Zaŋ 4
4
Yesu ati ngwas Samari
1Yesu a cine na, Farisahay a cinam na, naŋ ara lum mizli haɗa aseˀe, yo ara ci mizli ar yama fineˀ Zaŋ. 2Wãˀ naŋ na, Yesu ti hirnga naŋ, anta ci mizli ar yama ta, i mizli ngi seˀehey macaka taŋ. 3Yesu a pula hirwuy Yude, a mi nga Galile a muŋ. 4Ɓa ngi ru nga Galile vuna, sey a cuh tir hirwuy Samari. 5Naŋ kine, a ndil angi walahay mekelem ada angi hirwuy Samari, a zilaka Sikar, gweˀ avu guva ngi Zakop muvula da mangal naŋ Zozef. 6Vigiɗ ngi yam ngi Zakop ada angi li nah vuna. Yesu a gir le ti ru, a cifi a mi yam tuwa. Naɓa a gi ng'avi pas deŋ gu. 7Ngwas Samari a so ɓa a nuw yam. Yesu a ɓaŋ: «Vuliy yam ngi si takwa.» 8Naɓa mizli ngi seˀehey a ram le zleˀe nga hiɗika gwat ngi zum ar walahay.
9Amma ngwas Samari tuwa a ɓa Yesu: «Mbri mbri maka? Ka mbur Yude ma na, ki cufuɗ yam avu ya, ngwas Samari ma kwa?» Asi mike na, Yudehey anta wuɗam jum arleˀe ati Samariheye ta.
10Yesu a mbiɗaŋ di: «Anja da ki si na gwat Buymisemuŋ mavula le, yo da ki si na mbur hana maɓuw: ‹vuliy yam ngi si vuna le zleˀe› na, anja ani i ka macufuɗaŋ, ɓa a vuluw yam maɓul goŋ goŋ jaka.»
11Ngwas tuwa a ɓaŋ: «Buy, jugulgwuy anta avu ka ta, yo vigiɗe naŋ jileŋ. Ki sa lumo yam maɓul goŋ goŋ vuna amaka? 12I dideˀ ndra Zakop muvula ndra vigiɗ ngi yam hana. Naŋ ti hirnga naŋ, a si yam ngi raˀa le. Ziri naŋhay ati ginew naŋhay kwana, a sam le ma. Ki wa kaɓa ka fineˀ Zakop vuna sukwani?»
13Yesu a mbiɗaŋ di: «Ko wa gar masi yam hana na, yam a sa gaŋ a muŋ ma. 14Amma da mbur misa si yam, ya masa vulaŋ di na le na, yam anta sa gaŋ mata wãˀ. Yam ya masa vulaŋ di na, a sa tiri miviɗiviɗi ngi yam maɓul goŋ goŋ, mavulaŋ siifa ngi sete jaka.»
15Ngwas tuwa a ɓaŋ: «Inga vuliy yam nah vuna sini buy, ɓa yam anta sa giy mata, yo ɓa yi so nga nuw yam aka mata.»
16Yesu a ɓaŋ: «Ara zilo zil ɗike, ɓa ki soko ng'aka.»
17Ngwas a mbiɗaŋ di: «Y'anta ti zil ta.» Yesu a ɓaŋ: «Ka miɓi k'anta ti zil ta na, kaslsla gisiŋ. 18Asi ki ɗuv ziley le zlum, yo mbur ka misi ati naŋ wurenna na, i zil ɗik ta gwaɗ naŋ. Ki ɓa le kaslsla.»
19Ngwas tuwa a ɓaŋ: «Yi pura na, ki mijiviɗi buy. 20Dideˀ ndra Samariheye, a putukulom a mbuŋ Buymisemuŋ a hirnga muwã misenna, amma kum Yudeheye, ki ɓam ki putukulom a mbuŋ Buymisemuŋ, sey a Zeruzalem.»
21Yesu a ɓaŋ: «Ngwasa, tiɓa ɓi ɗu, pas naŋ ara ndilawa, ɓa mizli anta sa putukulom a mbuŋ Cine ndra Buymisemuŋ a hirnga muwã hana malla ko a Zeruzalem mata. 22Kum Samariheye, Buymisemuŋ, kum maputukulom a mbuŋ naŋ na, ki si na ka ta Amma ndra Yudeheye, i putukulomo a mbuŋ Buymisemuŋ ndra misinaka le, vur ɓi ngi laha vu a so ti vu Yudehey. 23Amma pas naŋ ara ndilawa, a ndilo le vuna si, ɓa mizli maputukulom a mbuŋ Cine ndra Buymisemuŋ gisiŋ gisiŋ na, a sa putukulom a mbuŋ naŋ ti musuɗuk waɗ ti kaslsla wãˀ. Asi mike na, Cine ndra Bumbulvuŋ a sipi di i mizli maputukulom a mbuŋ naŋ misi ka tayna. 24Buymisemvuŋ i musuɗuku, vurˀe, mizli maputukulom a mbuŋ naŋ na, anja a putukulom ti musuɗuk naŋ waɗ ti kaslsla naŋ.»
25Ngwas a ɓaŋ: «Yi si na le, Mesi, mbiɗeˀvra Kristu na, a sa sawa. Da a so le na, a sa njika ndra gwataya gar.»
26Yesu a ɓaŋ: «Ya maɓuw hana, i ya vuna si.»
27Hirak ti nah na, mizli ngi si Yesuhoy a ndiloko. Taŋ mupuraka Yesu maɓam ati ngwas na, a zuma taŋ hirnga le. Amma ko mbur mucufuɗaŋ: «Ki wuɗ mi ava ka?» malla: «Ki ɓam ɓi ati naŋ vur mike» na, anta. 28Dar ngwas a pula kukulum naŋ, a kil ng'ar walahay, a ɓa mizli: 29«Soko, puraka mbur ani, a ɓiy ɓi ngi gwat ya miga taŋ zleˀe le gar. Asinta, i Mesi tuwa kwani?»
30Mizli a bam tir walahaya, a ram ng'avi Yesu. 31Hirak ti nah na, mizli ngi seˀehey a hurdumom avaˀa, a ɓakaŋ: «Kumani, inga zum ɗagay so.»
32Amma naŋ a ɓa taŋ: «Y'ada ti gwat ngi zum, kum misina ka ta»
33Angi nah na, mizli ngi seˀehey a cufuɗam vu ar wala taŋ, a ɓam: «Arona, mbur a vulaŋ gwat ngi zumo le aka kwa mbrike?»
34Yesu a ɓa taŋ: «Gwat ngi zum ɗu, i gi gwat Buymisemuŋ mislino ya mawuɗo, waɗ kiɗa mi ngi slra naŋ. 35Kum vuna, kum ada ɓam: ‹A ndir kiya mufaɗ aruŋ ɓa sifi a gi› kanah ta kwa? Amma ya i ɓukum na: zuɓaka hiri, puraka: gwatay a naham le, ɓa a gaka sifi taŋ muduba ta kwa? 36Migi sifi ngi gwata, ara lum migir naŋ si, ara kuso gwat ngi sifiheye vur siifa ngi sete, hã mbur mizligi gwat ati mbur migi sifi naŋ, a mumulom jom arleˀeŋ. 37Mizli ndrahay maɓam: ‹Mbur mekelem a zligi, mbur numuŋ a gi sifi naŋ› na, naŋ kaslsla gisiŋ. 38Yi slinukum nga gi sifi ngi gwat mugirukum ko neˀ le ta, i mizli mekelemey migiram anga. Joˀ kumo, ki ciram tisi slra muvula taŋ gir zleˀe haɗa na.»
39Samarihey haɗi ar walahay nah, a tiɓaka Yesu le, asi ngwas miɓa taŋ: «A ɓiy ɓi ngi gwat ya miga taŋ zleˀe le gar» na.
40Samarihey mindiloko gweˀ avu Yesu tuwa ma na, a tumbulokoŋ ɓa a ndir ati taŋ, joˀ Yesu a zik ati taŋ hin cuw. 41Mizli haɗi a tiɓaka Yesu ti gidaŋ ava ma, vur mingiɓi naŋ maɓa ti balam naŋ muduba. 42Dar a ɓaka ngwas tuwa: «Ndra matiɓam na, vur ɓi ka miɓa ndra di na mata, amma i cinam mingiɓi naŋ le ti slimiɗ ndra, yo i sinaka le, naŋ i Milaha duniya gisiŋ.»
Yesu mumbulo mangal ngi madiɗa ngi sojehey
43Hin cuw a dirba nah na, Yesu a pula li nah, a mi nga Galile a muŋ. 44Asi Yesu a ɓa le njah zleˀe si: «Anta ɗuvaka hirnga da mijiviɗ angi hirwuy naŋ tehhe a muŋ ta.»
45Amma ti naŋ mindil angi hirwuy Galile na, Galilehey a tiɓakaŋ kuy kuy, asi taŋ kwana, a ram le zleˀe a gi muguzlum Pak a Zeruzalem aya, yo a puraka gwat Yesu miga taŋ a diga na le gar.
46Dar Yesu a mo nga Kana, hirwuy Galile, walahay naŋ mimbiɗa yam, a tiri di mbaazla tuwa. Mbur madiɗa ngi sojehey ada a diga, mangal naŋ a ro ti jiji a Kapernahum. 47Ti naŋ micina Yesu a so le ti Yude nga Galile na, aru ng'avaŋ, a tumbuloŋ ɓa aru nga Kapernahum, ɓa a mbulo mangal naŋ mawuɗ a muco. 48Yesu a ɓaŋ: «Da ki puram cekenehey ati gwat migam ɗaˀtahay ta na, ki tiɓam ta wãˀ.»
49Madiɗa ngi sojehey a ɓaŋ: «Da ki so wurenna ta na, mangal ɗu a sa muc, buy!»
50Yesu a ɓaŋ: «Aru, mangal ɗike, naŋ da ti siifa.» Mbur tuwa a tiɓa mingiɓi ngi Yesu miɓaŋ di na le, a zuɓa jiviɗ, a ru. 51Ti naŋ misi a jiviɗ aruŋ si na, gawla naŋhay a soko, a sa jam di hirnga, a ɓakaŋ: «Mangal ɗike, naŋ da ti siifa!»
52A cufuɗa taŋ: «Mangal a zla gi zuwen hirak ngi pas wanaka?» A mbiɗakaŋ di: «Ngi dambu, hirak ngi pas mingil ˀay na, vu muculok avu vu a tislaŋ.»
53Cine ngi mangal a wulka na, Yesu miɓaŋ: «Mangal ɗike, naŋ da ti siifa tuwa» na, hirak ngi pas nah vuna. Zleˀ ti nah na, naŋ vuna ati hay naŋ gar a tiɓaka Yesu. 54Yesu a gi hana i cekene mucuw naŋ. A ga a dirba naŋ mumo ti Yude nga Galile.
Currently Selected:
Zaŋ 4: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.