Zud 1
1
Me tsey guma a vaw
1Yah Zud, gawla ma 'ay ma Yezu Kriste, i malam ma Zak, i windatar a ndaw ma zəlaya na hay, na Baba Bay ma Bəla ma wuɗata na, ma wa ahiya vaw ma Yezu Kriste ana hay. 2Hayna me sey yam, zozoy ŋga, ta ma wuɗa vaw ŋga ka safəkurawa haɗadzidzay.
Ndaw me tetəkey hayakakay ana hay
3Dzam a ɗaw hay, akwa na a saya ha ma windəkuraɓa ndok ndok, ka guma ma me buwey a neney, lakwa da huɗa tabiyaha na, i ma nəka na, sey i ka windəkuraɓa təŋga, ma aza ka səmadakwar da me kəɗey vaw hərway ma me pey 'ar, na ma tsadəmatərawa a ndaw kokwaɗ ana hay ma tsoy aha na. 4Hərway ma mey na, ndaw hay daha ka fuləkumaɓa ba, ta mahal aha a walaŋ a kwar, me dzuwey ta na na, ma winda ha ba zla ka vaw, ma zləɓa vaw ahiya na, a mbəɗadama hahaya ma Bay ma Bəla ba, ta me tsəley so, arka na, a mbəɗamar mey a Miter a lakwa asləta na, Bay’ərlam Yezu Kriste na. 5Hayna i madakwar kuray ka sərafama, kwa kuray ka səradama tabiyaha ma tsoy aha, Bay’ərlam ma buwərawa səkway ŋga da dala ma Ezipte, arka a dəba na na, ma bazlata ndaw ma pam 'ar kakay ana hay ba. 6Madurlam na ma wuɗam ma ndzam da meslərey ta kakay ana hay, ama ma mbəkadama 'ay ta ba na hay na, ma darzlaya, ma dzuwaya ta tsalalaw ma tsoy aha da ləvaŋ, ha kasl ka Pas ma sariya ɗuhwa na. 7Mandza Sodom ta Gomor ta sama wurow ana ka tsakay ta na hay, ma vəladama vaw me key madama andza ha na hay na, ma kam tek ta tsəveɗ kakay ana hay na, a ndalamam aha da waw me ndəvey kakay ana hay na, ka tərey tek me tsey dey kava, ma hətada ndaw aha. 8Ndaw ana ŋga na hay na re andza hiya satsa, da kəlew kəlew a ta na na, a zləɓadama slaw vaw ta na, a rəsama ɗuhwa ma 'ərlam, a tsaɗama maram ma ’ərlam hay. 9Kwa bay ma madurlam hay Mikayiel tekeɗe na, da me kəɗey vaw ta, ta Sataŋ, ma təram vaw ka vagay ma Moyiz na, ka slafa ma kafa sariya ta me tseɗey aha kakay, ama a ləvar tsa na: «Hayna Bay’ərlam ka hətaka.» 10Ama ndaw ana ŋga na hay na, tek na taya ma səradəmata kakay ana hay tsa na, a tsaɗam tsa, a səradama na kəɗeyya dada, andza ma gənaw me sərey tek tsana, tek ana ŋga na na, a da nafatar na, ma ma zəɗada vaw ta na. 11Taya na ka tuwam vaw ta, kavəday a səpəmawa na tsəveɗ ma Kayieŋ, ma tek ma merɓey na, ma vəladəmara vaw a me zəɗey ma Balam, arka taya ma bazlam da ma tsawa vaw mandza Korey. 12Ma ŋgəsadəmakwar tek me zəmey kwar andza malam hay na taya, kendzey andza a zəmam tek na, kambəlaɓa, a slurɓam tek ana na, mandzara hwaray ka katar, taya na andza pazlay mandzara yam ana, na memeɗ ma həlawa na, vəɗe tek ma 'ar mesəfey mandzara ka yam bəzey ana hay, ma mətsaya dey tsew, ma balŋgwaɗaya ba. 13Ɗaŋgwala ma yam ma vənəhawa ma zarnay ma hwaray ma bay'ar ma vaw ta na, wurzla ma halam so na hay ma paya ma kwozaha ma ləvaŋ tekəɗe feŋfeŋ ana. 14Enok satsa na, ma tsawa guma andza ma ndaw sek na, ka taya, ŋga ndaw ma tsəla na ma zlawa ka Adam, ŋga me ləvey: Nəkafama Bay’ərlam a sawa ha ta sidzew aŋga kokwoɗ ana hay, 15ma da ka sariya ma bəla tabiyaha na, ma da husatar waway a ndaw ma zləɓa na hay, da me zləɓey ta na, ma kamar malay a Bay'ərlam ta guma ma ma rəsa vaw ma ndaw ma ŋgəsa na hay, ma zləɓa hiya na ma tsafama na. 16Na ŋga na na, taya təŋga ndaw ma dzendze hay, ta ndaw me gweŋguɗey mey hay, ma kəlatar ka mey na tek me sey ta, ma bawa da huɗa mey ta na gandala ma guma hay, a da ɗamar ndaw a ndaw na, sey ka tek ata ma da ndzefey ka ŋga daha.
Me həley bəzay a ndaw me pey 'ar ana hay
17Kuray tey na dzam a ɗaw hay, sərafəmata ka guma ma maslaŋ hay ma Bay’ərlam a lakwa Yezu Kriste, ma tsəməkurawa zla ka vaw ana hay. 18A ləvəmakurawa na: «Da har ma bəla madakwaydok ana na, ndaw me səŋgərey dəla da 'ar ma ndaw hay na a da kam daha, ma da kəlatar ka mey na tek ma sey ta, hayakakay ana.» 19Na ŋga na na, taya tok! A sadəmərawa me tsey vaw, me dzeley 'ar ata na ma dala ɗey, Mesəfrey da taya dakay. 20Ama kuray ŋgey dzam a ɗaw hay, ləmadama vaw kwar na ka me pey 'ar a kwar kokwoɗ ana, ɗulam mey da Mesəfrey Kokwoɗ ana. 21Dzaɗama vaw ka'ar vaw kwar ana, da ma wuɗa vaw ma Bay ma Bəla, padama me pey dey kwar na, da ndaw ma kar da vaw ana ma Bay’ərlam a lakwa Yezu Kriste ma mendzey me ndəvey kakay ana. 22Ndaw me dzeley ’ar ka vaw tsew tsew ana hay na, ka kəmakwar da vaw; 23buwəmatərawa da mey ma waw, sa ma ndaw ana sa na hay na, ka kəmakwar da vaw, amana ta me wesey aha, kəmatar tsakay, ha kasl ka zana ta na, vaw ta ma tsəlafa luweɗ ana.
Me Səmbərey madakwaydok ana
24A ndaw ma slafa ma nəkafakwar dey ha təɗam zlay ana, ma da padakwar mandzara meŋgəsey ka slam dey ma me wezley dey ŋga da wuiya, 25a Bay ma Bəla asləta na, ŋga Mebuwey lakwa, ta Yezu Kriste Bay’ərlam a lakwa, a wezley dey, ŋga ɗuhwa ha, a slafa tabiyaha, Bay aha zla da me zley ma bəla, ekəɗey ana, ha ma kwoza ha. Amen!
Currently Selected:
Zud 1: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun