Filemoŋ 1
1
Me tsey guma ta me sərey vaw
1Yah Pol, i da daŋgay hərway ma Yezu Kriste, ta malam a ɗaw Timotey, i windar a Filemoŋ, mandala la ma meslərey, na la ma wuɗama bəza kakay ana, 2ta Afiya malam ala diŋgwas ana, ta Arsip mandala la ma vərom, ta Egliz ana ma tsəhey 'ar da 'ay ɗek ana. 3Hayna ndzafam hahaya ta zozoy da har ma Bay ma Bəla Baba lakwa, ta Bay’ərlam Yezu Kriste.
Ma wuɗa vaw ta me pey 'ar ma Filemoŋ
4I madara sise a Bay ma Bəla a ɗaw zarra da me ɗuley mey ɗaw na, i sləfaka ha. 5Hərway i tsənada ha a tsam aha ka ma wuɗa vaw ɗek, ta me pey 'ar eɗek ka Bay’ərlam Yezu ta ndaw kokwaɗ ana hay tabiyaha. 6Hayna ma vəlada vaw ɗek ana a me pey 'ar ana na ka vəɗey: haya tok na, ɓada tek a lakwa hayna hay tabiyaha ma slafakwa me key hərway ma Kriste na. 7I ka ndzefey wuiya ba ɗuhwa ha ta ma mey 'ərev, hərway ma ma wuɗa vaw ɗek malam a ɗaw, kah na ka matar 'ərev ba a ndaw Kokwaɗ ana hay.
Hayna Filemoŋ ka ŋgəla Onezim mambay mambay aha
8Kwa andza ta Kriste na, slam har a ɗaw daha ma tsaka ka tek eɗek na a dafa kah ka kata na hay, 9amana, tek a neney i ma da tsəhafaka na na, ha ka da ma wuɗa vaw. Ayaw yah a neney tsoy i maraw aha na, yah ana ekəɗey da daŋgay hərway ma Yezu Kriste na, 10i kaka amboh na, hərway ma wawa ɗaw Onezim, na i ma ndzafawa da daŋgay ana, 11da me pey 'ar aŋga zlekete a nafaka ha kakay, ama ekəɗey na, a nefey ka dəba, a kah, kalkal andza a yah ana. 12I sləradəkaɓa sa, ŋga neney kal kal andza mevel a ɗaw ana. 13Akwa na i ka slafa na i ka pada, ka ndzaya tek a ɗaw, ka kaya meslərey da mey ɗek, da daŋgay ana i da huɗa kavəday ma Mey Wayna na; 14amana i ka wuɗey me key mandzara kah ka vəlaya slam har kakay, ma hahaya na ka da nəkey andza i təkaka ɗay zlay, ama ka sawa na da mevel eɗek ana, andza na ŋga ɗek me wuɗey ana. 15Ka zəgawa ba Onezim a mbəkadəkawa na, me mendzey nekəɗey, aza ka da madəməkaɓa tek eɗek ma mambaŋ aha. 16Amana, andza beke ha sakay, a fəna sa na, andza malam kah ma wuɗa bəza kakay ana. Ka yah na, ka kafaya ba a fəna malam sa, ka kah ana na a da kafaka a fəna sakay na teŋgey? Ŋga ndaw aha təŋga, ŋga kretieŋ aha sa. 17Haɗaw ka nəkafaya na andza i malam a ɗek aha da me pey 'ar na, ŋgəla na, andza ka ŋgəley yah ana. 18Kendzey andza ka ŋgəsaka ba na, dakay gwedere ɗek ka ŋga daha na, mbəkada ka 'ar a ɗaw ana. 19Ma windəkaɓa na, yah ana Pol ta 'ar a ɗaw ana, ma da warkadaka na yah ana - Akwa i ɓadaka dzay sakay, sərafa na, kah ana tiyatsa na, gwedere ɗaw ka kah daha, gwedere na na, bay 'ar ma vaw ɗek ana. 20Ana ŋgey malam a ɗaw, kadaya meslərey a neney da mezəley ma Bay’ərlam, maya mevel ta Kriste. 21I windəkaɓa na, i ma pa 'ar aha ka me tsəney sləmay ɗek, i sərada ha ka da key na a fəna na i ma tsəhafəkaɓa na sa.
Me tsey guma a 'ar ta me tsey guma a vaw
22Satsa na, ləmaya 'ay me ney: i ma dzala na, kuse ma me ɗuley mey kwar hay na, a da kələdəmiyaɓa tek a kwar. 23Epafras mandala ɗaw la da daŋgay tsetsuwe hərway ma Bay Yezu Kriste na, ka tsadəkaɓa guma. 24Ka zəgawa andza Mark, Aristark, Demas ta Luk, ndaw na la ma kam meslərey dzaya na hay. 25Hayna hahaya ma Bay’ərlam Yezu Kriste ka ndzey ta kuray.
Currently Selected:
Filemoŋ 1: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun