OZE 8
8
Ɓi ngi sefel a sa tiri ɓi madiɗa
1Fam tulum, tilam mi,
ar mizli ngir hay ngi Bumbulvuŋ, mendere ara po sar kaɓa kurom,
asi mike na, a ngilaka jumoˀay ɗu le,
yo gwatay ya mudubuna taŋ di na, a slam huma le ava.
2A ra wudam ng'avi ya:
«Buymisemuŋ ndra, ndra Israyeleye, i sunukuw le!»
3Na taŋ vuna a hizigiɗaka gi mezle le avra:
Anja mesene taŋ a ɓulaka taŋ.
4Manja ya miɓa taŋ si na, a cam buy madiɗahay,
manja a cifiɗikiy si na, a cam buyoy.
Ɓiri bara ati ɓiri tapasl tapasl taŋhaya, a pam taŋ kulihey,
ɓa ngi ziza vu taŋ tehhe a muŋ.
5Mizli Samarihey, Bumbulvuŋ a hiziga zuŋ sla kumo le avra!
I zuɓ mevel le fõh fõh ng'ar kum.
Ɓi ngi ndir manja dili na, kisa ɓusaka ta hã ti vunaka?
6Zuŋ sla kum a bo ti ruwuy Israyel, i mbur misina gwat mindiraŋ,
ɓi ngi Buymisemuŋ anta ava neˀ le ta.
Haˀaw, zuŋ sla ngi Samari na, a sa mam di muwaha le meɗ meɗe.
7Taŋ mazligam himiɗ na, a sa gam sifi ngi burgataŋ.
A ɓam: «Alkamari, da zingaˀ anta ava ta na, anta tiri hapa ta.»
Da ko a tiri hapa tekeɗe kwana,
i mulakay masa bugumokoŋ.
8Israyel i muzuma le kap,
n'ani a wuzla sukwi ngi mizli, kaɓa gwat mupuɗaw mata!
9A wulkam, a ram nga Asiri,
kaɓa zungu ɓuh mawi hirnga naŋ.
Efrayimeye, a hiɗik mangaslay le.
10Da ko ara wuɗkam gwat ngatara da sukwi ngi mizli kwana,
wurenna, yi sa kuso taŋ muduba.
Neˀ ng'aka na, a sa jijikam kirkir
ti bonoy madiɗa ngi yaramahay magaka taŋ di.
11Efrayim a ɗiyi li gi mikulihey haɗa,
ɓa ngi puya mungra,
amma, li gi mikuli tayna tuwa, a tiram vaˀa,
i jiviɗ ngi gi mungra jaka.
12Da ko ɓi ka miɓa ɗaˀ le na, i toho taŋ di sar durmuk kwana,
a sa pura ava, kaɓa i gwat nawaya na si.
13Ar deɗe ngi mikuli na,
a gaka ti useˀ, a zumakaŋ,
amma anta cira hiri da Bumbulvuŋ ta.
Wurenna i ra wuluk keŋ ar malambaˀ taŋhaya.
ara slufa mungra taŋhaya.
Sey a mam nga Ezipte a muŋ.
14Israyel a puyuk hirnga ti mbur migi naŋ le,
a ndir mugum ngi buyoy.
Zuda kwana, a ndir walahay muguno ti moholoy haɗa.
Amma yi saka vu da walahay tayna,
a sa wura walahay muguno ti moholoyo kap.
Currently Selected:
OZE 8: BEGDC
Highlight
Copy
Compare
Share
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
