YouVersion Logo
Search Icon

2 Samwelo 1

1
Defedi mbwaakeshiba ayi Saulo wakafwa
1Pesule lya kufwa kwakwe Saulo, Defedi wakaboola kuswa mukukoma bene Amaleki akwikalabo nshiku shobilo muSikilagi. 2Ingayi bwatatu musankwa wakapola kuswa kumisumba yakwe Saulo, kaafwete shakufwala shikwamookite alimwi abulongo mumutwi. Ndyaakashika kuli Defedi wakafukama cakushisha ciwa panshi mukumupa bulemu. 3Mpomunyaawo Defedi wakamwiipusha ayi, “Waswa kuli?” Lakwe wakakumbula ayi, “Ndaloboka kumisumba ya bene Isilaeli.”
4Mpeeke wakeepusha ayi, “Ndwiite, nciinshi cacitika?” Wakakumbula ayi, “Bashilumamba bene misheesu bakacica kunkondo, alimwi baanji bakacaikwa. Saulo aJonasani mwanaakwe boonse balifwite.”
5Lyalo Defedi wakeepusha musankwa wakamuletela nkombe ayi, “Ino weshiba buyani ayi Saulo aJonasani mwanaakwe balifwite?” 6Musankwa uyo wakakumbula ayi, “Nebo ndakacanikwaawo paKalundu ka Gilubowa. Ono ndakabonabo Saulo utooshimpila kulisumo lyakwe, beshikulwanina mushikoci sha maaki abeshikulwanina pamaaki bene Filisiti kabalibo pafwaafwi akumulimba. 7Ndyaakacebuka akumbona, wakangolobesha, mpeeke anebo ndakeepusha ayi, ‘Mulisuni ayi ncite buyani nkambo?’ 8Lyalo wakanjipusha ayi, ‘Ino ndiwe ni?’ Nebo ndakakumbula ayi, ‘Ndi mwine Amaleki.’
9“Mpeeke wakaamba ayi, ‘Kwesa kuno uncaaye. Ndacisikwa cibiibi alimwi ndi pafwaafwi akufwa.’ 10Aboobo ndakaya ndamucaya mukwiinga ndakalinga kumubwene ayi na awebo, utoofwa. Lyalo ndakabwesa mushini ngwaakalinga kufwete kumutwi wakwe ampatishi ya kumaansa akushileta kuli ndimwe nobaami bangu.”#1 Samwe 31:1-6; 1 Maka 10:1-6
11Mpomunyaawo Defedi abashilumamba bakwe boonse bakakwamoona shakufwala shabo kubuumba. 12Bakalila cakooloma akulikasha kulya kushikila macolesha ceebo ca lufu lwakwe Saulo aJonasani mwanaakwe alimwi alikoto lya bashilumamba ba Mwaami Lesa pantu pomwi amushobo wa bene Isilaeli. Bakacita boobo mukwiinga baanji bakacaikwa kunkondo.
13Lyalo Defedi wakeepusha musankwa wakamuletela nkombe iyo ayi, “Ino ulaswa kuli?” Alakwe wakakumbula ayi, “Ndi mwanaamuswamashi, mwine Amaleki.”
14Defedi wakamwiipusha alimwi ayi, “Ino webo cakuyumya moyo kwaamba ayi ucaye mwaami wakasalwa aMwaami Lesa nciinshi?”
15Mpomunyaawo Defedi wakeetawo womwi pabasankwa bakwe akumwaambila ayi, “Koya umucaaye ulya!” Mpeeke wakaya wamucaya. 16Defedi wakalinga wamwaambila kale ayi, “Ulu lufu waliletela omwiine. Walipa mulandu omwiine ndiwalyaambilila ayi wakacaya mwaami uyo Mwaami Lesa ngwaakasala kwiinda mukunanikwa mafuta.”
Lwiimbo lwakwe Defedi lwakulila Saulo aJonasani
17Mpeeke Defedi wakeemba lwiimbo ulu lwakulila Saulo aJonasani mwanaakwe, 18alimwi wakaamba ayi boonse basankwa bene Juda balyeelete kwiishikwa. Lwiimbo ulu lulembetwe mulibuku lyakwe Jasha.#Joshu 10:13
19“Nkombalume shako ocishi ca Isilaeli shamana katyenke patulundu twako.
Maawe baya basankwa beene beene!
20“Cikani ici mutakashimikili bene Gati,
nabi kucaambilisha mumikwakwa ya Ashikeloni,
mukwiinga inga bakondwa balutundu bene Filisiti,
ncakwiila inga basangalala balutundu abo bakunsengwe.
21“Ee, patulundu twa Gilubowa,
apakabule kulokelaawo mume nabi mfula,
apakabule myuunda kweenga kwaswa cipo ca shili anga ngamaila.
Ceebo mayawo a basankwa beene beene mpwaaselenkene apo.
Mbulya ono liyawo lyakwe Saulo talitoonanikwa amafuta.
22Buta bwakwe Jonasani bwalinga kununka lufu,
amupeeni wakwe Saulo tewalinga kucite nkumbu,
shalinga kooneka basankwa beshinkusu,
shalinga kucaya balwani baanji.
23“Saulo aJonasani balinga bantu bakondelesha alimwi basunikwi,
mubuumi bobilo akubulongo bobilo,
basankwa bacabeene anga ngumumbankwashi,
bacite nkusu shiinda nkusu sha nkalamu.
24“Nobanakashi bene Isilaeli amulile Saulo,
wakalinga kumufwalika shisani shiteshimite shisalala,
wakalinga kubotesha shakufwala shanu ashintu sha golodi.
25“Maawe baya basankwa beene beene! Bakacaikwa munkondo.
Ee, Jonasani ulikampeme mutulundu.
26“Jonasani mukwesu wancisa abuumbi kumoyo,
mukwiinga ndalinga kukusuni abuumbi.
Lusuno lwako kuli ndime lwalinga kukondelesha abuumbi,
lwalinga kukondelesha kwiinda aloolo lwa balutundu.
27“Maawe baya basankwa beene beene!
Shakulwanisha shabo sha nkondo shaloba!”

Currently Selected:

2 Samwelo 1: BBBLI

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy