SLRA 1
1
ˀUf Mipal, Yesu miɓa ɗaˀ le, a sa vula da misliney
1Naŋ kine, Teyofil, ngama ɗu mezleŋ, angi ɗerewol ɗu mudumbuŋ na, yi ɓi di ɓi ngi gwat Yesu miga gar waɗ gwat naŋ mudubuna da mizli zle avu zlivirzi naŋ, 2hã ndila hin taŋ muzuɓaka nga muŋ. Dumbuŋ ti taŋ muzuɓaka nga muŋ t'aruŋ na, mizli naŋ muwuna taŋ ɓa a tiram mislin naŋhay na, a biga taŋ mingiɓi naŋ le ti ˀUf Mipal. 3A dirba bonoy naŋ, naŋ misa na ma na, a biga taŋ vu ti jiviɗ wal wal haɗi, naŋ da ti siifa. A biga taŋ vu, ara purakaŋ, hã hin kukur mufaɗ. A ɓa taŋ ɓi ngi Zumabuy ngi Buymisemuŋ le. 4Ngi pas numuŋ ada na, ara zumam ɗaf bumoˀ, a ɓa taŋ, anja ɓa a pulaka Zerusaleme ta, amma ɓa a kutukoko gwat Cine miɓa taŋ di di ɗaˀ tuwa. A ɓa taŋ: «I gwat kum micinaka, ya muɓukum di ti balam ɗu tuwaŋ. 5Asi Zaŋ a ci di mizli ar yam tewle, amma kumo, angi hin neˀ nga mbuŋ aka na, a sa cukum ar ˀUf Mipal.»
Yesu mucuh nga muŋ
6Dar misliney mukusomo, a cufuɗakaŋ: «Buy, ka masa ɗiya zumabuy ngi Israyel na, wurenna kwa?» 7Naŋ a ɓa taŋ: «Hin naŋ ati pas naŋ, Baha muɗuva ti gidaŋ naŋ na, kumo, ki sinaka gu ta. 8Amma kumo, kisa lumam gidaŋ, i ˀUf Mipal masa sawa ar kum. Dar kisa tiram sedewo ɗuwoy a Zeruzalem, angi hirwuy Yude gar, a Samari waɗ hã asi hirwuy mira kiɗo mi.» 9A dirba mingiɓi hana na, a cuh nga muŋ, taŋ ara purakaŋ. Gazlavay a sirta sirit a mihiri taŋ. 10Ti taŋ muroko hiri tataˀ ng'avi Yesu macuh nga muŋ tuwa na, mizli cuw ti zana babarahay ɓaˀ ɓaˀ avu vu, a bigaka taŋ vu kutum aciki taŋ akẽh si. 11Dar a ɓaka taŋ: «Mizli Galilehey, ki cicam dedeŋ akẽh, hiri tataˀ nga muŋ vur mike? Yesu muzuɓaka nga muŋ na, a sa mawa ti jiviɗ mupurla, ka kum mupurakaŋ, naŋ mucuh nga muŋ vuna ma.»
Muwunam mbur ar li ngi Yudas
12Dar misliney a pam sar baɗ tir li miɗingir mazilaka muwã Tutumbur tuwa, a mam nga Zerusalem a muŋ. Wala ngi muwã nah ati Zerusaleme, a gi gwat ngi kilometir purla si. 13Ti taŋ mimoko nga Zeruzalem na, a jiɗam ng'ar hay minjirngasl a hirnga cala, viŋ taŋ macifam anga hõyyõ zleˀe. Taŋ Piyer, Zaŋ, Zak, Andre, Filip, Tomas, Bartelemi, Matiye, Zak mangal ngi Alfe, Simoŋ mawuɗ hirwuy naŋ waɗ Yudas, mangal ngi Zak. 14Taŋ gar ati ngwas mekelemey ada, yo Mariya mumuŋ ngi Yesu waɗ sukum ngi Yesuhoy, taŋ jom arleˀe, a diram dibiɗ bulaw le ta. 15Ti di nah na, mitiɓihey a gam gwat ngi skat ti kukur cuw gu, a kusom le. Piyer a slikiɗ deŋ a wuzla taŋ, a ɓa taŋ: 16«Sukum ɗuwoy, ɓi ngi ˀUf Mipal mubo di ti balam Davit, ar Ɓimutoho na, anja a gi muduba. Yudas mitiri mibigi jiviɗ da mizli mijaka Yesu na, Davit a ɓa le daf dumbuŋ. 17Yudasa, naŋ zleˀe a wuzla ndra, a vulakaŋ slra mupurla ati ndra vuna ya. 18Yo mbur nah na, a hiɗik guva ti dala muwurkakaŋ di slra malambaˀ tuwa, dar a diɗ hirnga jik nga ruwuy, kwacay a nduz bav, tanday curɗoɗ avra. 19Mizli Zerusalemey gar a cinaka labara nah le. Vurˀe, a zilaka guva nah ti mi taŋ, ‹Hakeldama›, mbiɗeˀvra: Guva ngi pumbusu. 20Dambalaka a tohoko le ar Dimise, a ɓi na: ‹Anja hay naŋ a tiri diŋ, yo anja mbur a cifi anga ta.› Yo a tohoko ma na: ‹Anja mbur mekelem a zuɓa slra naŋ.› 21«Ti ndra miram digi, Buy Yesu ɓaˀ a mbuŋ ndra ar lihey gar na, mizli mekelemey ada mandiram zlaɓ zlaɓ ati ndra, 22zle avu hin ngi Zaŋ mici mizli ar yam, hã a ndila hin muzuɓaka Yesu nga muŋ ti wuzla ndra. Anja mbur purla a wuzla taŋ, a jumo ng'avi ndra, ɓa i gaka sedewo ngi slikiɗ ngi Yesu ti wuzla mumucahaya.» 23A bigam mizli cuw: Zosef mazilaka Barsabas, a cakaŋ slimiɗ ti migala, Yustus, waɗ Matiyasa. 24Dar a zlaka diradibiɗ, a ɓam: «Bumbulvuuŋ, ka misina mevel ngi mizli gar. Biga ndra mbur ka muwuna a wuzla mizli mucuw hanayna, 25ɓa a cifi mislin ar li ngi Yudas mupula, ɓa aru ng'ar li nga naŋ mihĩˀĩ na.» 26Joˀ a gam ceregezleŋ. Ceregezleŋ a diɗ angi Matiyas. Zle tapasa, a jum ng'avi mislin mukuruˀ ngaŋ kaˀhaya.
Currently Selected:
SLRA 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.