ayi, “Nkambo, nebo ku Babiloni nshinakuyaako. Shishiiko nkocibete cilindi cankalamu.” 36Mpomunyaawo munjelo waMwaami Lesa wakanyamuna Abakuku pakucata misusu, wayaakwe ku Babiloni calubilo, kuya mukumutula pafwaafwi acilindi cankalamu.
37Abakuku wakoolobesha ayi, “Danyele, Danyele, koolya cakulya ncakutumina Lesa.” 38Danyele wakaamba ayi, “Webo oLesa, wanjibaluka. Bantu bakuyanda toobebaluki.” 39Lyalo wakeemikana akulya. Pesule munjelo waMwaami Lesa wakamubwesa Abakuku akumuboosha kumishaabo.
40Pabushiku bwasanu ashobilo, mwaami wakaya kucilindi kwaamba ayi alile Danyele. Ndyaakashika, ndyaakasondelaamo, wakabona Danyele kashiitebo! 41Mpomunyaawo mwaami wakoolobesha ayi, “Webo oMwaami Lesa, Lesa wakwe Danyele, ncakwiila uli munene. Taaku lesa umwi sombibo webo weenka.” 42Pesule mwaami wakakusha Danyele mucilindi ico, lyalo bantu balya bakalinga kusuni kucaya Danyele, wakabawaala mucilindi ico. Peenka apo shabalya nkalamu isho, mwaami kabweneeko.
Currently Selected:
Belo ansoka inene 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.