ZONAS 1
1
Zonas muwuɗ kil kileŋ zleˀe avu Bumbulvuŋ
1Ti di numuŋ ada na, Zonas, mangal ngi Amitaya, Bumbulvuŋ a ɓaŋ ɗaˀ ani: 2«Aru kutum nga Niniv, walahay madiɗaŋ. Ki sa buca mizli ngi digahaya, asi moˀore taŋ na, a mbiy kwacay le muduba.»
3Amma Zonas a slikiɗ nga naŋ, ɓa a kil nga Tarsis, kileŋ avu Bumbulvuŋ. A pi sar nga Zafa, a lum palalam a diga maru nga Tarsis. A wurka dala ngi palalama, a ci asi migi slra ngir palalamaya, ɓa aru nga Tarsis, kileŋ avu Bumbulvuŋ. 4Amma Bumbulvuŋ a go burkataŋ gambara ar mubuliye. Neˀ na, yam ngir mubuliy a slikiɗ jirif jirif, hã a ndir mata wãˀ ngi waha palalama. 5Migi slra ngir palalamaya, zluwun a ga taŋ le haɗi. Mbur gar a zil kuli naŋ kuli naŋ, ɓa a kilo widi taŋ. A zliɗaka gwat ngir palalamaya gar ng'ar yam, ɓa a ga palalama kefeke. Naɓa Zonasa, a pi sar le sesẽŋ ng'asi virzi ngi palalam zleˀe, a ro tup, a hinje le ɗokɗok. 6Mbur miwa palalama, a kirih ng'avaŋ, a ɓaŋ: «Haya! Joˀ ka ki hinje sukwa! Slikiɗ, zila kuli ɗike. Asinta kuli ɗik a sa wuluk ar ndra, ɓa i zizam ta kwani.» 7Dar migi slra ngir palalamay a ɓam ar wala taŋ: «Soko i gam ceregezleŋ, ɓa i sinaka mbur muso ndra ti bonoy hana.» A gaka ceregezleŋ tuwa na, a diɗ ar Zonas. 8Akẽh a ɓaka Zonasa: «Ki gi slra mike, inga ɓa ndra di? Ki so ti damaka? Ki mbur ngi damaka? A yukuw angi hirwuy wanaka?» 9Zonas a mbiɗa taŋ di: «Yi mbur Heber, yi huruk huruk nga ya a mbuŋ Bumbulvuŋ, Buymuŋ, miga mubuliy ati hirwuyoy na.» 10Zluwun a ga mizli tuwa haɗa, a cufuɗakaŋ ‹Ki gi gwat mike?› Mizli micinam, naŋ muslufa taŋ ɓi naŋ tuwa na, a sinaka le muduba, dambalaka a kil na ti kil ti Bumbulvuŋ. 11A cufuɗakaŋ: «Ɓa mubuliy a wusa ndra mata na, sey i gukuw mbri ska?» Asi yam ara ngi diɓel ti vendeke na si. 12Zonas a mbiɗa taŋ di: «Zuɓikiy, hizigikiy ng'ar mubuliye, ɓa a wusu kum mata far. Birkataŋ gambara hana mago ar kum na, i si na le, a gi vur ya.» 13Ti nah gar na, misi palalamaya, ara kukuroko, ɓa ara lumaka hirwuyo, amma gar ngataraŋ, asi mubuliy ara slikiɗ ti gidaŋ jirif jirif ng'ar taŋ jaka. 14Dar a zlaka zila Bumbulvuŋ, a wudam: «Aw Bumbulvuŋ ndra! I wuɗam zizi asi gi gwat ngi mbur hana ta. Kiɗa hirnga misi ndra micimak anga na, anja ki po zayɓi nah nga hirnga ndra ta. Asi ka Bumbulvuŋ, ki gi di i gwat mucuruw hiri le.» 15Akẽh so na, mizli tuwa, a zuɓaka Zonasa, a hizigaka ng'ar mubuliye. Neˀ si na, mubuliy anta wus mata, a pula slikiɗ jirif jirife le. 16Dar mizli a zluwunam haɗi ti Bumbulvuŋ. A gakaŋ mikuli, a jaka mi naŋ ti gwatay.
Currently Selected:
ZONAS 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.