ZLI VIRZI 3
3
Buymisemuŋ muɓula Adamu ati Hawa tir guva a Eden
1Naŋ kine, a wuzla gwat misi titiri ngi ɓuhoy, Bumbulvuŋ miga taŋ gar na, kawa, i misi wer fineˀ taŋ. A cufuɗa ngwasa: «Bumbulvuŋ Buymisemuŋ a ɓukum le gisiŋ: ‹Yi ngi widis gar misi ar guva na, ki zumaka ta, kini ta kwa?›» 2Ngwasa a mbiɗa da kawa: «I zumaka yi ngi widis ngir guvahaya zuy. 3Amma sey yi ngi widis ngi wuzla guva na, Bumbulvuŋ a ɓa ndra: ‹Ki zumaka ta, yo ki wusaka ta ma, vur kum mamicam.›» 4Kaw a ɓa ngwasa: «Kanah ta wãˀ, ko kum anta sa micam ta. 5Amma Buymisemuŋ a si na le, tapas kum misa zumaka le na, hiri kum a sa wun, joˀ kisa tiram kaɓa naŋ vuna ya, ki sinaka mezle ati malambaˀa.» 6Ngwas a pura yi ngi widis tuwa, naŋ mezle ngi zum, a gaŋ pura pura. A hĩyã le ɓa ngi luuma sin haɗa. A zuɓ yi ngi widis tuwa pal, a zumaŋ. Joˀ a vula zil misi a cikeˀe akẽh, a zuma ya. 7Akẽh si na, taŋ cuw taŋ hiri taŋhay a wunam, a puraka na, taŋ gulndiŋ gulndiŋ kine. A jam kalaf ngi uruf, a gam di zana ngi juw. 8Ngi pastaˀ, li zuyyo na, a cinaka ˀay ngi Bumbulvuŋ Buymisemuŋ maliˀi ar guva. Zil ati ngwas a ɗumom di a wuzla widis ngir guvahay tuwa. 9Bumbulvuŋ Buymisemuŋ a zila mbur zile, a ɓaŋ: «Ka amaka?» 10Zil a mbiɗaŋ di: «Ya micina ˀay ɗik ar guva na, i zluwun le, asi ya mugulndiŋ kine na, dar i ɗum.» 11Bumbulvuŋ Buymisemuŋ a cufuɗaŋ: «Mubuguw di i wa, ka gulndiŋ kine ka? Aro na, ki zum yi ngi widis, ya mutukuw ngi zum naŋ na le kwani?» 12Zil a mbiɗaŋ di: «Ngwas ka mucufa a ciki ɗu tuwa, i naŋ muvuliy yi ngi widise, i zumaŋ.» 13Bumbulvuŋ Buymisemuŋ a ɓa ngwasa: «Ki gi di i gwat mi hana ka?» Ngwasa a mbiɗa: «I kaw migiy gilaw, dar yi zuma i ngi widise.» 14Bumbulvuŋ Buymisemuŋ a ɓa kawa: «Asi gwat ka miga hana na, i sa nisuw ka a wuzla ginewey ati gwat misi titiri ngi ɓuhoyo gar, kisa ru ti kwacay, kisa bugum murɓuk ar hin ngi ssifa ɗike.» 15I sa ga, ɓa ka ati ngwasa, ki gam mesene, ɓa dideˀ naŋhay ati dideˀ ɗikey a gam mesene. Naŋ a sa njirsluw hirnga, yo ka kwana, kisa humbuɗaŋ avu duɓuk sar. 16Buymisemuŋ a ɓa ngwasa ma: «I sa ga ɓa hur a guw bonoy haɗi. Ki sa ya ziri ɗikey ti bonoy. Ki sa hĩyã cifi ati zil ɗike, amma naŋ a sa wuw.» 17A ɓa Adamu na: «Ki tiɓi di i mi ngi ngwas ɗiki, dar ki zuma yi ngi widis, ya mitikuw ɓa ki zuma ta tuwa. Vurˀe, i nisa hirwuyo vur ka. Ar ar hin ngi siifa ɗik gar na, kisa luuma gwat ngi zumo ti bonoy.» 18Hirwuy a sa pus hadaw ati giziŋ malambaˀhay sirit. Ki sa zum laray mapusam lambaˀ. 19Ki sa luuma gwat ngi zumo ti liiriɓ ngi midibiɗ ɗiki, hã tapas ka masa mi nga ruwuyo a muŋ, hirwuy ka mubo ti vaˀa. Vur ki i murɓuk, joˀ kisa tiri murɓuk a muŋ. 20Adamu mbur zil tuwa, a ca slimiɗ da ngwas naŋ Hawa, mbiɗeˀvra: ‹siifa›, asi naŋ i mumuŋ ngi mizli misi ti siifahay gar. 21Bumbulvuŋ Buymisemuŋ a ɗiya jibe ngi garak da Adamu ati ngwas naŋ, a ka taŋ di. 22Dar Bumbulvuŋ Buymisemuŋ, a ɓi a kwacay naŋ: «Ani mbur a tiri le kaɓa mbur ngi wuzla ndra, a si na mezle ati malambaˀa le. Wurenna, anja i tikakaŋ, ɓa a tila haŋ, a ngila yi ngi widis ngi siifa na, a zuma, ɓa a ndir ti siifa hã ngi sete mata.» 23Bumbulvuŋ Buymisemuŋ a ɓula mburo tir guva ngi Eden avra, ɓa ara huva hirwuy mindirakaŋ ti naŋ tuwaŋ. 24A dirba naŋ muɓula mbur avra na, Buymisemuŋ a pi kerubeŋhey tisi pas ngi miprik ngi guva ngi Edene, ɓa ngi jigina jiviɗ maru ng'avi widis ngi siifa. Kerubeŋheye, taŋ ti maslalam misi vu plingiɗ plingiɗ ka wucuɗ ngi vuŋ.
Currently Selected:
ZLI VIRZI 3: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.