Bene Lefi 9
9
Aloni mbwaakabenga milambu
1Ono pabushiku bwakaboolaawo ndibakamana kusekelela, Mose wakeeta Aloni abana bakwe basankwa alimwi abamaloba ba bene Isilaeli. 2Wakaambila Aloni ayi, “Ubwese mucende mwaana alimwi ambelele isankwa shoonse shobilo shitacite kampenda kali koonse akushibenga kuMwaami Lesa. Mucende mwaana ngwamulambu wakulekelelwa shibiibi, mbelele isankwa njamulambu wakutenta. 3Lyalo ulwiite bene Isilaeli ayi babwese mpongo isankwa ibe mulambu wakulekelelwa shibiibi, mwanaaŋombe ucite mwaaka womwi, alimwi amwanaambelele ucite mwaaka womwi boonse bobilo batacite kampenda kali koonse ayi babe mulambu wakutenta, 4kubikaawo amucende alimwi ambelele isankwa ayi shibe mulambu wa bwanabwankashi. Balyeelete kushibenga kuMwaami Lesa pantu pomwi acipo ca fulaulo cisenkene amafuta. Balyeelete kucita shoonse isho ceebo Mwaami Lesa utoobonekela kuli mbabo sunu.”
5Mpeeke shoonse Mose nshaakabaambila bakashileta kunembo lya Tente ya Cipangano, abalo bene Isilaeli boonse bakabungana peenka apo ayi balambile Mwaami Lesa. 6Lyalo Mose wakaamba ayi, “Mwaami Lesa walasha ayi mucite shoonse ishi kwaamba ayi bulemu bwakwe buboneke kuli ndimwe.” 7Kuswawaawo wakaambila Aloni ayi, “Koya kucipaililo ukabenge mulambu wakulekelelwa shibiibi alimwi amulambu wakutenta ayi milambu iyo ikushe shibiibi shako ashibiibi sha bantu boonse. Benga mulambu uyu ayi shibiibi sha bantu shikushikwe, bweenka bwakaamba Mwaami Lesa.”#Ebulu 7:27
8Mpomunyaawo Aloni wakaya kucipaililo, akucaya mucende mwaana uyo wakalinga mulambu wakulekelelwa shibiibi shakwe. 9Abalo bana bakwe bakamuletela bulowa, umo mwaakasumpa munwe wakwe, bumwi bulowa wakabubika pameeca a mumakonko a cipaililo. Wakatila bulowa boonse bwakacaala panshi pacipaililo. 10Lyalo pacipaililo wakatentawo mafuta a mulambu wakulekelelwa shibiibi, insa alimwi acipansha cibotu ca lini, kweelana aMwaami Lesa mbwaakaambila Mose. 11Sombi nyama alimwi acipaya, wakashitentela pansengwe ya misumba.
12Pesule wakacaya munyama ayi ngumulambu wakutenta waakwe mwiine. Bana bakwe bakamuletela bulowa ubo mbwaakasanseela mumbasu shone shoonse sha cipaililo. 13Bakamutambika mutwi alimwi ashipansha shimwi sha munyama, mpeeke wakashitentela pacipaililo. 14Kuswawaawo wakasansha shamukati alimwi amyeendo, akushitentela pacipaililo, peculu lya mulambu wakutenta.
15Ndyaakamanisha, wakabengela bantu mulambu. Wakabwesa mpongo ya mulambu wa bantu wakulekelelwa shibiibi, weecaya akwiibenga, bweenka mbwaakabenga mulambu wakwe wakulekelelwa shibiibi. 16Wakaleta amunyama wa mulambu wakutenta, akumubenga kweelana amilawo. 17Pesule wakapa cipo ca fulaulo akutapulawo lupaka lwa fulaulo alimwi akuutenta pacipaililo. Uku kwakalinga nkwiilika pamulambu wakutenta wa nshiku shoonse. 18Lyalo wakacaya mucende ambelele isankwa ayi ngumulambu wa bantu wa bwanabwankashi. Abalo bana bakwe bakamuletela bulowa ubo mbwaakasanseela mumbasu shone shoonse sha cipaililo.#Bene Lefi 3:1-11 19Aloni wakabika mafuta a mucende alimwi ambelele isankwa 20peculu lya shipansha sha ntiti, akushitola kucipaililo shoonse. Wakatenta mafuta pacipaililo 21akutambeeka ntiti amyeendo yakatako yakululyo kunembo lya Mwaami Lesa ayi ngumulambu wakutambeeka, kweelana abwakamwaambila Mose.
22Ono Aloni ndyaakamana kubenga milambu yoonse, wakatandabika maansaakwe pabantu akubapa coolwe, lyalo wakaswaawo.#Shakube 6:22-26 23Mpomunyaawo Mose aAloni bakenjila muTente ya Cipangano. Ndibakaswaamo, bakapa coolwe bantu, mpeeke bulemu bwa Mwaami Lesa bwakabonekela kubantu boonse. 24Paciindi ceenka ico, Mwaami Lesa wakatuma mulilo pamulambu wakutenta alimwi ashipansha sha mafuta pacipaililo ayi shipye. Bantu ndibakabona boobo, boonse bakoolobesha cakukondwa akufukama cakushisha shiwa panshi.
Currently Selected:
Bene Lefi 9: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
