2 Baami 1
1
Elija amwaami Aasiya
1Aabu mwaami wa bene Isilaeli ndyaakafwa, bene Moabu bakabukila bene Isilaeli.
2Mwaami Aasiya wakaloka pambwelyo ya cipinda ca peculu ca ŋanda yakwe muSamaliya akulicisa abuumbi. Lyalo wakatuma beshinkombe kuya mukwiipusha Baali Sebubu lesa wa kuEkiloni ndabala inene ya bene Filisiti ayi na ulaakuba kabotu. 3Sombi munjelo wa Mwaami Lesa wakaambila Elija mulaluki mwine Tishibe ayi, “Koya ukakumane abeshinkombe abo mwaami Aasiya mbwaakatuma akubeepusha ayi, ‘Sa nceebo cakwaamba ayi taamu Lesa muIsilaeli ncemutooita mukwiipusha kuli Baali Sebubu, lesa wa kuEkiloni?’ 4Ono Mwaami Lesa waamba ayi, ‘Omwaami Aasiya, teshi ukabukeewo kuswa pabulo bwako apo, ncakwiila ulaakufwa!’ ”
Elija wakacita bweenka bwakaamba Mwaami Lesa. 5Beshinkombe abo bakaboolela kumwaami. Lyalo mwaami wakeepusha ayi, “Ino mwaboolelamonshi?” 6Abalo bakakumbula ayi, “Twakumana amusankwa uyo watwaambila ayi tubooleemo akwisa mukumulwiita maswi aswa kuMwaami Lesa akwaamba ayi, ‘Sa nceebo cakwaamba ayi taamu Lesa muIsilaeli ncemutooita mukwiipusha kuli Baali Sebubu, lesa wa kuEkiloni?’ Paceebo ceeco teshi mukabukeewo kuswa pabulo bwanu apo, ncakwiila mulaakufwa!”
7Mwaami wakeepusha ayi, “Ino musankwa uyo walinga kuboneka buyani?” 8Balo bakakumbula ayi, “Walinga kufwete cakufwala ca booya peculu alimwi kaangite alamba wa cipaya mubukome.” Mwaami wakaamba ayi, “Anu nguElija mwine Tishibe!”#Mate 3:4; Maako 1:6
9Lyalo mwaami wakatuma mutanjilili wa bashilumamba pantu pomwi abashilumamba bakalinga makumi osanwe kuya mukucata Elija. Mutanjilili uyo wakamucana kashiite pakalundu akumwaambila ayi, “Omuntu wakwe Lesa, mwaami waamba ayi useluke.” 10Elija wakakumbula ayi, “Na ndi muntu wakwe Lesa, mulilo auseluke kuswa kwiculu akucaya ndiwe abashilumamba bako boonse!” Mpomunyaawo mulilo wakatenta mutanjilili uyo abashilumamba bakwe boonse.
11Mpomunyaawo mwaami wakatumako mutanjilili aumwi abashilumamba makumi osanwe abo bakaya mukwaamba kuli Elija ayi, “Omuntu wakwe Lesa, mwaami waamba ayi useluke bulya bweenka!” 12Elija wakakumbula ayi, “Na ndi muntu wakwe Lesa, mulilo auseluke kuswa kwiculu akucaya ndiwe abashilumamba bako boonse!” Mpomunyaawo mulilo wakatenta mutanjilili uyo abashilumamba bakwe boonse.#Luka 9:54
13Lyalo mwaami wakatuma mutanjilili watatu abashilumamba bakalinga makumi osanwe. Wakatanta peculu pakalundu, wakafukama kunembo kuli Elija, akusenga ayi, “Omuntu wakwe Lesa nyumfwileko nkumbu pantu pomwi abantu bangu boonse. Utatucaayi! 14Batanjilili bamwi bobilo ba mwaami bacaikwa pantu pomwi abantu babo boonse kumulilo wakaswa kwiculu, ono nebo nyumfwileko nkumbu!”
15Munjelo wa Mwaami Lesa wakaambila Elija ayi, “Koya anguwe, utaloondi.” Lyalo Elija wakaya amutanjilili wa bashilumamba uyo kumwaami 16akumwaambila ayi, “Mwaami Lesa waamba ayi, ‘Sa nceebo cakwaamba ayi taamu Lesa muIsilaeli ncemutooita mukwiipusha kuli Baali Sebubu, lesa wa kuEkiloni?’ Paceebo ceeco teshi mukabukeewo kuswa pabulo bwanu apo, ncakwiila mulaakufwa!”
17Aasiya wakafwa kweelana abwakaamba Mwaami Lesa kwiinda muli Elija. Taakalinga kucitewo baana basankwa, aboobo Jolamu mukwabo wakapyana bwaami bwakwe mumwaaka wabili wa bwaami bwakwe Jeolamu mwanaakawe Jeoshafati mwaami wa bene Juda.
18Shimwi shoonse shakacita mwaami Aasiya shililembetwe mumabuku a buumi bwa bamaami ba bene Isilaeli.
Currently Selected:
2 Baami 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.