Zaŋ Me key ka ’ar ɗaf ma guma
Me key ka ’ar ɗaf ma guma
Mey Hayna Wayna da Zaŋ ma winda ha dey ta kava na a kominite ma kretieŋ hay ma ndzaya da Syri, dakay na da Azi bəza na, na ma zəlamar turki ekəɗey ana. Ɗeriwel ana ma ka ha na, tek ana da huɗa na, ta guma na ma tsey ana na, gəle ta ɗeriwel ana sa na hay. A nəkey dey ɗoh na ka tek ma kəzla na ma guma hay ta mber ma Yezu hay.
Tsakay ana tsəfəmey ana ma ɗeriwel ana lamba ɗuhwa na 1 kasl a 12 a təkərey na tek hay tsəla me rəzley ndaw ana hay ma Yezu me key ana. A zələmata na zeheɗ hay zləna, kavəday a ɓadama Yezu na Bəzey ma Bay ma Bəla. Tsakay a neney satsa na a ɓada me zley ’ar ma Yezu ta ndaw hay, padakwa na andza ma ta ta bay me kuley ma Zuif hay ana daha (lamba ɗuhwa na 3) ta ŋgwas Samarie ana daha (lamba ɗuhwa na 4) ta ndaw dzedzey ana hay (lamba ɗuhwa na 5 ta 9). Da me tetəkey ndaw aŋga na, Yezu a ɓada vaw ŋga na andza peŋ me vəley mendzey ana, andza ndaw me tsukurey ma kusata ndaw hay ’ar ’ay Bay ma Bəla Baba, satsa na, waw me nəkey dey ma bəla ha. Kəɗey na, Yezu a ɓadatara a ndaw hay tabiya ha ŋga na na way.
Tsakay me tsetsew ana ma ɗeriwel ana (lamba ɗuhwa na 13 kasl a 21) a ləmada, a təkəra har ma Yezu ma da mbəkada bəla ɗey, ma da daway ’ar ’ay Baba ŋga. Yezu a tsatar guma a gawla ŋga hay, a tsatar guma a ’ar da har andza a da key ŋga ta taya sakay ana (lamba ɗuhwa na 13 kasl ka 16). Arka na Yezu ma ɗular mey a Bay ma Bəla Baba ŋga, arka na ma vəladatara gawla ŋga hay a huɗa har aŋga (lamba ɗuhwa na 17)
Bəzay ma guma na hay ma kəmawa, ma tsam ka memətsey ma Yezu ana na (lamba ɗuhwa na 18 ta 19) tek hay gəle gəle haɗadzidzay ma dzəmadata asləta ta na ma ndza Matiyew, Mark ta Luk ka bəzay ma guma na hay asləta.
Ta pas ma Pak na, Yezu ma ɓatar vaw ta dey a gawla ŋga hay (lamba ɗuhwa na 20 ta 21). Ndaw ma windərawa ɗeriwel ana a ləvey na andza neney: a winda ɗeriwel aŋga na na, ma ndaw ka nəkadama Yezu kakay ana hay na, ka pam’ar taya tiyatsa, ka ŋga (20.29 kasl ka 31).
Mey Hayna Wayna da Zaŋ a tsey zarra ka Zuif hay na andza ka ndaw ana hay ma tsəhaya gəle. Bəzay ma guma na a ɓey na ka ndaw dugwan ma Yezu hay, ɗoh na bay me kuley hay, a ŋgəladama dey kakay. Yezu ana ta ’ar aŋga na na ndaw Zuif, ta gawla ŋga tsəfəmey ana hay dzay tiyatsa. Andza Zaŋ a tsey aha ka Zuif hay na, bəzay ma guma ŋga na a tsa, a ɓey na ma ndaw ma dala na hay tabiya ha kakay. Guma na a nəkey dey na ka mendzey ma ndaw hay tabiya ha, na ma ŋgəladama dey ta Yezu Kriste kakay ana hay.
Ɗeriwel ma Zaŋ na ka tsey ka ma yawa ma Yezu kakay, kwa da ma zlar ma ɓatar vaw ŋga a ndaw hay ana kakay, ama na da mezley ma guma ŋga na zaɗaɗa na na, a wandzalada waya Yezu Kriste, na mey ma Bay’ərlam aha na, ŋga daha ta Bay’ərlam zla ma kwa za ha (1. 1 kasl ka 18) Yezu ndaw na mey ma Bay ma Bəla ha na na, ma sawa ma da ndzam ta ndaw hay. Kəɗey na, ndaw hay a slafama ma tərey bəzey ma Bay ma Bəla ahiya. Da mendzey ŋga ka dala na, Yezu ma ndza ha ma zəga har ahiya ka vaw ta Baba na, haya haya ha. Ŋga na Bəzey meslərey ma Baba ka bəla. Mendzey ma ndaw tabiya ha na ma səpam Bay ma Bəla da ma wuɗa vaw ana hay na, a slafama ma səradama ta har aŋga.
Currently Selected:
Zaŋ Me key ka ’ar ɗaf ma guma: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun