YouVersion Logo
Search Icon

FILEMOŊ 1

1
Ji haŋ
1I ya Pol, ya mbur dangay asi ɓi ngi Yesu Kristu, waɗ sukum ndra Timote matuhukuw ɗerewol hana da ka Filemoŋ, ka ngama ndra muyummo, ndra magam slra bummoˀ, 2yo da mizli ngi Kristuhoy makusom a hay ɗike, da Apiya, sukum ndra mongoso, waɗ da Arsip, cil ndra, ndra macikam vu bummoˀ. 3Anja Cine ndra Buymisemuŋ ati Buy ndra Yesu Kristu a gukum mezle, a vulukum zuy.
Wuɗavu ati tiɓi ngi Filemoŋ
4Filemoŋ, da ya mira dir dibiɗ gar na, i ra ga sise da Buymisemuŋ ɗu asi ka. 5Asi i ra cin maɓaka ɓi ngi ka mawuɗ mitiɓihey ati ka matiɓa Buy Yesu Kristu na. 6Anja tiɓi ɗik mujom ati ndra na, a gi slra mezle wãˀ, gimezlehey ndra magaka taŋ gu tisi Kristu na, biga taŋ gar. 7Sukum ɗu, wuɗavu ɗik na, a vuliy mumul le, yo a tisliy mevel le haɗi si, asi ka muvula gidaŋ da mitiɓihey na.
Pol mutumbulo Filemoŋ asi Onezim
8Naŋ kine, tisi Kristu na, jiviɗe naŋ baŋ, ɓa i ɓuw ɓi ngi gwat ɓa sey ki ga. 9Ya macufuɗuw na, asi ya mawuɗow. Haˀaw, ya midigila Pol, yo wurenna, yi mbur dangay asi Yesu Kristu. 10I ra tumbuluw vur mangal ɗu Onezim, asi yi tiri le kaɓa cine ar dangay aka. 11Zleˀe na, anta puluw gir ta, amma wurenna, ara pula ndra gir cuw ndra. 12I ra slunuw di a muŋ, naŋ kaɓa i tanday ɗu. 13I wuɗ le zleˀe, ɓa naŋ da aciki ɗu aka, ar dangay ya mazuma asi Ɓimezle na, ɓa a jiniy ar deɗe ɗike. 14Amma i ngum gi gwat kanah ko neˀ ta, sey da ka mupuliy jiviɗ le. Y'anta wuɗ tukuw ˀay ɓa ki giy mezle ta, amma anja ki ga kaɓa ka mawuɗo.
15Asinta, Onezim mupuluw na, ngi hin neˀkini si, ɓa kisa luuma a muŋ, a ndir avu ka wãˀ. 16Anta ka beke mata, amma naŋ zuwen angi beke: I sukum ɗik misikristu ka mawuɗaŋ. Yi wuɗaŋ haɗa, amma kisa wuɗaŋ haɗi fineˀ ya ma, anta asi i mburo si ta, amma asi i sukum ɗik misi Kristu ma gar.
17Da ki puriy le kaɓa yi sukum ɗik mitiɓi so na, tiɓaŋ a hay ɗike kaɓa i ya vuna si. 18Da a guw malambaˀ le zleˀe ɗaˀa, malla ko da duvus ɗik ada ava kwana, kisa cufuɗa avu ya. 19I ya Pol matuhuw di ani ti haŋ ɗu: I ya masa wurkuw di. Ka kwana, duvus ɗu ada avu ka ya, i hirnga ɗik vuna, y'anta muw hiri nah mata. 20Haˀaw sukum ɗu, ambuh, jiniy ar ɓi hana tisi Bumbulvuŋ. Tisliy mevel asi ndra mujom ati Kristu. 21Ɓi ya mutuhuw di hana, i si na le gisiŋ, kisa ga gwat nah. Gisiŋ, kisa ga hã fineˀ ya macufuɗ vuna ma.
22Yo ma na, ɗiyiy viŋ ngi hin, yi wa na, mbele diradibiɗ kum na, Buymisemuŋ a sa mi ti ya ng'avu kum a muŋ.
Ji haŋ ngi kiɗa mi naŋ wãˀ
23Epafras mbur dangay, cil ɗu tisi Yesu Kristu na, a juw haŋ le, 24waɗ Mark, Aristark, Demas waɗ Luk, mizli ndra magam slra bummoˀhoy. 25Anja Buy ndra Yesu Kristu a gukum mezle

Currently Selected:

FILEMOŊ 1: BEGDC

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy