Apocalipsis 1
1
Juánueri uandajperata
1Tata Jesukristueri jánhastperakua enga Diósï exeraka, eska jántspiri jémbechani íntsapiringa ambe enga úkorheni jámka, ka ísï jimbo Jesukristu ánjeli jémbani axaspti, jántspiri jémba Juánuni jánhastarani, 2eska Diósïri uandakuani uandantaaka, ka ístu Tata Jesukristueri ambe uandantani, ka iámendu ambe enga xékorheka.
3Tsípeati ne enga arhintajka, ka ima engaksï kurhani jaka ambe enga arhini jaka i uandakuecha, ka úranksï jarhani ambe enga xáni karakata jaka, jimbokaksï jurhiatekuecha janoxaka.
4Ji Juánu, uandajperata ma axakuasïnga, iúmu tsimani tángorhekuechani engaksï Ásia#1 Iásï Turkiauesti. jaka: Cha jinguni jaue sési pájperakua ka kóntperata, imeri enga jindeka, enga jindepkia ka enga juuaka, ka ístu iúmu tsimani espirituecheri engaksï imeri k'éri uaxantskuarhu urhepani jaka, 5ka ístu Jesukristueri enga mintsinharhikueka ka enga urheta tsíntaka, enga iámendu irechechani íni parhakpeni k'érikuaani jaka. Ka engajtsïni xénhchajka ka imeri iurhiri jimbo k'amanharhintskuechantsïni kénditacheani, 6ka májku iretajtsïni úntasti, jima engaksï Diósïni tátjembani jántspekuaka, k'éri ambe arhinhe ka k'éri ambesti imeri uinhapekua méntkisï, ka ísïue.
7¡Era je, janikuecharhu ísï juuati!
Iámenduechaksï éxeati,
imaksï jamberi exeati engaksï p'orhonhapka,
iámendu ireta parhakpeni anapuechaksï
p'amondakorheati.
Jo ísïuati.
8“Jíska uénakua ka k'amarhukua,” uandaxati Acha Diósï, “Enga jindeka ka enga jindepka ka enga jurhani jaka, enga iámu uinhapetika.”
Juánu Jesukristuni eranhaskaspti
9Ji Juánu, chári erachi, ka engani méntkueni nósesi nitamakorheka, ísï eska Jesusi jámaparini ka tekantsparini, Pátmusï ómekuarhu jupikata jarhaspka, jimbokani Diósïri ambe uandantasïrempka, ka Jesusiri jurhentpekuani tsïrimerani. 10Acheri jurhiatekua jimbo Espiritueri uinhapekuarini p'iraspti, ka kurhaspka nemarini tátsepani uinhachacheni, eska kústakua ma p'uninhanhani. 11Engarini arhimpka: “Karantsï ka takurantsï ambe engari exeaka, ka iúmu tsimani tángorhekuechani: Éfesu ka Esmirna ka Pérgamu ka Tiatira ka Sárdisi ka Filadelfia ka Laodisea anapuechani axakua.”
12Ka eraparhaspka exekuekani nérinisï uandaxecheni japi, ka iúmu tsimani tiripitiri ch'urhinguechani exeaspka, 13ka ch'urhinguecharhu terujkani jarhaspti, Acheti uájpeni jásï ma jantsirirhu jamberi xukuparhantatini ka jonguarhekua tiripitiri ma p'andanhetini. 14Kánekua t'upujtsïni eska xurhata ka eska iéstakua, ka chpírini éskasïrempti; 15ka tiámu tsárakateni jándurhaspti, enga kánekua tinhameni jarhajka; ka iurhekua k'érini ma uandasïrempti, enga uinhamu kétsemani jarhajka. 16Ka t'irejkandani iúmu tsimani jóskuechani jatsiaspti; ka atajpetarakua ma tsimoru sési uarhomutini uéchasïrempti; ka t'ít'ijkusïrempti, eska tata jurhiata t'éjkamatirhu jarhani.
17Engani éxepka, kuarhatsespka ka miripakurhini ka méntkuni imani andandukuererani; ka imarini jájki t'irejkandani jimbo p'arhespti, ka arhisptirini:
Ásï che, jíska uénakua ka k'amarhukua, 18engani tsípiti jaka, uarhirixapka exe iásï tsípekua jatsiska enga nómeni k'amakurhiaka, ka uarhikueri mítakuechani ka ístuni uarhicho anapu ji jatsiaska. 19Karantsïchka ambe engari exeka: Ka ambe engari exeni jaka, ka ambe engateruri exeaka. 20Ísti jánhastperakua iúmu tsimani jóskuecheri engarini jurhijkandani erajkuaka, ka iúmu tsimani tiripitiri ch'urhinguecheri: Iúmu tsimani jóskuechaksï ánjelichesti engaksï tángorhekuecharhu jaka, ka iúmu tsimani ch'urhinguechaksï tángorhekuesti.
Currently Selected:
Apocalipsis 1: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.