Colosenses 1
1
Uandajperata
1Diósï, Pábluni kóndesti Jesukristuni uandakua pákuni jámani, ka iásï Timoteu jinguni 2Kolosasi anapu jakajkutichani uandajpaxatiksï, chánksïni engajtsï Krístuni jakajkukia ka mintsikantsïa. Diósï juchari Táteksïni sési jakua kóndente.
Páblu Diósïni diósïmaiamu arhisïndi
3Ji juchari Acha Jesukristueri tátjembani kánekua diósïmaiamu arhisïnga chánksïni jimbo engajtsï uandamukukorheni jarhajka, 4jimbokachi kurhaska eskajtsï Jesukristuni mintsikaskia ka eskajtsï jakajkutichani xénhchaxaka. 5Jimbokajtsï kurhanguskia eska ambakiti aiangperakua auandarhu anapu maiamperakueri ambe jurhentpesïnga, 6chájtsï kurhanguskia ka iápuru isïjtu mítepanhaxati, ka etsakorhepaxati. Ka ísï jánhastpepaxati eskaksïni chánksïni na jánhastapka jíani uénani engajtsï Diósïri kóntperakueri ambe kurhapka, 7engaksïni juchari pámpiri Epafrasi jurhendapka, sési mintsika je jimboka ima Krístueri jarhojpiriska. 8Imajtsïni aianguntasti eskajtsï Espiritu jimbo xénhchperaxaka.
9Juchachkani kurhaska ka jiáni uératinksïni kómarhijpechexaka eskajtsï mintsita jinguni iámu jánhaskaaka ambe enga Acha uéjka; 10ka eskajtsï jámaaka eska néka ima jinguni jámani; ka eska ima jaiapanhentaaka chári ambe; ka eskajtsï ambakiti úkuechani úani jauakia; ka eskajtsï Diósïri ambe sánderu mítepani jauakateru; 11ka eskaksïni ima uinhaperantaaka. Jimboka ima kánekua uinhapekua jatsiska ka jarhuatatiksïni tsípentani ekajtsï uándanheata ambe tekantani jáuaka, 12ka Diósïntsï k'éri ambe arhiaka, engajtsïni t'íntskua kóndentaka engaksï uájpecha míndakata jatsika. 13Nóterujtsïni p'ájpakandekua juramuchexatiia, Uájperi irechekuarhujtsïni irestantastia, Uájpa jinguni enga xáni xénhchajka, 14ima jimbochi p'ímutantskata jarhaskia ka k'amanharhintskuechanchi púamenhantaskia.
Krístu k'éri ambesti
15Diósïni nónema úsïndi exeni, Krístu jimbo xarharasti jimboka ima urhejtsïkuska iámendu kuerakata ambeni, 16ka iámendu ambe imani jimbo kueranhasti, enga auandarhu jaka ka echerindu, enga xarharka ka no xarharani, ka ístu espiritu uinhapiticha engaksï juramutspejka. Imeristi iámendu ambe jimboka ima jimbo kueranhaska. 17Ima t'uíni jarhasptia enga nótki ambe ma jápka, ka iámendu ambeni juramukuxati. 18Ka tángorhekuajtu imeristi jimbosï juramukujti. Ima urhejtskpiristi, ima urheta tsíntasti ka iámendu ambeni urhejtsïkuxati, 19iámendu uinhapekuani ima p'itixati, 20ka Diósï imani jimbo iámu ambe andarhetakorhentaxati, enga xáni echerindu jaka ka enga xáni eranchekorheka, ka imani jimbo sési uandajpentaxati iurhiri jimbo enga krúsirhu tsîtapka.
Chájtsï Diósïriskia
21Ka chánksïni engajtsï urhetku jarharetini jápka ka ikiatspirintsï, engajtsï nósesi eratsempka ka nósesijtsï jámani, 22iásïksïni imeri uarhikua jimbo sési uandajpantaxati, jimboka ima k'uiripu méni irekaspka, sésiksïni jájkuntasti ka nóma kántsperata jingunksïni andarhetakorhentaxati. 23Uétarhisïndi k'óru eskajtsï uinhamu mintsikaaka, ásï mirikurhi je ambejtsïsï piua ambakiti aiangperakua jimbo. I ambesï iápuru isï uandanhantani jati ka jíjtuni jarhopexaka uandantani.
Páblueri ánchekorheta
24Iásï tsípentasïnga engani cha jimbo nósesi p'ikuastanhani jaka, jimboka tángorhekua Krístueri anhanhatakueska ka ji p'íntaxaka chári uandanheatechani. 25Ji axanhaska tángorhekuani marhuakuni, Diósïrini cha jinguni axasti imeri uandakuani jánhastataranksïni. 26Indeni ambe enga xáni ióni nónema jánhaskempka, iásï kurhangutarpeni uandajpentaxati. 27Diósï uékasti eska i xáni ambakiti jurhengorhekua iápuru isï mítenhaaka. Eska Krístu cha jinguni jarhaska, ka eskaksïni t'íntskua kóndentaaka.
28Jucha imeri ambe uandantani jámsïnga, mímixekua jinguni arhistakuaparini ka jurhendaaparini, uéksïngachi eskaksï iámenduecha Krístuni sési kurhangukuaka. 29Imarini uinhaperantaxati jimbosïni incharhetakuntani jaka ánchekorheni.
Currently Selected:
Colosenses 1: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.