Shakubelenga 8
8
Kubika malampi
1Mpeeke Mwaami Lesa wakaambila Mose ayi, 2“Lwiita Aloni ayi pakubika malampi ali osanwe aobilo pacakubikaawo, ulyeelete kwaabika cakwaamba ayi mumuni ukanooba kunembo.” 3Aloni wakacita mbomunya ubo, wakabika malampi pacakubikaawo akwaalansha kunembo kweelana aMwaami Lesa mbwaakaambila Mose. 4Kuswa peculu apanshi, cakubikawo malampi cakapangwa kugolodi wakufula kweelana aMwaami Lesa mbwaakabonesha Mose.#Kulo 25:31-40; 37:17-24
Kusalashikwa akubengwa kwa bene Lefi
5Mpeeke Mwaami Lesa wakaambila Mose ayi, 6“Patula bene Lefi kubene Isilaeli boonse alimwi akubasalasha. 7Mukucita boobo, ubasanseele maanshi asalasha akubalwiita ayi bakulule pamibili yabo yoonse alimwi bacape shakufwala shabo. Lyalo ndyeshi banoosalalite kweelana aMilawo. 8Kuswawaawo balyeelete kubwesa mucende mwaana acipo ca fulaulo ciyandika nkokwaamba ayi fulaulo uyo usenkene amafuta a olifi. Awebo ulyeelete kubwesa amucende umwi wa mulambu wakulekelelwa shibiibi. 9Kuboolaawo ukabunganye bene Isilaeli boonse akwiimika bene Lefi kunembo lya Tente ya Cipangano. 10Anu mukalete bene Lefi pameenso angu neMwaami Lesa, lyalo bene Isilaeli balyeelete kubika maansaabo pamitwi yabo. 11Ono Aloni ulyeelete kubabenga kuli ndime ayi ncipo cipuseneeko kuswa kubene Isilaeli kwaamba ayi basebense ncito yangu.
12“Bene Lefi balo balyeelete kubika maansaabo pamitwi ya bacende bobilo. Mucende umwi akabengwe kuli ndime neMwaami Lesa ayi ngumulambu wakulekelelwa shibiibi, alakwe umwi ayi ngumulambu wakutenta mukusalasha bene Lefi kweelana amulawo.
13“Lyalo ukabenge bene Lefi ayi ncipo cakutambeeka kuli ndime, akubabika ayi bakanokweendeleshekwa aAloni abana bakwe basankwa. 14Munshila iyi ukapatule bene Lefi kubene Isilaeli bamwi boonse kwaamba ayi bakabe baangu.
15“Waakumana kusalasha akubenga bene Lefi ayi ncipo cakutambeeka, lyalo ndyeshi bakabe bantu beelete kusebensa muTente ya Cipangano. 16Ndabasala ayi babe baangu mumusena wa baana basankwa bakwiiya ba bene Isilaeli boonse, alimwi mbaangu nebo neenka. 17Ndindakacaya baana basankwa bakwiiya boonse muIjipiti, ndakalibikila palubasu mwaana musankwa wakwiiya woonse wa mwine Isilaeli alimwi amwaana musankwa wakwiiya wa munyama.#Kulo 13:2 18Ono bulya ntoolibikila palubasu bene Lefi mumusena wa baana basankwa bakwiiya boonse ba bene Isilaeli, 19alimwi ndabika bene Lefi mumaansaakwe Aloni abana bakwe basankwa ayi ncipo kuswa kubene Isilaeli, kwaamba ayi banoosebensa muTente ya Cipangano mumusena wa bene Isilaeli bamwi alimwi akubalama kumapensho eenga abacitikila na basena pafwaafwi aMusena Usalalite.”
20Lyalo Mose, Aloni alimwi abene Isilaeli bamwi boonse bakabenga bene Lefi kweelana aMwaami Lesa mbwaakaambila Mose. 21Bene Lefi bakalisalasha akucapa shakufwala shabo, alakwe Aloni wakababenga kuMwaami Lesa ayi ncipo cakutambeeka. Alimwi wakabacitila ashoonse shiyandika kweelana amulawo wakusalasha. 22Mpeeke bene Lefi bakesa mukucita mulimo wabo muTente ya Cipangano kwiinda mukutanjililwa aAloni abana bakwe basankwa. Bakabacitila shoonse Mwaami Lesa nshaakaambila Mose.
23Mpomunyaawo Mwaami Lesa wakaambila Mose ayi, 24“Ono mwine Lefi musankwa womwi awomwi ucite myaaka ili makumi obilo ayosanwe ayiindaawo ulyeelete kusebensa mulimo muTente ya Cipangano. 25Sombi pamyaaka ili makumi osanwe, ulyeelete kucileka kucita mulimo uyo. 26Kuswawaawo inga kaacafwa bene Lefinyina mumilimo yabo muTente, sombi palwaakwe mwiine taacite mulimo wakusebensa nabi womwi. Anu ubo mbomweelete kupa bene Lefi milimo.”
Currently Selected:
Shakubelenga 8: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
