OZE 11
11
Buymisemuŋ muwuɗ Israyel mangal naŋ
1Bumbulvuŋ a ɓi na: «Ti Israyel misi i zuŋ zuŋ aruŋ na, i wuɗaŋ le,
yo naŋ mangal ɗu na, i zilo di le ti Ezipte.
2Amma da i ra zilaka taŋ na, taŋ a kiraham kileŋ avu ya.
Taŋ, a gaka mikuli nga taŋ da Baˀal,
yo gwat ngi vul ngi wur ti wuro, a vulaka nga taŋ da kuli miciɗa ti ciɗey.
3Efrayime, mudubunaŋ ru i ya ngbaŋ,
i jaŋ kaw avu haŋ,
amma, ya majigina taŋ kuy kuy na, ko t'anta puraka ta.
4I ra ɗiɗa taŋ ti mezle, kaɓa ji ngama ngi mbur titiraŋ,
mujumo ndra ati taŋ i wuɗa vu.
I gi ti taŋ, kaɓa mazuɓam zuŋ gaza gumbaˀ a didak,
i vulaŋ gwat ngi zumo.
5Israyele, naŋ anta sa mi nga Ezipte mata,
masa waŋ i ruwuy Asiri,
asi taŋ mungumam mo ng'avi ya ta na.
6Kiɗavu ti maslalama, a sa guno walahay taŋhaya,
a sa vuso gwat ngi cika vu a hirnga taŋhaya, a ngizla taŋ pay,
asi taŋ makuluwam ɓi na.
7Mizli ɗuwoyo a hĩyãka pula sipa jiviɗ ɗu le,
ara zilaka taŋ nga muŋ,
amma ko mbur mislikiɗ loŋ anta.
8Efrayim, i sa guw mbrike?
I sa pula Israyel a si haŋ ɗik kwa?
Ɓa i sa gi ti kakaɓa walahay Atma na, mbri mbrike?
yo i sa tiri ti kakaɓa walahay Seboyim na, mbri mbrike?
A giy le welele a mevel ɗu,
waɗ mana, ircece anta avu ya mata.
9Y'anta sa gi fõh fõh kaɓa mevel ɗu na ta.
Y'anta sa mo nga ngizla Efrayimeye ta,
asi yi Buymisemuŋ, yi mbur titira ta.
A hay ɗike, ya pal
y'anta sa mo ti mevel fõh fõh mata.
10A sa ram ɓaˀa asi Bumbulvuŋ,
Bumbulvuŋ matuwuy kaɓa mobor.
Ziri a sa kiloko tisi pas ngi mipirike, ti jijik kirkir,
asi tuwuy naŋ misi kaɓa ngi mobor tuwa.
11A sa kiloko ti Ezipte, wuw kaɓa juroy,
a sa kiloko ti Asuro, wuw kaɓa ɗiyuw dirgwaɗay,
i sa ga ɓa a cifam ar hay taŋhay.
I ya Bumbulvuŋ miɓa.
Currently Selected:
OZE 11: BEGDC
Highlight
Copy
Compare
Share
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
