AMOS 1
1
1Ɗerewol hana, a ɓi di i ɓi ngi Amos mbur misi ginewey a ruwuy Tekoˀa. A ndir vi cuw ɓa ruwuy a jijik na, Buymisemuŋ a ɓaŋ ɓi vur zumabuy ngi Israyel, a ɓaŋ hirak ti Oziyas ma zum buy a ruwuy Zuda, yo Zeroboˀam mangal ngi Yoˀas i buy angi hirwuy Israyel. 2Amos a ɓi na:
«Bumbulvuŋ ara buco ti Siyoŋ kaɓa mobor, yo ˀay naŋ a cino kaˀ ti Zeruzaleme.
Li zum ngi ginewey a hiryam le, yo hirnga muwã Karmel a muˀul le cay.»
Bumbulvuŋ mumbiɗa hirnga da Israyel waɗ da midigwi taŋhay
Da filistihey
3Bumbulvuŋ a ɓi ani:
«I ra mbiɗa hirnga da mizli Siri ngi Damasay, asi a gam mungra madiɗahay le haɗa,
wãˀ naŋ asi hana:
a musukuɗoko mizli Galaˀataya le musukuɗ musukuɗ ti ɓiri ngi musukuɗo li.
Vurˀe, y'anta sa pula ɓi ɗu ya mujuwa a mevel ɗu ngi gi na teˀ mata. 4I saka vu da hay ngi buy Hazayele,
yo i sa wura hay ngi buy Ben-Hadataya.
5I sa ngila gwat ngi kilika mizlingreŋ ngi Damasa. Buy ngi Bikat-Avene, i sa kiɗa vagay, waɗ buy Bet-Eden mikaw ti ganday ngi ɓiri na.
Akẽh so na, mizli Sirihey a sa jaka taŋ nga Kir.
I ya Bumbulvuŋ maɓi.»
Da Filistihey
6Bumbulvuŋ a ɓi na: «I ra mbiɗa hirnga da mizli Filisti ngi Gazahaya, asi a gam mungra madiɗahay le haɗa, wãˀ naŋ asi hana:
a fucaka mizli ngir walahaya taˀ gar nga Edom.
Vurˀe, y'anta sa pula ɓi ɗu ya mujuwa a mevel ɗu ngi gi na teˀ mata.
7I saka vu da dalam ngi Gazahaya, joˀ vu a sa zuma hay mimezle ngi raˀahaya.
8I sa susuyumo buy ngi Asdoto, waɗ buy mikaw ti ganday ngi buyoy a Askaloŋ. I sa ma mevele hirik ng'ar Ekroŋ, dar Filistihey mindiram ti siifa, a sa zizam.
I ya Bumbulvuŋ Buymisemuŋ maɓi.»
Da Fenisihey
9Bumbulvuŋ a ɓi ani:
«I ra mbiɗa hirnga da mizli Fenisi ngi Tirey, asi a gam mungra madiɗahay le haɗa, wãˀ naŋ asi hana:
Taŋ i mizli Israyeley mupurla ngbaŋ, ko a kam slimiɗ neˀ le kaɓa i sukum taŋhaya ta.
A fucaka mizli ngir walahaya taˀ gar fec fec nga Edom.
Vurˀe, y'anta sa pula ɓi ɗu ya mujuwa a mevel ɗu ngi gi na teˀ mata.
10I sa nduvuɗa vu da walahay Tire,
dar vu a sa zuma hay mimezle ngi raˀahaya.»
Da Edomoy
11Bumbulvuŋ a ɓi ani:
«I ra mbiɗa hirnga da mizli Edomoy, asi a gam mungra madiɗahay le haɗa, vendeke naŋ asi hana: A gidiɗaka sukum taŋ Israyeleye ti maslalam, pak paka, ko mesem neˀ a hiri tekeɗe anta.
Taŋ misi mevel fõh fõh tuwa na, anta pulaka nguma vu mbak le ta,
yo anta pulaka ji vu a kwacaya mbak le ta, a roko kaŋ kaŋ ara.
y'anta pula ɓi ɗu ya mujuwa a mevel ɗu ngi gi na teˀ vur i taŋ si ta.
12I saka vu da walahay Temana,
dar vu a sa zuma hay mimezle ngi Bosiraˀahaya».
Da Amoŋhoy
13Bumbulvuŋ a ɓi ani:
«I ra mbiɗa hirnga da mizli Amoŋhoy, asi a gam mungra madiɗahay le haɗa, wãˀ naŋ asi hana:
Ɓa hirwuy taŋ a sik firndiw asi ruwuy Galaˀata na, a nduzoko kwacay ngi ngwas misi ti huroyo.
Vurˀe, y'anta sa pula ɓi ɗu ya mujuwa a mevel ɗu na teˀ mata.
14I saka vu da walahay Raba,
tapasa, mizli a sa wudam widi ngi vurum,
widi misi tapas musure magi ar burkataŋ gambara,
dar vu a sa zuma hay mimezle ngi Rabahaya. 15A sa jaka buy taŋ nga ruwuy mulak,
jom ati soje naŋ madiɗahaya.»
I Bumbulvuŋ miɓa.
Currently Selected:
AMOS 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.