YouVersion Logo
Search Icon

ƁIMUNJUYO 1

1
Zlivirzi ngi ɓi
1Gwatay magam na, Yesu Kristu a njika taŋ le ar li babara. Gwatay masa gam gweˀ na, Buymisemuŋ a pulaŋ ɓi nah ɓa a biga da gawla naŋhay. Kristu a slina modro naŋ ng'avi gawla naŋ Zaŋ, ɓa a bigaŋ ɓi nah. 2Gwat Zaŋ mupura gar na, a biga le njah kaɓa i ɓi ngi Buymisemuŋ, yo i sedewo Yesu Kristu minjikaŋ di. 3Mbur maslufa ɗerewol hana, kay, naŋ ar wuya! Mizli macinam ɓi Buymisemuŋ manjika hana na, waɗ mutohoko angi ɗerewol hana gar, a jaka a hirnga na, kay, taŋ ar wuya, asi hin a ndilo le gweˀe.
Ji haŋ da cikil ngi misikristuhoy ar lihey taˀ taˀ tarnaˀ
4I ya Zaŋ matoho ɗerewol hana da cikil ngi misikristuhoy ar lihey taˀ taˀ tarnaˀ angi hirwuy Azi. Anja ki lumam gimezle ati zuy tivu Buymisemuŋ misi dana, misi zleˀe, waɗ masa sawa. Yo tivu ˀuf mitarnaˀhay, misi aciki li cifi ngi zumabuy naŋ na. 5Waɗ tivu Yesu Kristu, mbur migi sedewo mikaslsla, modogom mislikiɗ dumbuŋ ti wuzla mumucahay, yo Buy miwi buy madiɗa ngi ruwuyoy.
Kristu ara wuɗ ndra, a tuɓo ndra le tivu mungra ndraˀahaya ti pumbus naŋ. 6A vula ndra zumabuy, yo a tiri ti ndra masayay ngi gi mikuli da Cine naŋ Buymisemuŋ. Anja mizli a gakaŋ dudok, yo a sinaka, naŋ gidaŋ, hã ngi set, ngi samadin! Amin. 7Puraka, ara sawa a wuzla gazlavay. Mbur gar a sa puraŋ, ko mizli mizligakaŋ gor njoŋ na kwana, a sa purakaŋ. Haˀaw! Sukwi ngi mizli ngi ruwuyoy gar a sa tuwam tuwuy ngi vagay ˀirslik ˀirslik aseˀe. Amin!
8Bumbulvuŋ, Buymisemuŋ a ɓi: «Yi Alfa, yi Omega. Yi Buymisemuŋ misi dana, misi zleˀe, masa sawa, yo misi gidaŋ wãˀ.»
Zaŋ mupura Kristu ti kleŋ
9Ya Zaŋ, sukum kum. Ar ya mujom ati Yesu Kristu na, y'ada ati kum angi bonoy, angi zumabuy, waɗ angi ɓusaɓi ma. Ya ar matura ngi Patmos, asi ɓi ngi Buymisemuŋ waɗ asi ya magi sedewo ngi Yesu. 10Ti hin ngi Bumbulvuŋ na, ˀUf Mipal a so angi ya, dar yi cin ˀay kaɓa ngi mbur maɓi ti dirba ɗu ti gidaŋ, a cin ka tulum, 11a ɓi: «Gwat ka mapura na, toho angi ɗerewol, yo slin di da cikil ngi misikristuhoy misi ar lihey taˀ taˀ tarnaˀ: a Efez, Simirna, Pergam, Tiyatir, Sardes, Filadelfi, waɗ a Lawdise.»
12I mbiɗi hiri ɓa i pura, da maɓiy vuna i waka na, pulaˀ na, keɗ na, li ɗuva lampehey tarnaˀ, mipa taŋ ti ɓiri tapasl tapasl, 13waɗ mbur mubam vu ati Managal ngi mbur deŋ a wuzla li ɗuva lampehey mitarnaˀ tuwaŋ. A ki jibe silmir sesẽŋ a ruwuy. Kanda ngi ɓiri tapasl tapasl, hir a didaka. 14Hirnga naŋ ati himac hirnga naŋ, babara tullo ka ngwic ngi tumuŋ babara, naŋ ka gugumay. Hiri njilim njilim kaɓa vu. 15Saraya kaɓa ɓiri gaza mikuleɗ kuleɗ mupaka ti pi. ˀAy naŋ maɓi na, a cin kaɓa hurum ngi yam angi mubuliy madiɗa. 16Wurzlaŋhay tarnaˀ a hur haŋ hazum naŋ, yo maslalam muyoŋ mi, mazum ti ka ti ka, ara bo ti balama. Mihiri naŋ wilik wilik kaɓa pas mazlum ti wuzla papas. 17Ti ya mupura keɗ na, yi diɗ simtiraˀ asi sar naŋ ka mumuca. A buca haŋ hazumo bac angi ya, dar a ɓiy: «Ki zluwun ta, yi mudumbuŋ, yi ngi dirba, 18yo ya ti siifa. Yi muc le zleˀe, amma pura, y'ani ti siifa hã ngi sete. Lakle ngi muc ati ngi li cifi ngi mizli mumucahaya, naŋ asi haŋ ɗu. 19Gwat ka mupura ati ka mapura magi wurenna, waɗ masa gi a dirba gar na, tohoŋ. 20Wurzlaŋhay mitarnaˀ, ka mupura taŋ a hur haŋ hazum ɗu, yo li ɗuva lampehey mitarnaˀ mipa taŋ ti ɓiri tapasl tapasl na, ɓi muɗum ngi raˀa n'ani: Wurzlaŋhay mitarnaˀ na, i modro ngi cikil ngi misikristuhoy ar li taˀ taˀ tarnaˀ, yo li ɗuva lampehey mitarnaˀ na kwana, i cikil ngi misikristuhoy ar lihey taˀ taˀ tarnaˀ.

Currently Selected:

ƁIMUNJUYO 1: BEGDC

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy