Sin Ji 1
1
Kuti ngi gi slra ti ɓi mijeŋŋe
1Kum mizli miwi ruwuyoy, wuɗam gi gwat mijeŋŋe,
wulukam wuluk misi ti jiviɗ naŋ ɗalla vur Bumbulvuŋ,
sipaka Buymisemuŋ ti mevel purla.
2Asi mike na, Buymisemuŋ a pula vu naŋ da mizli macam a kwacay naŋ ta, a lumakaŋ,
mbur matuɓaŋ manja sli hima na, a bugaŋ vu.
3Wuluk mikasl ta na, a guhu gwah avi Buymisemuŋ avra,
yo mbur gilaw maci a kwacay naŋ na, gidaŋ naŋ a taˀaŋ mi lek.
4Sin mijileŋ anta ci ar mevel ngi mbur misi wuluk malambaˀa ta,
mbur misi mungra a funaŋ gidaŋ le na, n’anta ndir ar naŋ ta.
5Asi ˀUf ngi Buymisemuŋ madubuna gwat da mizli na, a kil kileŋ avi tikina vu,
a kirih avi mizli misi wuluk ngi gilawaya,
a hirsa mbur magi gwat mijeŋ ta.
6Sin mijileŋ, naŋ ti wuluk mezleŋ vur mizli,
yo mbur magi mbaɗa ar Buymisemuŋ na, anta pula mbak kine, manja a kutaŋ ti bonoyo ta, asi Buymisemuŋ a ga sedewo ngi gwat ngir mevel naŋ gu, a sina ɓi mikaslsla ngir mevel naŋ le, yo a ra cina ɓi naŋ maɓa gar. 7Haˀaw, ˀUf ngi Bumbulvuŋ a naha ruwuyo le,
si gazlavay kurzluˀ gar misi asi haŋ naŋ tuwa na, mbur muwuna mi le gar na, a sina le.
8Mbur maɓi mi ngi sliŋ gar na, anta cuh manja a sina ta,
yo n’anta sa ngir avi kiita ngi kuti ti bonoyo ta.
9Buymisemuŋ a saka virzi ngi wuluk ngi mizli mizirɗa miheye, mingiɓi taŋ maɓaka na, a sa ndil seŋseŋ avi Bumbulvuŋ, masa buga malambaˀ taŋ, i nah. 10Buymisemuŋ a ro slimiɗ jakka, a ra cina ɓiheye gar, ko maɓaka yaŋŋa nga slimiɗ mbur kwana, a sina le. 11Jam lesl avi mingiɓi misi ti ruwuy ti ruwuy, mapul gir da mbur ta na, da ki wuɗam cikislaɓi ta na, gicaka me kap, asi ɓi miɓa yaŋ yaŋ na, anta ndir teˀ manja gwat naŋ a gi ta, yo mbur maji ɓi da mizli na, a kiɗa mbur nah vuna vagay.
12Ki gam lambaˀ lambaˀ ngi luma muc ta, ki gam gwat ngi ziza hutuŋ kum ti haŋ kumo ta. 13Anja ki sinaka sin le, miga muco i Buymisemuŋ ta, da mizli titirahay a ra mucam na, anta ciraŋ hiri ta. 14Asi a ga gwatay gar ɓa a ndiram ti siifa. Gwat naŋ miga ar duniya gar na, i ngi laha siifa, muwuŋ ngi kiɗa mbur vagay anta anga ta, yo muco, gidaŋ nga naŋ, naŋ a ruwuy ta. 15Asi gi jeŋŋe i gwat mamuc ta.
Wuluk ngi mizli mizirɗa mi ngi Buymisemuŋhoy
16Amma mizirɗa mihey a zilaka muco, a vurkakaŋ ti vuruk waɗ a zilakaŋ zile ma. A purakakaɓa ngama taŋ, a wuɗam haɗa wãˀ, joˀ a jumomˀay ati naŋ. Na a ndilaka le ɓa a ndiram da naŋ gisiŋ.
Currently Selected:
Sin Ji 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.