OZE 10
10
Kiɗa mi ngi sipi jiviɗ ati ngi zumabuy ngi Israyel
1Israyele zleˀe, naŋ kaɓa gudubun mafuyuk,
mayi zinga haɗa zleˀe.
Yi naŋ masik nga mbuŋ na,
naŋ kwana, ara ska li gi mikuli naŋhaya nga mbuŋ aya.
Hirwuy naŋ matiri mezle nga mbuŋ na,
naŋ kwana, ara ga wuya da ɗugur kuliheye nga mbuŋ ya.
2Mevel ngi Israyeley i malambaˀa,
wurenna, a sa wurkaka malambaˀ taŋ na:
Bumbulvuŋ ti haŋ naŋ, a sa mbizla li gi mikuli taŋhaya,
yo a sa waha ɗugur taŋ ngi kuliheye.
3Wurenna so na, a ɓam:
«Buy ndra misi anta na, asi ndra mazluwunam ti Bumbulvuŋ ta na.
Na zle buy vuna, a sa ga ndra mi gu da ndra ka?»
4A ra gam mi wuwwo,
ara hudumom tir zluɓo si,
ara juwam ɓi ngi ngiɓiˀay,
dar ɓimujuwa mitaˀ gara,
a bo yõˀ yõˀ kaɓa giziŋ malambaˀ ar guva muhufa le.
5Samarihey ara jijikam asi ziri sla ngi Bet-Even.
Mizli naŋhay ati mizli mawaka vu taŋ kaɓa masay naŋhay na,
a roko ar vagay, vur ɓi ngi zuŋ sla vuna.
Wurenna, mezle ngi zuŋ sla mihaɗa na, a ram di le kileŋ avu ndra,
anja a mumulom vurˀe.
6Zuŋ sla kwana, a sa ram di nga Asiri,
ara vulaka ngatara da buy madiɗa.
Vurˀe, Efrayim a sa ndir ti mesem,
yo Israyeley kwana,
a sa pam mesem avu mukuluwa ɓi taŋ.
7Ɓi ngi Samari a kiɗ mi le.
Buy naŋ a ro capapa, kaɓa dum mubuk ɓaˀ a hirnga yam.
8Li miɗingir ɗingir ngi gi kuliheye, a sa susuyumoko taŋ avra,
i li Israyeley migam mungra ar taŋ.
Sisim ati hadaway a sa tiɓaka li gi mikuli taŋhaya,
a sa ɓaka muwãhaya: «Ɗumom ndra!»
A sa ɓaka li miɗingireye: «Diɗoko ng'ar ndra!»
Mbur mamuca kwanaya, a gic a duba sar naŋ
9Israyel, zle ti gwat migi a Gibeya na, ki gi mungra le,
na ki wus neˀ ta.
Migi mungra madiɗahaya, kiɗa vu ara ndila taŋ
sey a Gibeya cummo takwa?
10Yi wuɗ i kuta taŋ ti bonoy,
asi malambaˀ taŋ madiɗa misi makaw cuw na,
mizli a sa ngiɓam ˀay ng'ar taŋ.
11Efrayime, naŋ kaɓa bulkoŋ misirkaka le kuy kuy,
mangum ɓa ɗugom di daw.
Ya mupura ˀay naŋ migiŋ giŋ na,
i juwa galalaŋ da Efrayime kaˀ.
Zuda ara giruw,
Israyele kwana, ara siɗilo di ti dirba.
12Zligam hilfa mijeŋŋe
ɓa kisa gam sifi mezle.
Ngumam guva nawaya.
Ɓa ngi sipa Bumbulvuŋ na, sey wurenna,
hã a sa po gi jeŋŋe naŋ ng'ar kum.
13Kumo, ki zligam hilfa ngi moˀore,
kisa gam sifi ngi gwat malambaˀ madiɗaŋ,
ani ki zumam yi ngi slire le.
«Israyel, ki ka mevel ɗike le ar gidaŋ ɗiki
waɗ ar migi vurum ɗikey mimbeˀ mbeˀ na.
14Gi mi muhoyo hoyo a slikiɗ le a wuzla mizli ɗikeye,
mbak walahay ɗik muguno ti moholoyo a sa mbizlaka taŋ
kaɓa buy Salman mumbuzla Bet-Arbel
yo naŋ mikiɗa mumuŋ ngi ziri jom ati ziri taŋhay cek na.
15Gwat kum migaka a Betel na, migir kum i hana so,
a gi kanah, asi moˀore kum mihaɗa wãˀ na.
Ti miprik prik na, ɓi ngi buy Israyel a sa kiɗ mi.»
Currently Selected:
OZE 10: BEGDC
Highlight
Copy
Compare
Share
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
