Joni 21
21
Jesu mbwaakaboneka kubashikwiiya bosanwe abobilo
1Kuswawaawo Jesu wakaboneka alimwi kubashikwiiya kuLweenge lwa Tibelyasi. Ono mbulya mbocakalinga. 2Simoni Pita, Tomasi wiitwa ayi Mpuundu, Natanaelo wa kundabala ya Kana muGalili, bana bakwe Sebedi abashikwiiya bamwi bobilo, boonse bakalinga kubungene pantu pomwi. 3Simoni Pita wakaambila bashikwiiya bamwi ayi, “Ntooya mukucaya nswi.”
Balo bakakumbula ayi, “Tutooya soonse.” Aboobo bakanyamuka baya abwaato. Nakubi boobo taaku nswi nshibakacaya mashiku oonse ayo.#Luka 5:5 4Ndibwakaca, Jesu wakeemikana kuloombe lwa lweenge, sombi bashikwiiya bakwe tabakwe kumwishiba. 5Lyalo wakabeepusha ayi, “Mwebo basaankwa, sa mwacayaawo?”
Balo bakamukumbula ayi, “Tau, tatukwe kucayaawo.” 6Mpomunyaawo wakabaambila ayi, “Amuwaale koombe kululyo lwa bwaato, mulacaya.” Aboobo bakakawaala kulubasu ulo. Mpeeke bakaalilwa kukakwelela mubwaato ceebo mwakacatwa nswi shiinji abuumbi.#Luka 5:6
7Lyalo shikwiiya uyo Jesu ngwaakalinga kusunishi wakaambila Pita ayi, “MBaami!” Pita ndyaakanyumfwa ayi mBaami, wakafwala cakufwala cakwe ca peculu (ceebo wakalinga wacipa) akuliwaala mumaanshi. 8Balo bashikwiiya bamwi bakacaala mubwaato kabaya bukwela koombe kakalinga kuswite nswi. Tebakalinga kulaale aloombe, pakalingabo mpashi ntaamwa mwaanda. 9Ndibakashika petala bakabona mulilo wa makalangasha, kapayokwa nswi alimwi palubasu bulya pakalinga shinkwa. 10Lyalo Jesu wakaamba ayi, “Amulete nswi shimwi nshimwaswa mukucaya.”
11Mpomunyaawo Simoni Pita wakenjila mubwaato akukwelela koombe petala, kakaswite nswi shinene shinene mwaanda amakumi osanwe alimwi ashotatwe. Nakubi kwaamba ayi shakafula boobo, koombe takakwe kupasuka. 12Mpeeke Jesu wakabaambila ayi, “Kamwisa tulye.” Pabashikwiiya boonse, taaku wakayeeya kwiipusha ayi, “Anu ndimwe baani?” Ceebo bakeshiba ayi nguMwaami. 13Aboobo Jesu wakabwesa shinkwa akubaabila. Ashalo nswi isho wakacita mbomunya ubo.
14Linkanda ili lyakaba ndyatatu Jesu kuboneka kubashikwiiya bakwe kuswa bushiku mbwaakabushikwa kuswa kubafu.
Jesu mbwaakeepusha Pita
15Ndibakamana kulya, Jesu wakeepusha Pita ayi, “Simoni omwanaakwe Joni, sa ulinsuni kwiinda mbobansuni boonse aba?”
Pita wakakumbula ayi, “Ee Nkambo, mulishi kwaamba ayi ndimusuni.” Jesu wakamwaambila ayi, “Kosanina mbelele shangu shaana.” 16Jesu wakeepusha Pita lwabili ayi, “Simoni omwanaakwe Joni, sa ulinsuni?”
Alakwe wakakumbula ayi, “Ee Nkambo, mulishi kwaamba ayi ndimusuni.” Lyalo Jesu wakamwaambila ayi, “Kweembela mbelele shangu.” 17Jesu wakeepusha lyatatu ayi, “Simoni omwanaakwe Joni, sa ulinsuni?”
Mpomunyaawo Pita wakoongumana mukwiinga Jesu wakamwiipusha lyatatu ayi, “Sa ulinsuni?” Lyalo wakaamba ayi, “Nkambo, mwebo mulishi shintu shoonse nkokwaamba ayi mulishi ayi ndimusuni!”
Jesu wakamwaambila alimwi ayi, “Kosanina mbelele shangu. 18Ntookulwiita calushinisho ayi, ndiwakalinga mwanike wakalinga kufwala omwiine akuya nkowakalinga kusuni. Ono waakucembela ulaakutandabikabo maansa, lyalo muntu umwi ulaakukufwalika akukutola nkootasuni.” 19(Mukwaamba boobo Jesu wakalinga kutondesha lufu lweshi lukafwe Pita akuletela bulemu Lesa.) Lyalo wakaambila Pita ayi, “Nkonkele!”
Jesu ashikwiiya umwi
20Pita ndyaakacebukila kwisule, wakabona shikwiiya uyo Jesu ngwaakalinga kusunishi keesa, shikwiiya uyu ngowooyo wakayaamina Jesu pabushiku ndibakalinga kulya mulalilo alimwi akwiipusha ayi, “Ngani eshi amwaabe noBaami?”#Joni 13:25 21Ndyaakamubona, Pita wakeepusha Jesu ayi, “Nkambo, ino alakwe musankwa uyu, mbuyani?”
22Jesu wakakumbula ayi, “Ino na kaansuni kwaamba ayi uyu anoolibo muumi kushikila nkese, sa ngumulandu wako uyo? Nkonkelebo!”
23Aboobo mpuwo yakanyumfwika kubashoma muli Jesu boonse ayi shikwiiya uyo teshi akafwe. Sombi Jesu taakwe kwaamba ayi teshi akafwe, sobwe. Wakaamba ayi, “Ino na kaansuni kwaamba ayi uyu anoolibo muumi kushikila nkese, sa ngumulandu wako uyo?”
24Shikwiiya uyo ngowakapa bukamboni pashintu ishi alimwi ngowakashilemba. Aboobo tulishi kwaamba ayi bukamboni bwakwe mbwalushinisho.
Cakweelaako
25Ono nkoshili ashimwi shiinji isho Jesu nshaakacita. Nicakaba cakulemba shoonse neenga mabuku ashini akalembwe abula musena mucishi ca panshi.
Currently Selected:
Joni 21: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.