Matalikilo 2
2
1Munshila iyo liculu acishi ca panshi alimwi ashintu shoonse shiliimo shakamana kulengwa. 2Pabushiku bwasanu ashobilo Lesa wakalinga kumanishite kale shoonse nshaakalinga kucita. Pabushiku ubo wakookesha.#Ebulu 4:4, 10 3Bushiku ubu wakabupa coolwe akubusalasha, mukwiinga mbobushiku mbwaakookesha kuswa kumulimo woonse wakulenga ngwaakacita.#Kulo 20:11 4Ono mboboobo liculu acishi ca panshi mboshakalengwa.
Muntu mbwaakabisha
Mwaami Lesa ndyaakalenga liculu acishi ca panshi coonse, 5Tekwakalingawo shishango pacishi ca panshi alimwi nseke shoonse kashitana kumena, mukwiinga ciindi ico Mwaami Lesa kaatana kuloshawo mfula. Alimwi tekwakalinga muntu shikulima. 6Nacibi boobo maanshi akalinga kuswa panshi, aboobo bulongo bwakalinga kutontola kumaanshi ayo.
7Lyalo Mwaami Lesa wakabwesa bulongo panshi akubumbaamo muntu. Mpeeke wakamuyoyela muuya upa buumi mumashono, mpomunyaawo muntu uyo wakaba abuumi.#1 Koli 15:45 8Kuswawaawo Lesa wakalima muunda muEdeni kwicwe, umo mwaakabika musankwa uyo ngwaakabumba. 9Mpeeke wakalengesha ayi mumene shisamu shibotu akucata shisepo shibotu. Sombi pakati ka muunda pakalinga kwiimfwi cisamu cipa buumi, acisamu cipa lushibo lwa bubotu abubi.#Ciyu 2:7; 22:2, 14
10Ono kwakalinga mulonga wakalinga kukunka kuswa muEdeni akutontosha muunda uyo. Lyalo kunembo wakalinga kubaanikamo yone. 11Utaanshi uleetwa ayi Pishoni alimwi ulakunka kushinguluka cishi coonse ca Afila. 12Kulya kulacanika Golodi ubotu, mafuta anunkila kabotu ayo atacanikicaniki alimwi amabwe amakwebo. 13Wabili uleetwa ayi Gioni alimwi ulakunka kushinguluka cishi coonse ca Kushi. 14Watatu uleetwa ayi Tigilisi, walo ulakunka kwicwe lya cishi ca Asilya. Wane nguYufuletisi.
15Lyalo Mwaami Lesa wakabika muntu uyo mumuunda wa Edeni kwaamba ayi anooulima akuulama. 16Ono wakaambila muntu ayi, “Inga walya cisepo ca cisamu cili coonse mumuunda, 17sombi kutalya shisepo sha cisamu cipa lushibo lwa bubotu abubi. Mukwiinga waakulyabo, ncakwiila ulaakufwa.”
18Ono Mwaami Lesa wakaamba ayi, “Tacibete kabotu musankwa kwikala eenka. Ntoomupangila shikumucafwa umweelete.” 19Aboobo wakabwesa bulongo akubumba banyama abayuni boonse. Lyalo wakabaleta kumusankwa uyo ayi abape meena. Ono njenshila iyo boonse mobakabeta ameena. 20Mpeeke musankwa uyo wakapa meena banyama bafubwa, bayuni abanyama bamuluundu boonse, sombi taaku nabi womwi pali mbabo boonse wakacanika ayi ngushikumucafwa umweelete. 21Lyalo Mwaami Lesa wakalengesha musankwa uyo koona cakufwa. Kaacilete, Lesa wakakusha lipinga lyomwi akuboosheshaawo munyefu pamusena wa ndilyo. 22Mpomunyaawo wakapanga mwanakashi kuswa kulipinga ilyo akumupa kumusankwa. 23Mpeeke musankwa wakaamba ayi,
“Ono uyu ncecifuwa ca shifuwa shangu,
munyefu wa munyefu wangu.
Ulaakunookwiitwa ayi, ‘Mwanakashi,’
ceebo waswa kumusankwa.”
24Paceebo ceeci musankwa ulaakushiya baishi abanyina akupaankana amukaakwe, lyalo balaba munyefu yomwi.#Mate 19:5; Maako 10:7-8; 1 Koli 6:16; Efe 5:31 25Musankwa amukaakwe bakalinga matakosha, sombi tebakalinga kufwa nsoni.
Currently Selected:
Matalikilo 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.