AZE 1
1
Hin ngi ndira hay ngi Buymisemuŋ hiri naŋ a muŋ
1Ar vi mucuw naŋ ngi Dariyus mazum buyo, hin mudumbuŋ ngi kiya mimerkeɗ naŋ na, Zorobabel, mangal ngi Seyaltiyel, buy miwa hirwuy Zuda, yo Yesuwa, mangal ngi Yosadak, masay madiɗa na, Bumbulvuŋ a ɓa mijiviɗ naŋ Aze, ɓa a ɓa t'ani: 2Ya Bumbulvuŋ misi gidaŋ wãˀa i ɓi na: «Mizli a ɓam: ‹Hin ngi ndira hay ngi Bumbulvuŋ hiri naŋ a muŋ, a ndila t'aruŋ.›» 3Vurˀe Bumbulvuŋ a ɓo mijiviɗ naŋ Aze, ɓa a ɓi na: 4«Hay ngi Bumbulvuŋ i mumbuzla le, ani a zlir le ɓa kumo, ki hinam ar hay kum miɗiyahay le ɗiyeˀ ɗiyeˀ kuy kuyo sukwani? 5Wurenna, Bumbulvuŋ misi gidaŋ wãˀa, a ɓukum na: Wulkam kuy kuy ar gwat mindilo kum na kwaɗay ayɗi. 6Ki zligam gwat le haɗa, amma ki gam sifi ngi gwata keɗece, ki ra zumam, amma kum anta mbam ta, ki ra sam, amma anta pusukukum vu pusak ta, ki ra kam zana, amma anta gukum gippe ta, yo migir ngi mbur migi slra, a pi zuk kaɓa tir gabal misi mifiliw. 7Ya Bumbulvuŋ misi gidaŋ wãˀa, i ɓukum ava: Wulkam kuy kuy ar gwat mindilo kum na kwaɗay ayɗi. 8Jiɗam nga muwã, ngumoko dum, ɓa ki ɗiyaka hay ɗu hiri naŋ a muŋ. Kanah na, a sa ciriy hiri, yo i sa biga dudok ɗu ara. I ya Bumbulvuŋ maɓi. 9Ki njaham hiri, anja ɓa ki lumam gwat ngi migama haɗa, amma kisa lumam neˀkini. Gwat ngi migam kumoy, kum miram taŋ le ngi haya na, i ˀufo himiɗ ara, a zliɗa hirnga naŋ mber mber. A gi kanah vur mike? Bumbulvuŋ misi gidaŋ wãˀa, a ɓukum: A gi kanah na, vur hay ɗu a tiri diŋ le, amma kumo so na, mbur gar na, ara wus vu ngi ɗiya hay nga naŋ nga naŋ. 10Vuŋ mago ti muŋ mata, yo hirwuy magi gwat mata na, vurˀeŋ. 11Yi ga ɓa kwalay a gi asi ruwuyo: a muwãhay, ar guva ngi alkamarihey, ngi gudubunoy, ngi tutumburoy, yo ar gwat hirwuy maga gar, ar mizli ati gwat misãmihey waɗ ar gwat ngi migam kumoy gar.»
12Mijiviɗ Aze maɓa taŋ ɓi ngi Bumbulvuŋ, Buymisemuŋ taŋ tuwa na, Zorobabel, mangal ngi Seyaltiyel ati Yesuwa, mangal ngi Yosadak, masay madiɗa waɗ is ngi mizli gar na, dar ara cinaka ˀay ngi Bumbulvuŋ, Buymisemuŋ taŋ waɗ mingiɓi ngi mijiviɗ Aze maɓa ɓi ngi slra naŋ kaɓa Bumbulvuŋ, Buymisemuŋ taŋ muvulaŋ di. Joˀ mizli a gaka dudok da Bumbulvuŋ. 13Aze, mislin ngi Bumbulvuŋ a ɓi di i ɓi, kaɓa Bumbulvuŋ muvulaŋ di ɓa a ɓa da mizli: «Ya Bumbulvuŋ i ɓukum na, y'ada ati kumo.» 14Zorobabel, mangal ngi Seyaltiyel, buy miwi hirwuy Zuda, yo Yesuwa, mangal ngi Yosadak, masay madiɗa waɗ is ngi mizli gara, joˀ Bumbulvuŋ a wuna taŋ lesl kwaŋ: dar a soko, a zlaka slra ngi hay ngi Bumbulvuŋ misi gidaŋ wãˀ, Buymisemuŋ taŋ. 15Naɓa i hin mukur cuw nga mufaɗ naŋ, ngi kiya mimerkeɗ naŋ.
Currently Selected:
AZE 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.