BI NGI ISRAYELEY 17

Yam ngi Masa ati Meriba, Bumbulvuŋ muvula da mizli naŋhay

(Pura Sluf 20.2-13)

1Israyeley jom gar, a bam ti wuzla ɓuh ngi Sine, a ram neˀ, a cifam neˀ, kaɓa Bumbulvuŋ miɓa taŋ jiviɗ naŋ, hã a ndilam a Refidim, a pam ti guɗuk taŋhay a diga. Amma yam ngi si anta. 2Mizli a zlaka tira Moyise, a ɓakaŋ: «Vula ndra yam ngi si.» Moyis a ɓa taŋ: «Ki tirikiy asi mike? Ki cam a kwacay Bumbulvuŋ vur mike?» 3Yam ara ga mizli ti gidaŋ, ara dirɗaka Moyise na si, a ɓam na: «Ki bo ti ndra ti hirwuy Ezipte ngi mike? Ɓa madalyam a kiɗa ndra ati ziri ndrahay waɗ ginew ndraˀahaya sukwa?» 4Moyis a tila mi da Bumbulvuŋ, a ɓaŋ: «I ga mizli tayna mbrike? Neˀ nga mbuŋ ka na, a sa kuyupikiy ti ɗugur.» 5Bumbulvuŋ a ɓa Moyise: «Ki ɓaˀ a mbuŋ mizli, hil mizli micawwa ngi Israyeley ndac avu ka, zuɓa ganday ka mikiɗ di mubuliy tuwa kaw a haŋ, a ru. 6Y'ani ra cici deŋ a mbuŋ ɗike, ar mandazlay muwã ngi Horep a diga, kisa kiɗa mandazlaya, yam a sa bo ti raŋ, mizli a sa sam.» Moyis a ga kanah a mihiri ngi mizli micawwa ngi Israyeleye. 7A zilaka li nah Masa waɗ Meriba, mbiɗeˀvra ‹Ci a kwacay, yo tiri›, asi Israyeley mitiraka Moyis, yo micam a kwacay Bumbulvuŋ na, a ɓam: «Bumbulvuŋ naŋ da a wuzla ndra kwa malla naŋ anta?»

Amalekey mikiɗam vu ati Israyeley

8Dar Amalekey a sa lumaka Israyeley ngi kiɗa vu a Refidim. 9Moyis a ɓa Zozuwe: «Wini mizli mindilaka le, ɓa ara kiɗam vu ati Amalekey. Tiprike, i sa cici deŋ a hirnga muwã, ti ganday ngi Buymisemuŋ kaw a haŋ.» 10Zozuwe a zla kiɗa vu ati Amalekeye, kaɓa Moyis miɓaŋ di tuwa, naɓa Moyis ati Aroŋ waɗ Hur a jiɗam le nga hirnga muwã. 11Da Moyis aro haŋ paɗ a muŋ na, Israyeley a funaka Amalekeye ti gidaŋ, da a pula haŋ le giziɓat na, Amalekey a funaka Israyeleye ti gidaŋ. 12Haŋ ngi Moyis a gir le teɓel teɓel, Aroŋ ati Hur a zuɓam ɗugur, a sakaŋ di ɓaˀ asi virzi, dar a cifi araŋ. Aroŋ ati Huro deŋ ti ka deŋ ti ka, a jakaŋ haŋhaya paˀpaˀ. Haŋ ngi Moyisey a ndiram yom kahana, hã pas a diɗi, 13Zozuwe a ba hirnga da Amalekeye ti maslalam. 14Bumbulvuŋ a ɓa Moyise na: «Toho toh toh le vur kum mapuyukom hirnga, yo ɓa da Zozuwe ɓa a cinaŋ: Y'ani susuymo Amalekeye avra, ko mbur masa wuluk Amalekey ada zleˀe asi ruwuyo na, anta!» 15Moyis a ɗiyi li gi mikuli, a caŋ slimiɗe ‹Bumbulvuŋ a tiri ti ya bugawla le.› 16Joˀ a ɓi ma: «Ani Amalekey a zuɓaka haŋ le ng'ar janga ngi Bumbulvuŋ, Buymisemuŋ a sa ndir ar li gi vurum ati taŋ vur vi vur vi.»

Currently Selected:

BI NGI ISRAYELEY 17: BEGDC

Highlight

Copy

Compare