San Juan 1
1
Uénatarakua
1Uénantki jámani jarhasptia Uandakua, ka Uandakua Diósï jinguni jarhaspti, ka Uandakua Diósïspti. 2Ima, uénani jámani Diósï jinguni jarhaspti. 3Iámu ambe ima jimbo kueraanhasti; nómbema no ima kueraasti. 4Tsípekua ima jinguni jarhaspti, ka tsípekua parhakpeni anapuecheri eramarhandekuesti. 5Ima eramarhandekua pájpakandu t'íntskarasïndi ka pájpakandekua no ústi andani.
6Jurhaspti acheti ma, enga Diósï axaka, enga Juánu arhinhajka. 7Inde eramarhandekueri ambe jurhasti xarhatani, uandantani eska jupiringa, ka eska iámendu jakajkunhapiringa imani jimbo enga ima uandempka. 8Juánu no eramarhandekuespti, ima eramarhandekueri ambesï juti xarhatani ka uandantani. 9Ambakiti eramarhandekua enga iámu parhakpeni anapuechani erajkutajka, íni parhakpeni andajperaxamempti.
10Ima enga Uandakueka parhakpeni jarhaspti, ka náuejki enga parhakpenini ima kueraaka, parhakpeni anapuechaksï no mítentasti. 11Imeri iretarhu jurhasti ka ima engaksï imerika nóksï jiókorhesti. 12K'óru, imechani engaksï jiókorheka ka engaksï jakakuka, íntsaasti sésekua eskaksï úaka Diósï uájpeni. 13Ka Diósï uájpestiksï, no jimbokaksï ísï andajpenuka, ka níjtu jimboka k'uiripu erakuaska, sánderu sáni, jimboka Diósï kuerauaska.
14Ima enga Uandakueka parhakpeni anapu úkorhesti ka jucha jinguni irekaspti. Ka imeri t'íntskuachi xériskia, enga tátjemba íntskuka, jimboka imajkusï Diósï Uájpeka, engamendu k'amak'amasï sésika eska néka ka enga xénhchpirika. 15Juánu uandantaspti Jesusiri ambe, uandaparini: “Ínisïni arhimpka engani uandapka eska ima engarini chúxapuni jaka sánderu k'éri ambeska jíndeni jinguni, jimboka ima jíndeni jinguni t'uínispkia.” 16Jimboka ima xáni jatsïkorheska, auandarhu anapu jatsikorhekuechantsïni kóndeasti; 17jimboka Moisesi íntspeska juramukuani, k'óru, xénhchperakua ka ima ambe enga ísïka Jesukristu xárhatasti. 18Nónema exesti Diósïni, nómeni; Uájpajtsïnisï mítetarati, enga Tátjemba jinguni májkuentatini jaka, Ima mítetarpesti.
Juánu Itsï atajtsïkpiri Jesukristueri ambe uandantasti
(Mt 3.11-12; Mc 1.7-8; Lc 3.15-17)
19Engaksï judiouecheri urherukuticha, tátechani ka lebitechani Jerusaleni uératini axaapka, eskaksï nipiringa Juánuni kurhamarheni ima néspki, 20Juánu k'amak'amasï uandakorhentaspti.
–No jísïni Krístueka.
21Ménderuksï uéntaspti kurhamarheni:
–¿Ka andi jimajkani t'u néski? ¿Eliasï Diósïri uandariskiri?
Juánu uandaspti:
–No imeska.
–Jimajkani, ¿Diósïri uandariskiri engachi erokani jaka?
Ima uandaspti:
–Nómbe.
22Ka arhisptiksï ménderu:
–¿Néskichkari? Jucha jatsiska aianguani imani engajtsïni axaka. ¿Ambejtsïni sáni ua aianguni chéti ambe?
23Juánu arhiaspti:
–Jíska engani jimesï uinhachajka enga nónema irekaka: Achani jurhimbentskakuntsï je, ísï eska Isaiasï Diósïri uandari na uandajka.
24Ima engaksï fariseouecha axaapka Juánuni uandaxekuni, 25kurhamarhesptiksï:
–Engachkari no Krístueka, níjturi Eliasïni, ka níjturi Diósïri uandarini, ¿Andirisï itsï atajtsïkpejki?
26Juánu arhiaspti:
–Ji itsï jimbo itsï atajtsïkpexaka; k'óru cha jinguni jámaxati ma engajtsï cha no míteka 27engarini chúxapuni jaka, enga jíndeni jinguni t'uínipkia, engani ji no jamberini nitatarheka kuarhachichani kuerandukuani.
28Iámu i ambe Betania úkorhespti, Jordani iurhekuarhu parhikutini, jima enga Juánu itsï atajtsïkpeni jápka.
Jesusi, Diósïri Karichi
29Pauandekuarhu, Juánu exespti Jesusini eska andarheraxapka, ka uandaspti: “¡Exe je, indesï Diósïri Karichiti, enga k'amanharhintskuechani euarhpeantajka! 30Indenisïni arhimpka engani uandapka: ‘Ima sánderu k'éri ambesti jíndeni jinguni engarini chúxapuni jaka, jimboka ima t'uínispkia jíndeni jinguni. 31Jíjtuni no mítespka néspki; k'óruni itsï atajtsïkpepuska, eska ísï jámani Israeli ireta míteaka.’ ”
32Juánu itsï atajtsïkpiri uandasptijtu: “Exeska Espiritu Sántuni kétseni jarhani jipunhini jásï ma, ka indeni andajtsïkuerani. 33Ji nótkini mítesïrempka néspki; ka ima engarini axaka itsï jimbo itsï atajtsïkpeni, arhistirini: ‘Néni engari exejka eska Espiritu andajtsïkueraska imasï Espiritu Sántuni jimbo itsï atajtsïkpejti.’ 34Ji exeskia ka uandantaxaka eska Diósï uájpeska.” 35Pauandekua, Juánu ménderu jima jarhaspti, máteru tsimani jinguni, engaksï márku jámempka. 36Enga eranguerapka Jesusini jimesï nitamani, Juánu uandaspti:
–¡Exe je, inde Diósïri Karichisti!
37Imaksï tsimani engaksï Juánu jinguni jámani jápka, kurhajchasptiksï ka chúxapasptiksï Jesusini. 38Jesusi eraparhasti, ka enga exepka eskaksï chúxapaxapka kurhamarheaspti:
–¿Ambejtsï jirinhantasïnki?
Imaksï arhispti:
–Jurhentpiri, ¿Naniri irekaski? 39Jesusi arhiaspti:
–Ju je exeni.
Nirasptiksï, ka exesptiksï nani enga irekapka, ka jimaksï pakaraspti imani jinguni, jimboka xatinispkia.
40Ima ma isï Andresïspti, enga Juánuni kurhajchapka, Simoni Pédrueri erachi jémba. 41Andresï imeri erachi jémbani urheta xéntaspti, Simonini, ka arhispti:
–Xéntaskachia Mesiasini, (enga Krístu, arhikuekajka.)
42Tátsekua Andresï jima páspti enga Jesusi jápka; ka enga Jesusi exepka, arhispti:
–T'úri Simoniska, Juánu uájpa, ka iásïri Séfasi arhinhaakia (enga Pédru arhikuekajka, ka Pédru tsakapu arhikuekasïndi).
Jesusi Felipeni ka Natanelini uandajpaaspti
43Pauandekuarhu, Jesusi eratsespti Galilea isï nirani. Felipeni jima xéntaspti ka arhini:
–Chúxapurini.
44Ima Felipe, Betsaida anapuespti, jima engajtu Andresï ka Pédru anapuepka. 45Felipe, Natanaelini niraspti jirinhantani, ka arhispti:
–Xéntaskachi imani enga Moisesi juramukuarhu arhijka, imani engaksï Diósïri uandarichajtu karaka. Jesusini, Jose uájpani, Nasareti anapu.
46Natanaeli uandaspti:
–¿Andi ua Nasareti nema sáni ambakiti ambeni uérani?
Felipe arhispti:
–Ju exekorheni.
47Enga Jesusi exepka eska Natanaeli andarheraxapka, uandaspti:
–Ambakitimendu Israeli uájpa ma jurhaxati. 48Natanaeli kurhamarhespti:
–¿Nénarini jámani mítespkia?
Jesusi arhispti:
–T'uínkini xéspkia engakini Felipe nótki jamberi uandajpani jápka, engari jígusïrhu jandukutini jápka.
49Nataneli arhispti:
–Jurhentpiri, ¡T'úri Diósï Uájpeska, t'úri Israeliri Irecheska!
50Jesusi arhispti:
–¿Andi imani jimbojkurini jakajkuchexaki engakini arhika eskakini jígusïrhu jandukutini exespka? Sánderuri k'éri ambeterurisï exeaka. 51Jesusi uandasptijtu:
–Sési jimboksïnisï arhini jaka, eskajtsï iásï uératini cha auandani mítakorhetini exeaka, ka Diósïri ánjelichantsï exeauaka engaksï kétseni ka karhanchentani jauaka Acha Uájpani andarhentani.
Currently Selected:
San Juan 1: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.