Bene Loma 13
13
Muntu mbwaaelete kunyumfwila beendeleshi ba cishi
1Muntu uli woonse ulyeelete kunyumfwila beendeleshi ba cishi ceebo taaku muntu ucite nkusu shakweendelesha shitakwe kuswa kuli Lesa. Beendeleshi boonse baliiwo, nguLesa wakabasala. 2Aboobo uyo woonse utanyumfwili beendeleshi taatoonyumfwila Lesa. Ncakwiila uyo ucita boobo ulaakulilengesha kupekwa mulandu. 3Ceebo beendeleshi tabaloondwi kubantu bacita shibotu, sombi kubaabo bacita shibiibi. Sa ulisuni kutaloonda mweendeleshi? Anu kocita shibotu, lyalo lakwe ulaakukulumbaisha. 4Ceebo mweendeleshi ngumusebenshi wakwe Lesa utoosebensela kucafwa ndiwe. Ono na ulacita shibiibi ncakwiila ulyeelete kumuloonda mukwiinga ulicite nkusu shakukupa mulandu. Anu mweendeleshi ngumusebenshi wakwe Lesa uyo upa mulandu bacita shibiibi mumusena wakwe Lesa. 5Paceebo ceeco ulyeelete kunyumfwila beendeleshi, kuteshibo ceebo ca bukali bwakwe Lesa, sombi ayi mukwiinga mumoyo wako ulishi ayi mboweelete kucita ubo.
6Ici nceceeco ncoosonkelela misonko mukwiinga beendeleshi ndibasebensa milimo yabo, balasebensela Lesa. 7Aboobo lipila misonko yoonse yeelete kubeendeleshi, akubalemeka.#Mate 22:21; Maako 12:17; Luka 20:25
Bantu mbobeelete kusunana
8Mutabi ankongole kumuntu uli woonse, sombi ncemweelete kucita, nkusunanabo. Uyo woonse usuni mubye ingayi wacita kale shiyanda Milawo shoonse. 9Mukwiinga milawo yaamba ayi, “Utaciti bulale, utacaayi, uteepi, utanyumfwili munyono mubyo ceebo ca shintu nshaacite” aimwi yoonse, ilasansululwa mumulawo womwibo waamba ayi, “Suna mubyo bweenka mboolisuni omwiine.”#Kulo 20:14; Duto 5:18; Kulo 20:13; Duto 5:17; Kulo 20:15; Duto 5:19; Kulo 20:17; Duto 5:21; Bene Lefi 19:18 10Na muntu ulisuni mubye inga taamubishishiiwo. Nkokwaamba ayi usuni mubye ulakonkela Milawo yoonse.
11Aboobo mulyeelete kucita sheeshi mukwiinga mulishi kwaamba ayi ciindi cakubuka kuswa mutulo cashikila. Ncakwiila bushiku Lesa ndyeshi akatupulushe bwasenena kwiinda nditwakashomabo. 12Ciindi ca mashiku camana butooyanda kuca. Ono atucileeke kucita shamumunshinshe, sombi tubwese shakulwanisha sha mumumuni. 13Atwikale kabotu mbuli bantu bekala mumumuni. Tatweelete kwikala mubucakolwa bupusenepusene, bufuule alimwi akutalilemeka. Tatweelete kulwana alimwi akunyumfwilana munyono. 14Tatweelete kubika maano musheesho shiyanda mubili, sombi Jesu Klistu abe nsheshakulwanisha shesu.
Currently Selected:
Bene Loma 13: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
