1 Makabisi 1
1
Maswi mataanshi
1Alekisanda, mwanaakwe Filipo mwine Makedoniya, wakaswita ku cishi ca Kitimu, wakakoma Dalyasi mwaami waku Pesha a Mediya munkondo, akuba mwaami mumusena wakwe. Ciindi ico kaali watalika kale kulela cishi caba Giliki. 2Wakalwana nkondo shiinji, akunyaya ndabala shiinji shamuumbu, alimwi wakacaya bamaami baanji bandabala isho. 3Wakashika a kumelelesho a cishi ca paanshi pano akusaala buboni buunji bwa mishobo ya bantu. Lyalo cishi capaanshi cakekalabo tontolo mukunyumfwila bulelo bwakwe. Lyalo lakwe wakatalika kulisumpula akulitukumuna. 4Wakabunjika beshilumamba bayumu alimwi bacishi kulwana. Wakakoma shishi abamaami baanji, akubaambila ayi banoosonka misonko kuli nguwe.
5Pesule lyasheeshi wakaciswa, wakashiba ayi uli pafwaafwi kufwa. 6Wakeeta bacinenenene bakwe balemeneshekwa, nkokwaamba ayi babye abo mbakakulaabo pantu pomwi, lyalo wakababaanya bwaami bwakwe kaacili muumi. 7Alekisanda wakalela myaaka likumi ayobilo, lyalo wakafwa. 8Ono ndyaakafwa Alekisanda, bacinenenene bakwe bakatalika kulela womwi awomwi cishi ncaakapekwa. 9Bacinenenene balya bakafwala mishini yabwaami, alimwi pa shaaka shiinji banababo bakalela mushishi shabo. Aba mbombabo bakaleta shibiibi shiinji pa cishi capaanshi.
Antyokusi Epifanesi mbwaakaletela bene Isilaeli bwikaalo bweensu
10Mukoto lya bamaami aba mwakaswa womwi mubiibi abuumbi, liina lyakwe ngu Antyokusi Epifanesi, mwanaakwe mwaami Antyokusi. Pakutaanguna wakalinga musha mucishi ca Loma, pesule wakaba mwaami, mucaaka ca 137 cabwaami bwaba Giliki. 11Munshiku sheenka isho, kwakacanika bamwi bene Isilaeli bakalinga kusampula milawo, lyalo bakatalika kunyengelela babyaabo baanji. Bakalinga kwaamba ayi, “Katiya tukapange cipangano abantu bamishobo imwi mbotubambene abo, ceebo kutalikila ciindi ncotwakapatukana ambabo, tutocana mapesho maanji.” 12Makani aya akababotela bantu boonse. 13Lyalo bamwi, abo bakalinga kusunishi sheenka ishi, bakaya ku mwaami akumulwiita mbobakanyumfwana. Mwaami uyo wakabasuminisha kukonkela bwikaalo bwa mishobo imwi yabantu. 14Lyalo kundabala ya Jelusalemu bakayaka cibansa cinene cakusekaninaamo, pakukonkela bwikaalo bwamishobo imwi iyo. 15Bantu abo bakashiya tunshiyanshiya twabo, akukaka cipangano cisalalite cilya. Aboobo bakanyumfwana abatashomi kucita shiibi. 16Antyokusi ndyaakabona ayi bwaami bwakwe bwakalikana, wakayeeya kunungaako cishi Ijipiti, ayi anoolela mbuli bweenka mbwaalela ku Siliya. 17Lyalo wakabunjika beshilumamba bankusu, beshikweendela mushikoci, pa nsofu, abaabo batanta maaki amaato aanji, akuya mukulwana cishi ca Ijipiti. 18Wakatalikila kulwana amwaami Pitolemaisi mwine Ijipiti, Pitolemaisi wakaboolela pesule akucica, lyalo bantu baanji bakacaikwa. 19Bene Asiliya bakakoma ndabala shicite muumbu shabene Ijipiti akusaala buboni bwamucishi ico.
Antyokusi mbwapensha baJuda
20Ndyaakamana kukoma cishi ca Ijipiti mumwaaka wa 143, Antyokusi pakuboolela kumishaabo, wakaya alikoto linene lyabeshilumamba mukulwana bene Isilaeli kuJelusalemu. 21Wakenjila muŊanda yakwe Lesa mukulisumpula, akubwesa shintu shagolodi shakalinga pacipaililo, apakubika lampi kubikilisha ambale shashisho. 22Wakabwesa atebulu lya cimaande cipekwa kuli Lesa, shisalalite ambale shimwi shagolodi, shakutentelaamo tununkila shagolodi, shisani shakufwekelesha alimwi amishini yabulemu. Wakamatulula golodi woonse uyo wakalinga kumatitwe kunembo lyaŊanda yakwe Lesa. 23Wakabwesa silifa, golodi alimwi anongo shamutengo wapeculu, abuboni boonse bwakalinga kushisitwe mbwaakacana. 24Shoonse ishi wakatola kumishaabo. Wakacaya bantu baanji, akunokwaamba maswi a kusebaanya abuumbi akulisumpula.
25Kwakalinga malilo anene muIsilaeli moonse.
26baami abacinenenene
bakalilishaanya akuungumana.
Bacikula bwangu abamyooye
bakabula nkusu alimwi banakashi
kubota kwabo kwakamana.
27Bashibwiinga boonse bakafwala shabuumba.
Banabwiinga boonse bakalifweka shabuumba
mucipinda umo mobakalinga kushiite.
28Cishi coonse cakatutuma akuba aboowa
mukwiinga wabantu bancinco,
alimwi bene Isilaeli boonse
bakafwa nsoni abuumbi.
29Ndipakeenda myaaka yobilo, mwaami wakatuma shikweendelesha misonko kundabala shabene Juda, lyalo wakashika ku Jelusalemu alikoto lyabeshilumamba. 30Kweenka uko wakaamba maswi aluumuno sombi akalinga ngakubabeca. Ndyaakamana kubabeca boobo, wakeelwana ndabala iyo. Wakainyonyoola cibiibi, akucaya bantu baanji. 31Lyalo wakasaala ndabala iyo akwiitenta. Wakawisha maanda aayo, alubumbu lwakalinga kwishingulukite. 32Banakashi abaana wakabatola busha alimwi wakasaala shifubwa shandabala iyo.
33Pesule lyasheeshi, bakayakulula alimwi ndabala yakwe Defedi akwiishingulusha alubumbu luyumu amaanda alaamfu ayumu, yaba yakutabilisha kunkondo. 34Bakakalikaamo bantu bacita shibiibi, batakonkeli milawo. 35Bakalicinjilisha mumaanda alaamfu ayo akubikaamo shitabatisho shankondo ashakulya. Shoonse isho shibakasaala kuJelusalemu bakashibika mweenka umo. Paceebo ceeci bakacita anga bateya koonse kabiibi.
36Maanda alaamfu akaba ciyubilo Ŋanda yakwe Lesa,
cilwanino cabantu babiibi myooyo
beshikulwana bene Isilaeli ciindi coonse.
37Bakacaya bantu batacite mulandu
bakalinga kushingulukite Ŋanda yakwe Lesa.
Bakabisha aMusena Usalalite.
38Bantu bene Jelusalemu bakacica kuloonda mbabo,
paceebo ceeco ndabala iyo yakaba
musena wabantu beensu.
Yakaba yeensu musena kubeshikulu
akubaanababo abo bakacica.
39Ŋanda yakwe Lesa yakaba anga nduyanga.
Nshiku shacisangalalo shakaba shamalilo.
Nshiku shabo shakookesha shakaba shamusebaanya,
alimwi bulemu bwanjiyo bwakalensha nsoni
40Musebaanyo wakakomena bweenka
mbuli mbobwakalinga bulemu bwanjiyo
cisangalalo canjiyo cakaba buumba.
Kusuminisha kulambila bantu bakunsengwe
41Pesule lyasheeshi mwaami wakabika mulawo mucishi cakwe coonse, kwaamba ayi bantu boonse babe womwi, 42bacileeke kukonkela bwikaalo bwabo. 43Lyalo bantu bamishobo imwi bakasumina mulawo uyo wamwaami. Nabi bene Isilaeli bamwi abalo bakatalika kukonkela mulawo akulambila kweensu, bakalinga kupa shakutenta kutulesa twakubeca, kubisha bushiku bwa Cibelu.
44Kuswawaawo mwaami wakatuma beshinkombe kuJelusalemu alimwi akumishi yabene Juda kutola makalata. Wakapingula ayi banookonkela bwikaalo buumbi, ubo bwakalinga bweensu kubantu ba mumandabala ayo. 45Wakabakasha kupa milambu yakutenta, yabusu alimwi ayashakunwa kuŊanda yakwe Lesa. 46Wakabakasha kulemenesha nshiku sha Cibelu ashinku shacisangalalo, akubaambila ayi babishe Ŋanda yakwe Lesa pantu pomwi abasenshi bakwe. 47Wakabaambila ayi bayake shipaililo, akuyaka twaanda twakulambilaamo tulesa, akunoopa milambu yankumba anyama shimwi shitasalalite pakulambila. 48Wakabaambila alimwi ayi banababo batanoopalulwa, kwaamba ayi batatambulwi kuli Lesa, 49ayi balubeeko milawo basandule bwikaalo bwabo boonse. 50Wakamanisha akwaamba ayi, uyo weeshi akabule kunyumfwila akukonkela mulawo wamwaami ulyeelete kucaikwa.
51Mwaami wakalemba milawo iyi akwiitumya kubantu boonse mucishi cakwe. Wakatuma beshikweendelesha milawo iyo. Wakaamba ayi bantu beekala mundabala shabene Juda banoopa milambu kutulesa. 52Mpomunyaawo baJuda baanji bakacileka kukonkela milawo yabo akutalika kunyumfwana bantu bakonkela milawo yesu, akunoocita shibiibi mucishi. 53Bwikaalo bubiibi ubo bwakalengesha ayi bene Isilaeli batakwe kukonkela milawo iyo bacicile mumisena ipusene pusene mobakalinga kukonsha kuyuba.
54Mubushiku bwa 15 mweenshi wa Kisilefu, mumwaaka wa 145, mwaami wakapanga cintu cileensha nsoni akucibika pacipaililo apo mpobatula milambu yakutenta. Bantu aba bakayaka shipaililo mundabala yabene Juda akumishi ili pafwaafwi. 55Bakalinga kutenta tununkila kabotu mumilyango ya maanda amumikwakwa. 56Mabuku oonse milawo yakwe Lesa ngobakacana, bakakwamoona kwaatenta. 57Pakukonkela mulawo wa mwaami, muntu woonse wakalinga kucanika ulicite Libuku lya Cipangano, nabi utookonkela milawo iyo, wakalinga kucaikwa. 58Myeenshi yoonse bakalinga kubapensha Isilaeli abo bakalinga kucatwa mumandabala.
59Mubushiku bwa 25 bwa mweenshi, bakalinga kubenga milambu yakutenta pacipaililo cilya. 60Pakukonkela mulawo wamwaami, bakalinga kubacaya banakashi bakalinga kupalula banababo, 61kababaangite baana munshingo, bamana bakalinga kucaya boonse beshikamukowa babanakashi kubikaawo abeshikupalula. 62Sombi bene Isilaeli baanji bakaliyumya akukaka kulya shilyo shitasalalite shakatulwa kutulesa. 63Basumina kucaikwa, mukukaka kulibisha acakulya citasalalite nabi kupwaya cipangano cisalalite, paceebo ceeci baanji bakacaikwa. 64Bwakalinga bukali bwiindaawo bwakwe Lesa bwakawita bene Isilaeli.
Currently Selected:
1 Makabisi 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.