BI NGI ISRAYELEY 1
1
BUMBULVUŊ MUBO TI ISRAYELEY TI EZIPTE
(1.1—15.21)
Israyeley migam beke asi ruwuy Ezipte
1Israyeley miram nga Ezipte ati cine taŋ Zakop na, mbur gar aru ti mizli ngi hay naŋhaya wãˀ wãˀ, slimiɗ taŋhay ani: 2Ruben, Simeyoŋ, Levi ati Zuda, 3Isakar, Zabuloŋ ati Benjameŋ, 4Daŋ ati Neftali, Gat ati Aser. 5Ziri ngi Zakopoy a gam jom gar, mizli kukur tarnaˀ: Zozefe, naɓa naŋ a Ezipte si. 6A dirba nah, Zozef a mucu, sukum naŋhay gar waɗ mizli miram ti nah na gar, a micam le. 7Israyeley ara yam haɗi, ziri taŋhay ara sikam fineˀ gidaŋ, a lumam gidaŋ nga mbuŋ nga mbuŋ: a nahaka hirwuyo wãˀ. 8Akẽh na, a cam buy nawaya a Ezipte, a si na Zozefe sin le ta. 9Buy tuwa, a ɓa mizli ngi hirwuy naŋhaya na: «Ani, sukwi ngi Israyeleye, a tiram le haɗa fineˀ gidaŋ, yo taŋ ti gidaŋ haɗa, a funam ndra le. 10Anja i gam wer ɓa a yam kahana mata. Da ani vurum a gi le na, a sa jumom ng'avi mesene ndrahay, a sa kiɗam ndra, a sa pulaka hirwuy hana.» 11Dar Eziptehey a vulaka taŋ buy ngi slrahay mitakˀay, ɓa a vusoko taŋ ti slra mitakˀay, Israyeley a ndiraka walahay Pitom ati Ramses ngi wi vu ti gwat ngi buy madiɗa ngi Eziptehey. 12A wuɗam a vusoko taŋ ti gidaŋ ma na, amma taŋ ara sikam ti vendeke jak, yo ara tiɓaka li ti gidaŋ, hã Eziptehey a zluwunam ti taŋ. 13Dar Eziptehey a guzuvuraka taŋ, a tiram taŋ bekehey, 14a gam ti taŋ, ɓa cifi taŋ a gi ti bonoy, ti slra mitakˀay: a kulupam hohoy, a kiɗam brik, slra ngir guva gar, duguleˀ naŋ na, slra ngi bekehey gar na, a tikaka taŋ ˀay ti naŋ ti gidaŋ si.
Buy madiɗa ngi Ezipte miga moˀore da Israyeley
15Ngwas miyi ngwasay ada cuw, numuŋ a zilaka Sifra, mekeleme Puwa. I taŋ mayaka ngwas Hebereye. Buy Ezipte a ɓa taŋ na: 16«Da ki ra ya ka ngwas Hebereye na, puraka zuŋ kum mayaka na kuy kuy. Da i mangal mizile na, kiɗaka vagay, da i zuŋ mongoso na, pulaka.» 17Amma ngwas miyi ngwasay tuwa, a zluwunam ti Buymisemuŋ, a gaka kaɓa buy Ezipte miɓa taŋ di tuwa ta, taŋ a pulaka ziri mizileheye. 18Dar Buy Ezipte a zila taŋ, a ɓa taŋ: «Ki pulaka ziri mizileheye vur mike? Ki gaka kanah vur mike?» 19Ngwas miyi ngwasay tuwa, a mbiɗaka da buy Ezipte: «Ngwas Hebereye, taŋ ka ngwas Eziptehey ta, taŋ wirwir haɗi, ɓa ngwas miyi ngwasay a sa ndil tikeˀe a ciki taŋ na, naɓa a ya ka zuŋ le si.» 20Buymisemuŋ ara ga mezle da miyi ngwasaya, yo sukwi Israyel kwana ara sik, taŋ ti gidaŋ haɗa. 21Na miyi ngwasay mazluwunam ti Buymisemuŋ tuwa na, Buymisemuŋ a vula taŋ yi. 22Dar buy madiɗa ngi Ezipte a ɓa mizli naŋhaya gar: «Mangal Heber miyaka le wureˀ gar na, hizigaka ng'ar yam a mizaw! Da i zuŋ mongoso na, pulakaŋ.»
Currently Selected:
BI NGI ISRAYELEY 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.